មេដឹកនាំ​ពិភពលោក​ជំរុញ​ល្បឿន​ផលិត​ថ្នាំ​និង​វ៉ាក់សាំង​កូវី​ដ​១៩

25-04-2020 3:26 pm 557

​ប្រធានាធិបតី​បារាំង​លោក Emmanuel Macron, អធិការបតី​អាល្លឺម៉ង់​លោកស្រី Angela Merkel និង​ប្រធានាធិបតី​អាហ្វ្រិក​ខាងត្បូង​លោក Cyril Ramaphosa សុទ្ធតែ​ស្ថិតក្នុង​ចំណោម អ្នក​ដែល​បាន​ចូលរួម​កិច្ចពិភាក្សា​តាម​វីដេអូ ជាមួយ​អង្គការ​សុខភាព​ពិភពលោក​ហៅ​កាត់​ថា WHO ដើម្បី​ដាក់ចេញ​នូវ​អ្វីដែល WHO ប្រកាសថា​ជា កិច្ចសហការ​ដ៏​សំខាន់ ដើម្បី​ប្រយុទ្ធ​ប្រឆាំងនឹង​ជំងឺ​រាតត្បាត​នេះ​។ គោលបំណង ដើម្បី​ពន្លឿន​ការផលិត​ថ្នាំ​ដែល​មានសុវត្ថិភាព​និង​ប្រសិទ្ធភាព ការ​ធ្វើតេស្ត​ថ្នាំ​និង​វ៉ាក់សាំង ដើម្បី​ការពារ​វីរុស ការធ្វើ​រោគវិនិច្ឆ័យ​និង​ព្យាបាល​ជំងឺ​សួត បង្កឡើង​ដោយ​វីរុស​កូរ៉ូ​ណាឬកូវី​ដ​-១៩ និង​ធានាបាន​នូវ​ការព្យាបាល​ស្មើៗ​គ្នា ទាំង​ចំពោះ​អ្នកមាន​និង​អ្នកក្រ​។ 

​កិច្ចប្រជុំ​ដែល​WHO​ឲ្យ​តម្លៃ​ខ្ពស់​នោះ មិនមាន​ការចូលរួម​ពី​ប្រទេស​ធំៗ​តួយ៉ាង​ដូចជា អាមេរិក ចិន រុស្ស៊ី​និង​ឥណ្ឌា​ទេ​។ អាមេរិក ខឹង​ទាំង​ចិន​និង​WHO និង​ចោទថា​រួមគ្នា​លាក់បាំង​ពី​ភាពគ្រោះថ្នាក់ នៃ​វីរុស​កូរ៉ូណា ដែល​ផ្ទុះ​ដំបូង​នៅ​ក្នុងប្រទេស​ចិន មុនពេល​ពេល​រាតត្បាត​វាយលុក​ពាសពេញ​ពិភពលោក តែ​ចិន​និង​WHO​បាន​បដិសេធ​។ ចំណែក​រុស្ស៊ី​បាន​ចេញមក​ការពារ​ចិន មិន​ទទួលយក​ការចោទប្រកាន់​របស់​អា​មេរិក​ឡើយ​។ លោក Macron បាន​ជំរុញ​ឲ្យ​ក្រុមប្រទេស G7 និង G20​ទាំងអស់ ស្ថិតនៅ​ពីក្រោយ​គំនិត​ផ្តួចផ្តើម​នេះ​។ រួមគ្នា​ធ្វើជា​ជញ្ជាំង​ដ៏​រឹងមាំ មិន​ថា​ទាំង​ចិន​និង​សហរដ្ឋអាមេរិក ហើយ​មិនគួរ​បែងចែក​គ្នា ដើម្បី​យកឈ្នះ​លើស​ត្រូវ​រួម​ឡើយ​។ 

​គេ​ត្រូវ​ត្រៀម​ទុក​មុន​រាល់​វិធានការ​នានា​ឲ្យបាន​ជាក់លាក់ ទាំង​នៅ​ដំណាក់កាល​កំពុង​ផលិត​ថ្នាំ វ៉ាក់សាំង​និង​ធ្វើតេស្ត រហូតដល់​ដំណាក់កាល​ទទួលបាន​ផលិតផល​សម្រេច ដើម្បី​កុំឲ្យ​មាន​បញ្ហា​កើតឡើង​។ បទពិសោធន៍​អំឡុងពេល​ផ្ទុះ​ជំងឺ​ផ្តាសាយ​H1N1​ក្នុង​ឆ្នាំ​២០០៩​ជា​មេរៀន​ស្រាប់​។ កាលនោះ​មានការ​រិះគន់ថា ការ​ចែកចាយ​ថ្នាំ​បង្ការ​មិនមាន​សមភាព​ទេ ព្រោះ​ប្រទេស​អ្នកមាន​អាច​បញ្ជា​ទិញ​ថ្នាំ​បាន​ច្រើនជាង​ប្រទេស​អ្នកក្រ​។ លោកស្រី Melinda Gates​សហប្រធាន​នៃ​មូលនិធិ​Gates ដែលជា​ម្ចាស់ជំនួយ​ធំ​ទី ២ របស់​អង្គការ​សុខភាព​ពិភពលោក​កាលពី​ឆ្នាំមុន​បាន​ថ្លែងថា នៅពេល​មាន​ថ្នាំ វ៉ាក់សាំង គឺ​ត្រូវមាន​ទំនួល​ខុសត្រូវ​ក្នុង​ការចែករំលែក​ដោយ​ស្មើភាព​គ្នា ព្រោះ​ជីវិត​មនុស្ស​ម្នាក់ៗ​មានតម្លៃ​ស្មើគ្នា​។​

​នៅពេលនេះ មាន​វ៉ាក់សាំង​ដ៏​មាន​សក្កា​នុព​ល សម្រាប់​ប្រឆាំងនឹង​វីរុស​កូរ៉ូណា​ជាង​១០០ កំពុង​ត្រូវបាន​ផលិត រួមទាំង​វ៉ាក់សាំង​ចំនួន​៦ បាន​ធ្វើតេស្ត​រួចរាល់​ហើយ​។ នេះ​បើតាម​ការបញ្ជាក់​ពី​វេជ្ជបណ្ឌិត Seth Berkley​នាយក​ប្រតិបត្តិ​នៃ​សម្ព័ន្ធភាព​វ៉ាក់សាំង​សកល GAVI​។ ទន្ទឹមគ្នា​នោះ គេ​បាន​ប្តេជ្ញាចិត្ត​ជា​សាកល ក្នុង​ការប្រមូល​ថវិកា​ឲ្យបាន​៨,១០​ពាន់​លាន​ដុល្លារ នៅក្នុង​ខែឧសភា ដើម្បី​គាំទ្រ​ដល់​ការបង្កើន​ការងា​រលើ​ការការពារ ការធ្វើ​រោគវិនិច្ឆ័យ​និង​ការព្យាបាល​។ ប្រធាន​គណៈកម្មការ​អឺរ៉ុប​លោកស្រី​Ursula von der Leyen​ថ្លែងថា នេះ​គ្រាន់តែ​ជា​ដំណាក់កាល​ដំបូង​ប៉ុណ្ណោះ ប៉ុន្តែ​នឹងមាន​តម្រូវការ​ថវិកា​បន្ថែម​ទៀត នៅ​ពេលខាងមុខ​៕ 

ដោយ៖អ៊ុន សុខឡា

ព័ត៌មានផ្សេងទៀត