ជនបរទេស​នៅ​ប្រទេស​ចំនួន​៦​ដែល​ហាមឃាត់ អាច​ចូល​កម្ពុជា​វិញ​បាន​

20-05-2020 4:31 pm 1994

​រដ្ឋាភិបាល​កម្ពុជា តាមរយៈ​ក្រសួង​សុខាភិបាល​បាន​សម្រេច​អនុញ្ញាត​ឲ្យ​ភ្ញៀវ​បរទេស មកពី​ប្រទេស​ចំនួន​៦​រួមមាន អ៊ីរ៉ង់ អ៊ីតាលី អាល្លឺម៉ង់ អេ​ស្ប៉ាញ បារាំង និង​អាមេរិក អាច​ចូល​មក​ប្រទេស​កម្ពុជា​ឡើង​វិញ​បាន​។ ជនបរទេស​នៅ​ប្រទេស​ទាំងនោះ ត្រូវ​បាន​រដ្ឋាភិបាល​បិទ​មិនឲ្យ​ចូលមក​កម្ពុជា​តាំងពី​ពាក់កណ្តា​ល​ខែ​មីនា បន្ទាប់ពី​មាន​ការផ្ទុះ​រីក​រាលដាល​ខ្លាំង​នូវ​ជំងឺ​កូវី​ដ​១៩​។ 

​បើតាម​សេចក្តីប្រកាស​របស់​ក្រសួង​សុខាភិបាល នៅ​ថ្ងៃ​ទី​២០ ខែ​ឧសភា​នេះ បានឲ្យដឹងថា យោង​តាម​ការវិវត្តន៍​សភាពការណ៍​នៃ​ការរីក​រាលដាល​ជំងឺ​កូវី​ដ​១៩ គណៈកម្មការ​អន្តរក្រសួង​ដើម្បី​ប្រយុទ្ធ​នឹង​ជំងឺ​កូវី​ដ​១៩ បាន​កែសម្រួល​វិធានការ​ការពារ ទប់ស្កាត់ និង​ឆ្លើយតប​ការរីក​រាលដាល​នៃ​ជំងឺ​កូវី​ដ​១៩ សម្រាប់​អ្នកធ្វើ​ដំណើ​រទាំង​ផ្លូវអាកាស ផ្លូវគោក និង​ផ្លូវទឹក​។​ ​ក្រសួង​សុខាភិបាល​បានសម្រេច​លុបចោល​បំរាម​ហាម​ជនបរទេស នៅក្នុង​ប្រទេស​ចំនួន​៦​ចូលមក​កម្ពុជា រួម​មាន​អ៊ីរ៉ង់ អ៊ីតាលី អាល្លឺម៉ង់ អេ​ស្ប៉ាញ បារាំង និង​អាមេរិក​អាច​ធ្វើ​ដំណើរ​ចូលមក​កម្ពុជា​វិញ​បាន​។ 

​ក្រសួង​បាន​បន្តថា​គ្រប់​អ្នកដំនើរ​ទាំងអស់​ដែល​ចូលមក​ប្រទេស​កម្ពុជា ទាំង​ជនជាតិខ្មែរ និង​ជនបរទេស​គឺ​តម្រូវឲ្យ​មាន​វិញ្ញាបន​ប​ត្រ​បញ្ជាក់​សុខភាព​បញ្ជាក់ថា គ្មាន​មេ​រោគកូ​វីដ​១៩ ចេញ​ដោយ​អាជ្ញាធរ​សុខាភិបាល​ដែល​ទទួលស្គាល់​ដោយ​រដ្ឋាភិបាល​នៃ​ប្រទេស​សា​ម៉ី​ក្នុង​រយៈពេល​៧២​ម៉ោង​។ បន្ថែម​លើស​នេះ​ជន​បរទេស​ត្រូវ​មាន​ឯកសារ​ធានារ៉ាប់រង​សុខភាព​ក្នុង​ចំនួន​ទឹកប្រាក់​យ៉ាងតិច​៥​ម៉ឺន​ដុល្លារ ក្នុង​អំឡុងពេល​ស្នាក់នៅ​កម្ពុជា និង​ត្រូវ​គោរព​ទៅ​តាម​វិធាន​ផ្សេងៗ​ទៀត​ដែល​កំណត់​ដោយ​រដ្ឋាភិបាល​កម្ពុជា​។​

​ក្រសួង​សុខាភិបាល​បាន​បញ្ជាក់ទៀតថា អ្នកដំណើ​រទាំង​ជនជាតិ​ខ្មែរ​និង​បរទេស​ដែល​ធ្វើដំណើរ​ចូលមក​ដល់​កម្ពុជា ត្រូវ​បញ្ជូន​ទៅ​មណ្ឌល​រង់ចាំ​ដើម្បី​ធ្វើ​តេស្ត​រក​មេ​រោគកូ​វីដ​១៩ និង​រង់ចាំ​ទទួល​លទ្ធផល​ពី​មន្ទីរពិសោធន៍​ប៉ាស្ទ័រ​។ ក្នុងករណី​មាន​អ្នកដំណើរ​ណា​ម្នាក់​ឬ​ច្រើន​ត្រូវបាន​រកឃើញ​លទ្ធផល​វិជ្ជមាន នោះ​រាល់​អ្នកដំណើរ​រួម​ជាមួយ​ផ្សេងទៀត​ទាំងអស់​តម្រូវឲ្យ​ធ្វើ​ចត្តា​ឡីស័​ក​រយៈពេល​១៤​ថ្ងៃ នៅ​ទីតាំង​ដែល​កំណត់​ដោយ​គណៈកម្មកា​រ​អន្តរក្រសួង​ដើម្បី​ប្រយុទ្ធ​នឹង​ជំងឺ​កូវី​ដ​១៩​។​

​ដោយឡែក​ក្នុង​ករណី​អ្នកដំណើរ​ទាំងអស់​លទ្ធ​ផល​អវិជ្ជមាន នោះ​ពួកគេ​ទាំងអស់​ត្រូវបាន​អនុញ្ញាតឲ្យ​ធ្វើ​ចត្តា​ឡី​ស័ក​១៤​ថ្ងៃ​នៅ​តាម​ផ្ទះ​រៀងៗ​ខ្លួន​ក្រោម​ការត្រួតពិនិត្យ​ពី​អាជ្ញាធរ​មូលដ្ឋាន និង​មន្ត្រី​ក្រសួង​សុខាភិបាល ដោយ​តម្រូវឲ្យ​ធ្វើ​តេ​ស្តបញ្ជាក់​ម្តងទៀត​នៅ​ថ្ងៃទី​១៣​នៃ​ការធ្វើ​ចត្តា​ឡី​ស័ក​។​

​គួរបញ្ជាក់​ថា ជនបរទេស​នៅ​ប្រទេស​ទាំង​៦​ខាងលើនេះ ត្រូវ​បាន​រដ្ឋាភិបាល​កម្ពុជា បិទ​មិនឲ្យ​ចូលមក​កម្ពុជា​ឡើយ ចាប់តាំងពី​ពាក់កណ្តាល​ខែ​មីនា ឆ្នាំ​២០២០ កន្លងទៅ បន្ទាប់ពី​មាន​ការផ្ទុះ​រីក​រាលដាល​ខ្លាំង​នៃ​ជំងឺ​កូវី​ដ​១៩ នា​ពេលកន្លងមក​៕ ដោយ​៖ សៅ វិសាល​

 ពាក្យគន្លឹះ  ជនបរទេសលុបចោលបំរាម

ព័ត៌មានផ្សេងទៀត