ករណី​ឆ្លង​ថ្មី​​កូវី​ដ​-១៩​​នៅ​កូរ៉េខាងត្បូង ចិន អាល្លឺម៉ង់​​បង្ហាញថា​​ហានិភ័យ​នៅតែមាន​

12-05-2020 1:33 pm 334

​គិត​ត្រឹម​ពេលនេះ​មាន​បណ្ដា​ប្រទេស​ជា​បន្ដបន្ទាប់​ក្នុង​ពិភពលោក បាន​ត្រៀមខ្លួន​ដើម្បី​បើកទ្វារ​ប្រទេស​ឬ​បើក​ឲ្យ​ប្រទេសមាន​ដំណើរការ​ឡើងវិញ​បន្ដិច​ម្ដងៗ បន្ទាប់ពី​ធ្លាក់ចុះ​ករណី​ឆ្លង​និង​ស្លាប់​ដោយសារ​វីរុស​កូរ៉ូ​ណាឬកូវី​ដ​-១៩​។ ប៉ុន្ដែ​យ៉ាងណាមិញ​ស្ថានភាព​អាសន្ន​នៅ​មិនទាន់​ឆ្លង​ផុត​នោះទេ តួយ៉ាង​នៅ​កូរ៉េខាងត្បូង នៅ​ចិន អាល្លឺម៉ង់ ជា​ប្រទេស​ដែល​ត្រូវបាន​កោតសរសើរ​ពី​ការទប់ស្កាត់​ការឆ្លង​រាលដាល ទើប​មាន​ផ្ទុះ​ករណី​ថ្មី​ឡើងវិញ​។ ការណ៍​នេះ​ក៏​ជា​មេរៀន​ក្រើនរម្លឹក​ប្រទេស​ដែល​ត្រៀម​ដកចេញ​វិធានការ​រឹត​ត្បិត ត្រូវតែ​បង្កើន​ការប្រុងប្រយ័ត្ន​ខ្ពស់​និង​ត្រូវមាន​ការអត់ធ្មត់​ខ្លាំង​បំផុត​។​

​បណ្ដា​មេដឹកនាំ​ប្រទេស​ជាច្រើន​ក្នុង​ពិភពលោក ជា​ប្រទេស​រងគ្រោះ​ដោយសារ​វីរុស​កូរ៉ូ​ណាឬកូវី​ដ​-១៩ តែងតែ​និយាយ​និង​ប្រកាស​ក្ដែងៗ​ប្រាប់​ពលរដ្ឋ​របស់ខ្លួន ថា​កុំ​ទាន់​ភ្លេចខ្លួន​ឲ្យសោះ​ព្រោះកូ​វីដ​-១៩​មិនទាន់​រលាយបាត់​នោះទេ​។ រីឯ​អ្នកជំនាញ​ក៏បាន​ប្រកាស​ផងដែ​រថា អ្នក​បាន​ជាសះស្បើយ​ឡើងវិញ​ហើយ ក៏​អាច​ឆ្លង​វីរុស​នេះ​ឡើងវិញ​បានដែរ​ប្រសិន​គ្មាន​ការពារ​ត្រឹមត្រូវ​។ ដូច្នេះ​មិនអាច​ភ្លេចខ្លួន​បានឡើយ​ទោះបី​ករណី​ស្លាប់​និង​ឆ្លង​បាន​ថយចុះ​បើ​ប្រៀបធៀប​ពីដំបូង​។ 

​ការ​ក្រើនរម្លឹក​ដូច្នេះ​លោក​ប្រធានាធិបតី​កូរ៉េខាងត្បូង​មូន ជែ​អ៊ីន ក៏​ធ្លាប់បាន​និយាយ​ទៅកាន់​ពលរដ្ឋ​របស់លោក​ដែរ​។ លោក​ថា​វា​មិនទាន់​បញ្ចប់​ទេ​រហូតដល់​វា​ចប់​។ លោក​និយាយ​បែបនេះ​កាលពី​ថ្ងៃអាទិត្យ​ចុង​សប្ដាហ៍​មុន បន្ទាប់ពី​មានការ​ផ្ទុះឡើង​នូវ​ករណី​ថ្មី​ក្នុង​ទីក្រុង​សេ​អ៊ួ​ល បង្ក​ជា​ក្ដីបារម្ភ​ខ្លាច​ផ្ទុះឡើង​នូវរ​លក​ជា​លើក​ទី​ពីរ​។ កូរ៉េខាងត្បូង​គឺជា​ប្រទេស​ស្ថិតក្នុង​ចំណោម​ប្រទេស​ដែល​បាន​ដោះស្រាយ​មុនគេ ជាមួយនឹង​ការឆ្លង​រាតត្បាត​នៃ​វីរុស​កូវី​ដ​-១៩​។ រដ្ឋ​នៅ​អាស៊ី​មួយ​នេះ​ពិតជា​ធ្វើបាន​យ៉ាង​ល្អ​ក្នុង​ការទប់ស្កាត់ ហើយ​ក្រោយមក​ក៏​ចាប់ផ្ដើម​បន្ធូរបន្ថយ​ការ​រឹតបន្ដឹង​នានា បន្ទាប់ពី​ចេញ​បទបញ្ជា​ឲ្យ​អនុវត្ដ​វិធានការ​រក្សា​គម្លាត​សង្គម និង​ការតាមដាន​យ៉ាង​យកចិត្ដទុកដាក់​ពី​អាជ្ញាធរ​។ ប៉ុន្ដែ​យ៉ាងណាក៏ដោយ​ករណី​ផ្ទុះឡើង​ថ្មី​ទំនង​នឹងត្រូវ​បញ្ចប់​ការបន្ធូរបន្ថយ​នោះ ព្រោះ​លោក​មូនព្រមាន​ប្រជាជន​កូ​រ៉េ​ខាង​ត្បូងថា មិនអាច​បន្ធូរដៃ​លែង​ការពារកូ​វីដ​-១៩​បានឡើយ​។​

​នៅក្នុង​ប្រទេស​ចិន​វិញ​ក៏​កំពុងតែ​ណែនាំ​ពី​វិធានការ​រឹតបន្ដឹង​ថ្មី បន្ទាប់ពី​ទីក្រុង​ចំនួន​ពីរបាន​រាយការណ៍​ថា​មាន​ផ្ទុះឡើង​ករណី​កូវី​ដ​-១៩​ថ្មី​។ ទីក្រុង​ស៊ូ​ឡាន​ក្នុង​ខេត្ដ​ជី​លីន​ត្រូវបាន​ប្រកាស​បិទទ្វារ បន្ទាប់ពី​មាន​ផ្ទុះឡើង​១១​ករណី​ថ្មី​។ ខេត្ដ​ជី​លីន​ជា​ខេត្ដ​ព្រំដែន​ជាប់​រុស្ស៊ី​និង​កូរ៉េខាងជើង ហើយ​ការព្រួយបារម្ភ​បាន​កើតឡើង​ជុំវិញ​ការនាំ​ចូល​ពី​បរទេស​ទើប​ធ្វើឲ្យ​ផ្ទុះ​ករណី​ថ្មី​បែបនេះ​។ ការប្រកាសអាសន្ន​ផ្សេងទៀត​គឺ​នៅក្នុង​ទីក្រុង​វូ​ហាន ជា​ទីក្រុង​ផ្ទុះ​កូវី​ដ​-១៩​ដំបូង​គេ​កាលពី​ចុងឆ្នាំ​២០១៩​។ ទីក្រុង​ក្នុង​ខេត្ដ​ហួ​ប៉ី​មួយ​នេះ​ទើប​ឆ្លង​ផុតពី​ការបិទទ្វារ​រយៈពេល​៧៦​ថ្ងៃ​កាលពី​ខែ​មុន​ទេ​។ កាលពី​ថ្ងៃ​ចន្ទ​អាជ្ញាធរ​ក្រុង​វូ​ហាន​បាន​និយាយថា​មាន​ករណី​ឆ្លង​ថ្មី​ចំនួន​៥​ករណី​ទៀត ដែល​ពុំមែន​ជា​ករណី​នាំចូល​នោះឡើយ​។ ទោះបីជា​តួលេខ​ឆ្លង​ហាក់​ឃ្លាតឆ្ងាយ​ពី​បណ្ដា​ប្រទេស​នៅ​អឺរ៉ុប​និង​អាមេរិក ប៉ុន្ដែ​ការផ្ទុះ​ឡើង​ជាថ្មី​បាន​បង្ហាញឲ្យឃើញថា ជាការ​ផ្ទុះឡើង​ដែល​ពុំបាន​តាមដាន​ដឹង ហើយនឹង​ឈានទៅ​គំរាមកំហែង​ពី​លទ្ធភាព​នៃ​ការបើក​ប្រទេស​ឡើងវិញ​។​

​អ្នកនាំពាក្យ​គណៈកម្មាធិការ​សុខភាព​ជាតិចិន​លោក​Mi Feng​កាលពី​ថ្ងៃអាទិត្យ បាន​ជំរុញ​ឲ្យ​ប្រជាជន​ត្រូវ​ស្ថិតក្នុង​ការប្រកាសអាសន្ន​និង​បង្កើន​ការការពារ​ប្រឆាំង​វីរុស​កូវី​ដ​-១៩​។ លោក​បន្ថែមថា​ការផ្ទុះ​ឡើង​ជាថ្មី​បាន​រម្លឹ​កឲ្យមនុស្ស​ភ្ញាក់ខ្លួ​ន​និង​ត្រូវតែ​ចៀសវាង​ការប្រមូលផ្ដុំ ហើយ​ត្រូវ​ស្វែងរក​ការពិគ្រោះ​យោបល់​ជាមួយ​គ្រូពេទ្យ​ឬ​ធ្វើតេស្ដ ប្រសិនបើ​មាន​រោគសញ្ញា​សង្ស័យ​ឆ្លង​។ 

​បើ​និយាយ​មុន​ការផ្ទុះ​ឡើង​ករណី​ថ្មី ចំនួន​ឆ្លង​នៅក្នុង​ប្រទេស​ចិន​និង​កូរ៉េខាងត្បូង បាន​ធ្លាក់ចុះ​ដល់​កម្រិត​ទាប​បំផុត​ជាមួយនឹង​ការឆ្លង​នៅក្នុង​សហគមន៍​ត្រូវបាន​ទប់ស្កាត់​។ ខណៈដែល​មាន​សំណួរ​ចោទឡើង​ពី​តួលេខ​ឆ្លង​និង​ស្លាប់​ពិតប្រាកដ​នៅ​ក្នុងប្រទេស​ចិន និង​ពាក់ព័ន្ធ​ការទប់ស្កាត់​ការឆ្លង​ក្នុង​សហគមន៍​ផង​នោះ កូរ៉េខាងត្បូង​ក៏​ត្រូវបាន​គេ​កោតសរសើរ​ចំពោះ​ការឆ្លើយតប​របស់គេ​ជាមួយនឹង​ការទប់ស្កាត់​កូវី​ដ​-១៩​ផងដែរ​។​

​ងាក​ទៅ​មើល​នៅក្នុង​តំបន់​អឺរ៉ុប​ឯណោះ​វិញ គឺ​អាល្លឺម៉ង់​ក៏​បាន​បង្ហាញឲ្យឃើញពី​ឧទាហរណ៍​នៃ​វិធីសាស្ដ្រ​ដោះស្រាយ​ការឆ្លង​រាលដាល​ផងដែរ​។ នោះ​គឺជា​រឿង​ជោគជ័យ​មួយ​សម្រាប់​អាល្លឺម៉ង់ ដោយសារតែ​ប្រព័ន្ធ​សុខាភិបាល​ល្អប្រសើរ​និង​ការ​ធ្វើតេស្ដ​រក​មេរោគ​បាន​ទាន់ពេល​។ ប៉ុន្ដែ​ចំនួន​នៃ​ការកើតឡើង​ជាថ្មី​បាន​កើនឡើង​លើ​សម្នាក់​កាលពី​ប៉ុន្មាន​ថ្ងៃមុន នេះ​បើតាម​ការបញ្ជាក់​ពី​មជ្ឈមណ្ឌល​គ្រប់គ្រង​ជំងឺ​Robert Koch Institute (RKI)​។ ព័ត៌មាន​នេះ​មានន័យថា​អ្នក​ផ្ទុកមេរោគ​ម្នាក់​អាច​ចម្លង​ជា​មធ្យម​ទៅ​មនុស្ស​ច្រើនជាង​ម្នាក់​។ វា​ជា​ការប្រកាសអាសន្ន​ថ្មី​ទៀត​សម្រាប់​អាល្លឺម៉ង់ ហើយ​សូម្បី​លោកស្រី​អធិការបតី​Angela Merkel ក៏​ប្រាប់​ទៅ​សាធារណជន​កាលពី​សប្ដាហ៍​មុន​ដែរថា ពលរដ្ឋ​អាចមាន​ភាពក្លាហាន​ជាង​មុន​បន្ដិច ប៉ុន្ដែ​លោកស្រី​ព្រមាន​ពី​ហានិភ័យ​មិនទាន់​ឆ្លង​ផុតពី​ដៃ​ឡើយ​។ 

​មជ្ឈមណ្ឌល​គ្រប់គ្រង​ជំងឺ​អាល្លឺម៉ង់​បញ្ជាក់ថា នៅតែ​មិនទាន់​ប្រាកដប្រជា​ជាមួយនឹង​ការប៉ាន់ប្រមាណ​ថ្មី ប៉ុន្ដែ​អត្រា​ផ្ទុះឡើង​ជាថ្មី​ជំរុញ​ឲ្យ​ត្រូវមាន​ការតាមដាន​យ៉ាង​យកចិត្ដទុកដាក់​បំផុត​ក្នុងរយៈពេល​ប៉ុន្មាន​ថ្ងៃ​ខាងមុខ​។ រដ្ឋាភិបាល​សហព័ន្ធ​អាល្លឺម៉ង់​អាច​នឹង​ឯកភាព​ឲ្យមាន​យន្ដការ​បណ្ដោះអាសន្ន​ក្នុ​ង​ករណី​កូ​វីដ​-១៩​ផ្ទុះ​ឡើងវិញ​។ ប្រសិនបើ​វា​កើនឡើង​ដល់​៥០​ករណី​ឆ្លង​ថ្មី​ក្នុងចំណោម​មនុស្ស​១០​ម៉ឺន​នាក់​ក្នុងស្រុក វិធានការ​បិទទ្វារ​ប្រទេស​នឹងត្រូវ​ណែនាំ​ឲ្យ​អនុវត្ដ​ម្ដងទៀត​។ 

​ករណី​ផ្ទុះឡើង​ថ្មី​ប្រហែលជា​ពុំទាន់​ដល់​ដំណាក់កាល​ប្រកាសអាសន្ន​ទេ ប៉ុន្ដែ​ប្រសិនបើ​ប្រទេស​ទាំងបី​គឺ​ចិន កូរ៉េខាងត្បូង និង​អាល្លឺម៉ង់ បាននិងកំពុង​រាយការណ៍​ពី​ករណី​ថ្មី​នៃ​ការឆ្លង​ក្នុងស្រុក​ហើយ​នោះ វា​ក៏​ជា​ការព្រួយបារម្ភ​ដ៏​ធំ​ត្រូវ​យកចិត្ដទុកដាក់​។ ក្រុមអ្នកតាមដាន​កំពុង​សម្លឹងមើល​ទៅ​ប្រទេស​សិង្ហ​បុរី ដែល​កាលពីដើម​ខែមេសា​មាន​តិចជាង​២​ពាន់​ករណី ប៉ុន្ដែ​ឥលូវ​មាន​ជាង​២៣,០០០​ករណី​។ វា​ជា​ហានិភ័យ​ប្រសិនបើ​ឆាប់​បន្ធូរបន្ថយ​ការ​រឹតបន្ដឹង​ពេក ហើយ​សន្មត់​ថា​បាន​យកឈ្នះ​នៅ​ពេលដែលវា​ទើបនឹង​ចាប់ផ្ដើម​។ 

​តើ​មេរៀន​ណាមួយ​នៅ​ក្នុងប្រទេស​ដែល​បានលើកឡើង​នេះ អាច​ត្រូវបាន​រៀនសូត្រ​នៅ​លោកខាងលិច ជា​តំបន់​ដែលមាន​ប្រទេស​មួយចំនួន​បាន​ត្រៀមខ្លួន និង​បាន​បន្ធូរបន្ថយ​ការបិទទ្វារ​ប្រទេស​ទៅហើយនោះ ទោះបីជា​អត្រា​នៃ​ការឆ្លង​នូវតែមាន​ខ្ពស់​? 

​វិបត្ដិ​សកលលោក​ជា​ប្រវត្ដិសាស្ដ្រ​ថ្មី​នេះ​បង្ហាញឲ្យឃើញថា មិន​ត្រឹមតែ​ប្រទេស​លោកខាងលិច​ប៉ុណ្ណោះ​ទេ​ដែល​ខ្វះចន្លោះ​ក្នុង​ការឆ្លើយតប​ជាមួយកូ​វីដ​-១៩ ទោះបីជា​មាន​ភស្ដុតាង​ថា​វា​មាន​សក្ដានុពល​ឆ្លង​ជា​សកល​ក៏ដោយ ប្រទេស​អាស៊ី​មួយចំនួន​ក៏​ខ្វះខាត​ដូចគ្នា​។ ប្រទេស​នៅ​អាស៊ី​ក៏​មានបទពិសោធន៍​មិនល្អ ហើយ​ការណែនាំ​ឲ្យ​ការពារ​ខ្លួន​ដូចជា​ការពាក់​ម៉ាស់​ជាដើម មិន​ត្រូវបាន​យកចិត្ដទុកដាក់​នោះទេ រហូតដល់​មាន​ករណី​ឆ្លង​ធ្ងន់ធ្ងរ​។ ចំពោះ​ករណី​ផ្ទុះឡើង​ថ្មី​នៅក្នុង​ប្រទេស​ចិន​និង​កូរ៉េខាងត្បូង មិនមែន​មានន័យថា​មកពី​ប្រទេស​ទាំងពីរ​នេះ​ទម្លាក់​ដៃ​ពី​ការប្រយុទ្ធប្រឆាំង​នោះឡើយ ប៉ុន្ដែ​ជា​មេរៀន​ដែល​ឆាប់​ដកចេញ​ការ​រឹតបន្ដឹង​ពេក​។

សរុបមក​មិន​ថា​នៅ​អាស៊ី នៅ​អឺរ៉ុប ឬ​នៅ​តំបន់​ណាក៏ដោយ​ដែល​រងគ្រោះ​ដោយសារកូ​វីដ​-១៩ ទោះបីជា​ពេលនេះ​បាន​ស្រាកស្រាន្ដ​បន្ដិច​ឡើងវិញ ហើយ​គ្រោង​នឹង​អនុញ្ញាតឲ្យ​ប្រទេស​ចាប់ផ្ដើម​ដំណើរការឡើ​ង​វិញ​បន្ដិច​ម្ដងៗ ក៏​មិនត្រូវ​ភ្លេច​ទេពី​ការប្រយុងប្រយ័ត្ន​ខ្ពស់ ហើយ​ត្រូវមាន​ការអត់ធ្មត់​ខ្លាំង​បំផុត​៕

​ដោយ​៖​ពេញ ផេង​

ព័ត៌មានផ្សេងទៀត