ចិន​ទាមទារ​ភ័ស្តុតាង​ដែលថា​ខ្លួន​ប៉ង​ពន្យារ​ការផលិត​វ៉ាក់សាំង​កូវី​ដ​១៩​របស់​លោកខាងលិច​

08-06-2020 5:20 pm 2247

​លោក​Rick Scott សមាជិក​ព្រឹទ្ធសភា​សហរដ្ឋអាមេរិក មកពី​គណបក្ស​សាធារណរដ្ឋ ប្រចាំ​រដ្ឋ Florida បាន​ចោទប្រកាន់​ដោយ​យោងទៅលើ​របាយការណ៍ ពី​ការ​ស៊ើបការណ៍​សម្ងាត់​ថា ចិន​បាន​ព្យាយាម​ពន្យឺត​ដល់​ដំណើរការ​ផលិត​វ៉ាក់សាំង​កូវី​ដ​-១៩​របស់​ប្រទេស​លោកខាងលិច​។ លោក Rick Scott ដែល​គាំទ្រ​លោក​ដូណាល់ ត្រាំ​ប្រធានាធិបតី​អាមេរិក​យ៉ាងខ្លាំង​នោះ​និយាយថា «​លោក​មាន​ភ័ស្តុតាង​បង្ហាញថា ចិន​កុ​ម្មុយ​និស្ត​កំពុង​ព្យាយាម​បំផ្លាញ​យើងឬ​បន្ថយល្បឿន​»​។ ប៉ុន្តែ​លោក​បដិសេធ​និយាយ​លម្អិត​អំពី​ភ័ស្តុតាង​ទាំងនោះ​។ អំឡុងពេល​ផ្តល់​កិច្ចសម្ភាសន៍​ជាមួយ​ទូរទស្សន៍​BBC លោក​Scott និយាយ​ម្តង​ហើយ​ម្តង​ទៀតថា «​ចិន​មិន​ចង់ឲ្យ​យើង​និង​អង់គ្លេ​សនិង​អឺរ៉ុប​ធ្វើ​វា​មុន​ទេ​…​ពួកគេ​បាន​សម្រេចចិត្ត​ធ្វើជា​សត្រូវ​នឹង​អាមេរិក​និង​ប្រទេស​ប្រជាធិបតេយ្យ​នៅ​ជុំវិញ​ពិភពលោក​»​។ 

​ពាក់ព័ន្ធ​នឹង​ការចោទប្រកាន់​នេះ ចិន​តាមរយៈ​លោកស្រី Hua Chunying​អ្នកនាំពាក្យ​ក្រសួងការបរទេស ​នៅ​ថ្ងៃ​ចន្ទ​ដើម​សប្តាហ៍​នេះ បានទាមទារ​ឲ្យ​លោក Scott លើក​ភ័ស្តុតាង​មក​បង្ហាញថា ចិន​ពិតជា​បាន​ប៉ុនប៉ង​ពន្យឺត​ឬ​ធ្វើឲ្យ​អន្តរាយ ដល់​ការអភិវឌ្ឍ​វ៉ាក់សាំង​របស់​ប្រទេស​លោកខាងលិច​មក កុំឲ្យ​ចេះតែ​ចោទ​ផ្តេសផ្តាស់​។ នេះ​ជា​ការចោទប្រកាន់​ថ្មី​មួយទៀត មកលើ​ចិន​ពាក់ព័ន្ធ​វីរុស​កូវី​-១៩ បន្ថែម​ពីលើ​ការចោទប្រកាន់​មុនៗ​ថា ចិន​បាន​បិទបាំង​ពី​ភាពគ្រោះថ្នាក់​នៃ​វីរុស មុន​រាតត្បាត​ពាសពេញ​ពិភពលោក និង​ការ​ចោទថា វីរុស​កូវី​ដ​-១៩​មាន​ប្រភព​ចេញ​មកពី​មន្ទីរពិសោធន៍ នៅក្នុង​ទីក្រុង​វូ​ហាន​ប្រទេស​ចិន​។ តែ​ចិន​បាន​ច្រានចោល​រាល់​ការ​ចោទ​ទាំងអស់នេះ​។​

​ចាប់តាំងពី​វីរុស​កូរ៉ូ​ណាបាន​ផ្ទុះឡើង​ក្នុង​ទីក្រុង​វូ​ហាន​ប្រទេស​ចិន​នា​ចុងឆ្នាំ​២០១៩ ដោយ​បានសម្លាប់​មនុស្ស​ជាង​៤០​ម៉ឺន​នាក់ និង​ឆ្លង​ជាង​៧​លាន​នាក់ ទូទាំង​ពិភពលោក មិនទាន់មាន​វ៉ាក់សាំង​និង​ថ្នាំ​ការពារ​និង​ព្យាបាល​បាន​នៅឡើយ​ទេ​។ ក្រុម​ស្រាវជ្រាវ​ជិត​១០០​ក្រុម​នៅ​ជុំវិញ​ពិភពលោក កំពុង​ប្រណាំងប្រជែង​គ្នា​ស្វែងរក​វ៉ាក់សាំង ដ៏​មាន​ប្រសិទ្ធភាព អាច​ទប់ស្កាត់​វីរុស​ដ៏​កាច​សាហាវ​នេះ​។ នៅក្នុង​នោះ​ក៏មាន​វ៉ាក់សាំង​ខ្លះ​ផលិត​រួចរាល់ និង​ដាក់ឲ្យ​ធ្វើតេស្ត​សាកល្បង​ផងដែរ​។ យ៉ាងណាក៏ដោយ បើទោះបីជា​មាន​ការខិតខំ​ប្រឹងប្រែង​យ៉ាងខ្លាំង​ក្តី ក៏​អ្នកជំនាញ​ខ្លះ​ជឿជាក់ថា រហូត​ទៅដល់​ពាក់កណ្តាល​ឆ្នាំ​២០២១​ឯណោះ ទើប​គេ​អាច​ចម្រាញ់​បាន​វ៉ាក់សាំង​មួយ ដែល​ទំនងជា​អាច​ប្រើប្រាស់​បាន តែ​ក៏​នៅ​មិនអាច​ធានាបាន​ទាំងស្រុង​ថា វា​មាន​ប្រសិទ្ធភាព​លើ​អ្នកជំងឺ​គ្រប់ៗ​គ្នា​ឡើយ​៕ ដោយ​៖​អ៊ុន សុខ​ឡា 

ព័ត៌មានផ្សេងទៀត