ពលរដ្ឋ​ខ្មែរ​នៅ​ម៉ាឡេស៊ី​អាច​ត្រឡប់​មក​កម្ពុជា​បានតែ​ត្រូវអនុវត្ត​តាម​ការណែនាំ​

21-05-2020 3:52 pm 188

​ចំពោះ​បងប្អូន​ប្រជាពលរដ្ឋ ពលករ ពល​ការិនី សិស្ស និស្សិត​កម្ពុជា ដែល​កំពុង​តែ​ស្នាក់នៅ សិក្សា និង​ធ្វើការ នៅ​ប្រទេស​ម៉ាឡេស៊ី ប្រសិនបើ​មាន​បំណង​វិលត្រឡប់​មក​កម្ពុជា​វិញ ត្រូវតែ​អនុវត្ត​ទៅ​តាម​ការណែនាំ​របស់​ស្ថាន​ឯកអគ្គរាជទូត​កម្ពុជា​ប្រចាំ​ប្រទេស​ម៉ាឡេស៊ី​ជាមុនសិន ដោយ​ការអនុវត្ត​នេះ​គឺ​អនុលោម​ទៅតាម​សេចក្តីប្រកាស​របស់​គណៈ​កម្ម​ការ​អន្តរក្រសួង​ដើម្បី​ប្រយុទ្ធ​នឹង​ជំងឺ​កូវី​ដ​-១៩ ។​

នៅក្នុង​សេចក្តី​ជូនដំណឹង​របស់​ស្ថានឯកអគ្គរាជទូត​កម្ពុជា​ប្រចាំ​ទីក្រុង​គូ​ឡា​ឡាំ​ពួរ​បានបញ្ជាក់​ថា គ្រប់​អ្នកដំណើរ​ទាំងអស់​ដែល​ចូលមក​កម្ពុជា គឺ​តម្រូវឲ្យ​មាន​វិញ្ញាបន​ប​ត្រ​បញ្ជាក់​សុខភាព បញ្ជាក់​ថា​គ្មាន​ជំងឺ​កូវី​ដ​-១៩ ចេញ​ដោយ​អាជ្ញាធរ​សុខាភិបាល​ដែល​ទទួលស្គាល់​ដោយ​រដ្ឋាភិបាល​ម៉ាឡេស៊ី​ក្នុង​រយៈពេល ៧២​ម៉ោង​។​មួយវិញទៀត អ្នកដំណើរ​ទាំងអស់​ទាំង​ជនជាតិ​ខ្មែរ​និង​ជនបរទេស​ដែល​ចូលមក​ប្រទេស​កម្ពុជា ត្រូវ​បញ្ចូនទៅ​មណ្ឌល​រង់ចាំ​ដើម្បី​ធ្វើតេស្ត​បញ្ជាក់​រក​ជំងឺ​កូវី​ដ​-១៩ និង​រង់ចាំ​ទទួល​លទ្ធផល​ពី​មន្ទីរពិសោធន៍​ប៉ាស្ទ័រ​។​

​ក្នុងករណី​មាន​អ្នកដំណើរ​ណា​ម្នាក់​ឬ​ច្រើន​នាក់ ដែល​ត្រូវបាន​រកឃើញ​ថា​មាន​វិជ្ជ​មានកូ​វីដ​-១៩ អ្នក​រួម​ដំណើរ​ជាមួយ​ទាំងអស់​តម្រូវឲ្យ​ធ្វើ​ចត្តា​ឡីស័​ក​រយៈពេល​១៤​ថ្ងៃ នៅ​ទីតាំង​កំណត់​ដោយ​គណៈកម្មការ​អន្តរក្រសួង​ដើម្បី​ប្រយុទ្ធ​នឹង​ជំងឺ​កូវី​ដ​-១៩​។​ម្យ៉ាង​ទៀត​ប្រសិនបើ​អ្នកដំណើរ​ទាំងអស់​ត្រូវ​បាន​រកឃើញ​អវិជ្ជមាន នោះ​ពួកគេ​នឹង​ត្រូវ​អនុញ្ញាតឲ្យ​ធ្វើ​ចត្តា​ឡីស័​ក​រយៈពេល ១៤​ថ្ងៃ​នៅ​តាម​ផ្ទះ​រៀងៗ​ខ្លួន ក្រោម​ការត្រួតពិនិត្យ​ពី​អាជ្ញាធរ​មូលដ្ឋាន​និង​មន្ត្រី​សុខាភិបាល ដោយ​តម្រូវឲ្យ​ធ្វើ​តេស្ត​ម្តងទៀត​នៅ​ថ្ងៃទី​១៣ នៃ​ការធ្វើ​ចត្តា​ឡី​ស័ក​។​

​ដោយឡែក​ចំពោះ​ប្រជាពលរដ្ឋ​កម្ពុជា​ទាំង​១៤៣​នាក់ ដែល​បាន​ខកខាន​ការធ្វើដំណើរ​កាលពី​ថ្ងៃ​ទី​៧ ខែ​មេសា ឆ្នាំ​២០២០​កន្លងទៅ ហើយ​ពុំ​ទាន់​បាន​ផ្តល់​ព័ត៌មាន​របស់​ខ្លួន​មក​ស្ថានទូត សូមប្រ​ញ៉ាប់​ទាក់ទង​មក​ស្ថានទូត ព្រោះថា​ស្ថានទូត​បាន​និង​កំពុង​សម្របសម្រួល​ជាមួយ​ក្រុមហ៊ុនអាកាសចរ​ណ៍​ម៉ាឡេស៊ី ដើម្បី​ឲ្យ​បងប្អូន​អាច​ធ្វើ​ដំណើរ​ត្រឡប់​ទៅ​ប្រទស​កម្ពុជា​វិញ​បាន​ឆាប់ ហើយ​ក្រុមហ៊ុន​អាកាសចរណ៍​ម៉ាឡេស៊ី​នឹង​ជូនដំណឹង​មក​ស្ថានទូត​អំពី​កាលបរិច្ឆេទ​ហោះហើរ​នាពេលខាងមុខ​៕

​ដោយ​៖​ថា ចាន់​ធី​

 ពាក្យគន្លឹះ  ទូតខ្មែរនៅម៉ាឡេស៊ី

ព័ត៌មានផ្សេងទៀត