អាមេរិក​ថា​ចិន​ប៉ុនប៉ង​លួច​ទិន្នន័យ​ព្យាបាល​និង​វ៉ាក់សាំង​កូវី​ដ​១៩

14-05-2020 11:52 am 268

​ស្ថាប័ន​ស្រាវជ្រា​វកូវី​ដ​-១៩​អាមេរិក ប្រឈម​នឹង​ហានិភ័យ ដោយសារតែ​ក្រុម​ព័ត៌មានវិទ្យា ស្ថិតក្រោម​ការបង្គាប់បញ្ជា​របស់​ចិន បាន​ចូលមក​ជ្រៀតជ្រែក​កិច្ចការ​ផ្ទៃក្នុង​របស់​ពួកគេ​។ ទីភ្នាក់ងារ​ស៊ើបការណ៍​សម្ងាត់ ឬ​FBI និង​ទីភ្នាក់ងារ​សន្តិសុខ​និង​ការវាយប្រហារ​តាម​ប្រព័ន្ធ​អ៊ី​ន​ធឺ​ណេត ឬ​CISA ព្រមាន​កាលពី​ថ្ងៃ​ពុធ​ថា ក្រុមអ្នកលេង​អ៊ី​ន​ធឺ​ណែ​ត ដែលមាន​ទំនាក់ទំនង​ជាមួយ​រដ្ឋាភិបាលចិន​និង​អ្នក​ដទៃទៀត បាន​ព្យាយាម​ចូល​លួច​ទ្រព្យសម្បត្តិ​ដែលជា​កម្មសិទ្ធិបញ្ញា​ដ៏​មានតម្លៃ និង​ទិន្នន័យ​សុខភាព​សាធារណៈ​ទាក់ទង​ទៅនឹង​វ៉ាក់សាំង ការព្យាបាល និង​ការធ្វើ​តេស្ត​ពី​បណ្តាញ​និង​បុគ្គល​ដែល​ពាក់ព័ន្ធ​ជាមួយ​ការស្រាវជ្រាវ​ទាក់ទង​នឹង​កូវី​ដ​-១៩​។ បញ្ហា​នេះ​បាន​គំរាមកំហែង​យ៉ាងខ្លាំង ដល់​ប្រជាជាតិ​អាមេរិក​ក្នុង​ការឆ្លើយតប​ទៅនឹង​វិបត្តិកូ​វីដ​-១៩​។ ប៉ុន្តែ​ស្ថាប័ន​ទាំងពីរ​មិន​បានផ្តល់​ភស្តុតាង ដើម្បី​គាំទ្រ​ការចោទប្រកាន់​ទេ​។​

​ពាក់ព័ន្ធ​នឹង​ការចោទប្រកាន់​នេះ ចិន​ធ្លាប់​បដិសេធ​ម្តង​រួចមកហើយ ក្រោយ​អាមេរិក​ប្រកាសថា​ក្រុមសង្គមងងឹត​ឬ hackers ចិន បាន​ចូលលុកលុយ​ទិន្នន័យ​នានា​ពាក់ព័ន្ធ​នឹង​កូវី​ដ​-១៩​របស់ខ្លួន​នៅ​ដើម​សប្តាហ៍​នេះ​។ កាលពី​ថ្ងៃ​ចន្ទ អ្នកនាំពាក្យ​ក្រសួងការបរទេស​ចិន​លោក​Zhao Lijian និយាយថា ចិន​កំពុង​ចូលរួម​ដឹកនាំ​ពិភពលោក ក្នុង​ការស្រាវជ្រាវ​លើ​ការព្យាបាល​និង​វ៉ាក់សាំង​ការពារកូ​វីដ​-១៩​។ លោក​Zhao Lijian រិះគន់​អាមេរិក​ថា ជា​រឿង​អសីលធម៌​ក្នុង​ការដាក់​គំនាប​លើ​ចិន ដោយ​ពោល​ពាក្យ​ច​ចាម​អារាម​មិន​ពិត និង​ការនិយាយ​បង្កាច់​បង្ខូច ដោយ​គ្មាន​ភស្តុតាង​បែបនេះ​។​

​ដំណឹង​ពី​ការប៉ុនប៉ង​លួច​ទិន្នន័យ​ពី​ការស្រាវជ្រា​វកូវី​ដ​-១៩​របស់​អាមេរិក បាន​កើតឡើង​អំឡុងពេល​ក្រុមហ៊ុន វិទ្យាស្ថាន​និង​ប្រទេស​ជាច្រើន​ជុំវិញ​ពិភពលោក កំពុង​ប្រណាំងប្រជែង​គ្នា រក​និង​បង្កើត​ថ្នាំ​និង​វ៉ាក់សាំង ដើម្បី​បញ្ឈប់​ការរីក​រាលដាល​នៃ​វីរុស​កូរ៉ូណា​។ តែ​មកទល់ពេលនេះ មិនទាន់មាន​ថ្នាំ​និង​វ៉ាក់សាំង​ណាមួយ ត្រូវបាន​ទទួលស្គាល់​និង​ដាក់ឲ្យ​ប្រើប្រាស់​ជា​ផ្លូវការ នៅក្នុង​ពិភពលោក​នៅឡើយ​ទេ​។ 

​បើតាម​អ្នកជំនាញ​ជាច្រើន​អះអាងថា គេ​ត្រូវ​ចំណាយពេល​ជាង​១​ឆ្នាំ ទើប​អាច​រក​វ៉ាក់សាំង​មួយ​ពិតប្រាកដ​បាន​។ បើ​រកបាន​ហើយ គេ​ត្រូវ​ចំណាយពេល​កាន់តែ​យូរ​ជាងនេះទៀត ដើម្បី​ផលិត​វ៉ាក់សាំង​ឲ្យបាន​ច្រើន សម្រាប់​ផ្គត់ផ្គង់​តម្រូវការ​មនុស្ស​មួយ​ភាគ​ធំ​នៅលើ​ពិភពលោក ដែល​រង​ផលប៉ះពាល់​ពី​ជំងឺ​រាតត្បាត​។ វ៉ាក់សាំង​ដែលមាន​ប្រសិទ្ធិភាព​មួយ នឹង​ជួយ​រំដោះប្រទេស​ដែល​រង​ផលប៉ះពាល់​ចេញពី​វិបត្តិ ដោយ​អនុញ្ញាតឲ្យ​ប្រទេ​សនានា បើក​ដំណើរការ​ឡើងវិញ​បាន​យ៉ាង​ពេញលេញ ហើយ​អ្នក​ដែល​រកឃើញ​វ៉ាក់សាំង​មាន​ប្រសិទ្ធភាព​មុនគេ អាច​រកចំណូលបាន​រាប់លាន​ដុល្លារ​៕ ដោយ​៖​អ៊ុន សុខ​ឡា​

ព័ត៌មានផ្សេងទៀត