ក្រ​សុខាភិបាល​​​ស្នើ​៦​​ចំណុច​​ដល់​អភិបាល​រាជធា​នី​-​ខេត្ត​​ដើម្បី​ការពារ​រលក​ទី​ពីរ​នៃ​ជំងឺ​កូវី​ដ​-១៩​ ​

20-05-2020 5:02 pm 125

​រដ្ឋមន្ត្រី​ក្រសួងសុខាភិបាល​លោក ម៉ម ប៊ុនហេង កាលពី​ថ្ងៃទី​នៅ​ថ្ងៃទី​១៩ ខែ​ឧសភា ឆ្នាំ​២០២០ បាន​ផ្ញើលិខិត​មួយច្បាប់​ទៅកាន់​អភិបាល​រាជធានី​-​ខេត្ត​ទូទាំងប្រទេស ស្ដីពី​ការជំរុញ​ការអប់រំ​សុខភាព​ជូន​ដល់​ប្រជាជន និង​ពង្រឹង​ការងារ តាមដាន​ការអនុវត្ត​វិធានការ​ការពារ​រលក​ទី​ពីរ នៃ​ការ​ចម្លងជំងឺ​កូវី​ដ​-១៩ នៅក្នុង​ប្រទេស​កម្ពុជា​។

​នៅក្នុង​លិខិត​នោះ​រដ្ឋមន្ត្រី​ក្រសួងសុខាភិបាល បានបញ្ជាក់​ដូច្នេះ ថា ថ្វីត្បិតតែ​ស្ថានភាព​ជំងឺ​វីដ​-១៩ នៅក្នុង​ប្រទេស​កម្ពុជា បច្ចុប្បន្ននេះ​មិនមាន​រកឃើញ ករណី​ឆ្លង​ថ្មី​ជាង​មួយខែ អ្នក​ឈឺ​បាន​ព្យាបាល​ជាសះស្បើយ ១០០% និង​មិនមាន​ករណី​ស្លាប់​ក៏ពិតមែន ហើយ​ភាគច្រើន​លើសលុប​សុទ្ធ សឹង​ជា​ករណី​នាំចូល​មកពី​ក្រៅប្រទេស ក៏ប៉ុន្តែ​កម្ពុជា ត្រូវតែ​ប្រកាន់យក​ការប្រុងប្រយ័ត្ន ជាប់​ជានិច្ច ចំពោះ​ការ​ប្រឈម​ទៅនឹង​ការ​កើតមានឡើង​នូវ​រលក​ទី​ពីរ នៃ​ការចម្លង​វីរុស​កូវី​ដ​-១៩ ពិសេស​ការចម្លង​នៅក្នុង​សហគមន៍ ដែល​អាច​នឹង​ធ្វើឲ្យប៉ះពាល់​ដល់​នយោបាយ សុខភាព​សាធារណៈ សេដ្ឋកិច្ច សង្គម និង​ការរស់នៅ​ប្រចាំថ្ងៃ​របស់​ប្រជាជន​ទូទៅ ដែល​ពិបាកធ្វើ​ការប៉ាន់ស្មាន​បាន​។​

​ក្នុងន័យនេះ រដ្ឋមន្ត្រី​ក្រសួងសុខាភិបាល បាន​ណែនាំ​ដល់​អាជ្ញាធរ​ថ្នាក់ក្រោម​ជាតិ និង​ប្រជាពលរដ្ឋ​ទាំងអស់ ត្រូវ​បន្ត​ចូលរួម​ការពារ​ហានិភ័យ​នៃ​ការ​ចម្លងជំងឺ​កូវី​ដ​-១៩ ដោយ​អនុវត្ត​នូវ​គោលការណ៍​ណែនាំ​សំខាន់ៗ​ដូចខាងក្រោម​៖

១. បន្ត​ធ្វើឱ្យ​សកម្ម​នូវ​ដំណើរការ​គណៈកម្មការ​ប្រយុទ្ធ​នឹង​ជំងឺ​កូវី​ដ​-១៩ រាជធានី​ខេត្ត​ជា​បន្តទៀត​។​

២. អាជ្ញាធរ​គ្រប់​លំដាប់ថ្នាក់​ត្រូវ​ចាត់តាំង​កម្លាំង​គ្រប់គ្រង​ឃ្លាំមើល និង​ណែនាំ​អប់រំ​ឲ្យមាន​ការអនុវត្តឲ្យ​បា​នខ្ជា​ប់​ខ្ជួន​នូវ​វិធានការ​ការពារ​ការចម្លង​ជំងឺ ព្រមទាំង​ជំរុញ​លើកទឹកចិត្ត​ឲ្យ​ពលរដ្ឋ​ក្នុង​ដែន​សមត្ថកិច្ច​ទទួលខុស​ត្រូវ​របស់ខ្លួន ឲ្យមាន​ការយល់ដឹង និង​អនុវត្ត​ការផ្លាស់ប្ដូរ​កែប្រែ​ទម្លាប់ និង​ឥរិយាបថ​នៃ​ការរស់នៅ​របស់ខ្លួន ឲ្យស្រប​តាម​របត់​នៃ​ការរស់នៅ «​សកម្មភាព​ធម្មតា​តាមបែប​គន្លង​ថ្មី ក្នុង​បរិបទ​ប្រយុទ្ធ​នឹង​ជំងឺ​កូវី​ដ​-១៩ »​។​

៣. បន្ត​ហាមឃាត់​មិន​ឲ្យមាន​ការជួបជុំ ឬ​រៀបចំ​ពិធី​ណាមួយ​ដែលមាន​អ្នកចូលរួម​ច្រើន​កុះករ​ពេក ដូចជា​ការជួបជុំ​ស៊ីផឹក​មាន​គ្នាច្រើន ឬ​ការជួបជុំ​តាមបែប​សាសនា​ជាដើម រហូតដល់​ខែកញ្ញា ឆ្នាំ​២០២០ ទើប​មានការ​ពិនិត្យឡើងវិញ​នូវ​ស្ថានភាព​នៃ​ការចម្លង និង​មាន​ការណែនាំ​សារជាថ្មី​។​

៤. ត្រូវ​តាមដាន និង​ត្រួតពិនិត្យ​តាម​ភោជនីយដ្ឋាន និង​អាហា​រដ្ឋា​ន​នានា​ព្រមទាំង​កន្លែង​លក់ដូរ​នានា ដើម្បីឲ្យ​ម្ចាស់ហាង​ទាំងនោះ​ត្រូវ​បន្ត​ការអនុវត្ត​វិធានការ​ការពារ​ការចម្លង​ជំងឺ​កូវី​ដ​-១៩​។​

៥. ជំរុញ​ប្រជាពលរដ្ឋ​មកពី​ក្រៅប្រទេស​ដែល​មិនបាន​ត្រួតពិនិត្យ​សុខភាព​នៅតាម​ច្រកព្រំដែន ឱ្យធ្វើ​ចត្តា​ឡី​ស័ក និង​តាមដាន​សុខភាព​ផ្ទាល់ខ្លួន​ចាំបាច់​ក្នុង​រយៈពេល ១៤ ថ្ងៃ និង​ទៅពិនិត្យ​សុខភាព​នៅ​មណ្ឌល​សុខភាព ឬ​មន្ទីរពេទ្យបង្អែក​ដែល​នៅ​ជិត ប្រសិនបើ​មាន​អា​ការៈមិន​ស្រួល ឬ​ករណី​សង្ស័យ​។​

៦. ចុះ​ពិនិត្យ​ស្ថានភាព​នៅ​ទីកន្លែង​ស្នាក់នៅ​របស់​អ្នក​ចត្តា​ឡី​ស័ក តាម​ផ្ទះ​ដែល​បញ្ជូន​មកពី​មណ្ឌល​ពិនិត្យ​សុខភាព​ខេត្ត ឬ​មណ្ឌល​សុខភាព ឬ​មន្ទីរពេទ្យបង្អែក និង​រៀបចំ​ចាត់ចែង​ការងារ​បន្ត ដោយ​ផ្អែកលើ​លទ្ធផល​នៃ​ការ​កត្តា​ពិនិត្យ​ឲ្យបាន​ហ្មត់ចត់​ជាទីបំផុត​៕


ព័ត៌មានផ្សេងទៀត