កិច្ចព្រមព្រៀង​ពាណិជ្ជកម្ម​សេរី​សហភាព​អឺរ៉ុប​និង​វៀតណាម​គ្រោង​អនុវត្ត​នៅ​ខែកក្កដា​

08-06-2020 3:05 pm 1238

​សភា​អឺរ៉ុប​ហៅ​កាត់​ថា EP បានផ្តល់​សច្ចាប័ន​ទៅលើ​កិច្ចព្រមព្រៀង​ពាណិជ្ជកម្ម​សេរី​សហភាព​អឺរ៉ុប​-​វៀតណាម​ឬ​ហៅ​កាត់​ថា​EVFTA កាលពី​ថ្ងៃទី​១២ ខែ​កុម្ភៈ ដោយ​ទទួលបាន​សំឡេងគាំទ្រ​ចំនួន​៤០១​ទល់នឹង​សំឡេង​ប្រឆាំង​ចំនួន​១៩២​និង​អនុប្បវាទ​ចំនួន​៤០​សំឡេង​។ បន្ទាប់មក​នៅ​ថ្ងៃទី​៣០ ខែ​មីនា សហគមន៍​អឺរ៉ុប បាន​យល់ព្រម​លើ​កិច្ចព្រមព្រៀង​នេះ ដោយ​បញ្ចប់​នីតិវិធី​ច្បាប់​ចុងក្រោយ នៅក្នុង​ដំណើរការ​ផ្តល់​សច្ចាប័ន​ផ្ទៃក្នុង​របស់​សហភាព​អឺរ៉ុប​។ កិច្ចព្រមព្រៀង​នេះ​រង់ចាំតែ​ការផ្តល់​សច្ចាប័ន របស់​រដ្ឋសភា​វៀតណាម​ប៉ុណ្ណោះ ដើម្បី​ចូល​ជា​ធរមាន​ទាំង​សហភាព​អឺរ៉ុប​និង​វៀតណាម​។ 

​ដូច្នេះ តំណាងរាស្ត្រ​នៅក្នុង​រដ្ឋសភា​វៀតណាម ដែល​តែងតែ​ផ្តល់​សច្ចាប័ន លើ​សំណើ​នានា​របស់​រដ្ឋាភិបាល បាន​បោះឆ្នោត​គាំទ្រ​ជាង ៩០​ភាគរយ ចំពោះ​កិច្ចព្រមព្រៀង​ពាណិជ្ជកម្ម​សេរី​សហភាព​អឺរ៉ុប​-​វៀតណាម​។ មានន័យថា កិច្ចព្រមព្រៀង​EVFTA បាន​ចូល​ជា​ធរមាន​ទាំង​ខាង​សហភាព​អឺរ៉ុប​និង​វៀតណាម​ជា​ស្ថាព​រហើយ និង​គ្រោង​ដាក់ឲ្យ​អនុវត្តជា​ផ្លូវការ​នៅខែ​កក្កដា​ឆ្នាំ​២០២០​។

​តាមរយៈ​កិច្ចព្រមព្រៀង​នេះ នឹង​កាត់បន្ថយ​ឬ​លុបចោល​ពន្ធ​ចំនួន ៩៩ ភាគរយ លើ​ទំនិញ​ដែល​ត្រូវបានធ្វើ​ពាណិជ្ជកម្ម រវាង​វៀតណាម​និង​ប្រទេស​ក្នុង​ប្លុក​សហភាព​អឺរ៉ុប​។ ការនាំចេញ​សំខាន់ៗ​របស់​វៀតណាម ទៅកាន់​សហភាព​អឺរ៉ុប​មានដូចជា​សំលៀកបំពាក់ ស្បែកជើង និង​វាយ​ន​ភណ្ឌ​ផ្សេងទៀត ក៏ដូចជា​គ្រឿង​អេឡិចត្រូនិច និង​ផលិតផល​កសិកម្ម​ជាដើម​។ ចំណែកឯ​ទំនិញ​ដែល​វៀតណាម​នាំចូល​ពី​សហភាព​អឺរ៉ុប​វិញ មានដូចជា​គ្រឿង​ម៉ាស៊ីន ថ្នាំពេទ្យ គ្រឿងបន្លាស់​រថយន្ត និង​ផលិតផល​អាហារ​។ កិច្ចព្រមព្រៀង​នេះ​តម្រូវឲ្យ​វៀតណាម​ទទួលស្គាល់តាម​ផ្លូវច្បាប់​ថា សហជីព​ការងារ​មាន​ភាព​ឯករាជ្យ​ពី​គណបក្សកាន់អំណាច និង​តម្រូវឲ្យ​វៀតណាម​ពង្រឹងច្បាប់​មួយចំនួន​ទៀត ជា​ថ្នូរ​នឹង​ការទទួលបាន EVFTA​។ 

​ការសម្រេចបាន​កិច្ចព្រមព្រៀង​ពាណិជ្ជកម្ម​EVFTA កើតឡើង​ក្នុង​គ្រា​ដែល​វៀតណាម កំពុងតែ​ខិតខំ​ប្រឹងប្រែង រើ​បម្រាស់​ចេញពី​វិបត្តិ​សេដ្ឋកិច្ច ដែល​បង្កឡើង​ដោយសារតែ​វីរុស​កូវី​ដ​-១៩​។ ហេតុនេះ​ជា​ដំណឹង​ល្អ​បំផុត​សម្រាប់​ប្រទេស​វៀតណាម ដើម្បី​ជំរុញ​វិស័យ​ផលិតកម្ម​និង​ការនាំចេញ​របស់​ប្រទេស​នេះ​។ ធនាគារពិភពលោក​បាន​និយាយ​កាលពី​ខែឧសភា​ថា​កិច្ចព្រមព្រៀង EVFTA អាច​ជំរុញ​ផលិតផល​ក្នុងស្រុក​សរុប​របស់​ប្រទេស​វៀតណាម​និង​ការនាំចេញ​បាន​ច្រើន​គួរ​សមនៅ​ឆ្នាំ ២០៣០ និង​ជួយ​លើកស្ទួយ​មនុស្ស​រាប់រយ រាប់ពាន់នាក់​ឲ្យ​ងើប​ផុតពី​ភាពក្រីក្រ​។​

​សូមបញ្ជាក់ថា វៀតណាម​បាន​ក្លាយជា​ប្រទេស​ទី​២ នៃ​ប្រទេស​សមាជិក សមាគម​ប្រជាជាតិ​អាស៊ីអាគ្នេយ៍ ឬ​ហៅ​កាត់​ថា​ASEAN ដែល​ទទួលបាន​កិច្ចព្រមព្រៀង EVFTA  ពី​សហភាព​អឺរ៉ុប បន្ទាប់ពី​ប្រទេស​សិង្ហ​បុរី ៕​ដោយ​៖​អ៊ុន សុ​ខឡា​

ព័ត៌មានផ្សេងទៀត