លោក​ផៃ​ ស៊ីផា​ន​៖​រដ្ឋាភិបាល​មាន​កញ្ចប់​ថវិកា​រួច​ហើយ​សម្រាប់​គ្រាអាសន្ន​

15-04-2020 4:45 pm 340

​គណបក្ស​ប្រជាធិបតេយ្យ​មូលដ្ឋាន តាមរយៈ​សេចក្តីថ្លែងការណ៍​របស់​ខ្លួន​ចុះ​ថ្ងៃ​ទី​១៥ ខែ​មេសា ឆ្នាំ​២០២០​បានស្នើ​ដល់​អង្គនីតិប្បញ្ញត្តិ អនុម័ត​ច្បាប់​បញ្ចេញ​កញ្ចប់​ថវិកា​ពិសេស​បន្ថែម (​បរិមាណ​ទុនបម្រុង​របស់​ជាតិ ឬ​បរិមាណ​កម្ចី​បន្ថែម​)​ដើម្បី​រាជរដ្ឋាភិបាល​អាច​មាន​ធនធាន​ហិរញ្ញ​គ្រប់គ្រាន់ ក្នុង​ការ​ទប់ស្កាត់​កុំឲ្យ​មាន​ការរីក​រាលដាល​មេ​រោគកូ​វីដ​-១៩ និង​ដោះស្រាយ​វិបត្តិ​សេដ្ឋកិច្ច ហិរញ្ញវត្ថុ និង​សន្តិសុខ​ស្បៀង​ទាន់ពេលវេលា និង​ប្រកបដោយ​ប្រសិទ្ធិភាព​។​

​ការដាក់ចេញ​នូវ​សេចក្តីថ្លែងការណ៍​របស់​គណបក្ស​ប្រជាធិបតេយ្យ​មូលដ្ឋាន​ខាងលើ​នេះ ព្រោះ​តែ​គណបក្ស​នេះ​សង្កេតឃើញថា វិបត្តិកូ​វីដ​-១៩ កំពុង​នាំ​មក​នូវ​ផលវិបាក​ធ្ងន់ធ្ងរ​ដល់​ប្រជាពលរដ្ឋ និង​សង្គមជាតិ​ទាំងមូល​ដូចជា​៖​វិបត្តិ​សេដ្ឋកិច្ច វិបត្តិ​សង្គមកិច្ច សន្តិសុខ​ស្បៀង វិបត្តិ​ហិរញ្ញវត្ថុ ហើយ​ច្បាប់ស្តី​ហិរញ្ញវត្ថុ​សម្រា​ប់​ការគ្រប់គ្រង​ឆ្នាំ​២០២០ មិន​មាន​ខ្ទង់​ចំណាយ​សម្រាប់​ដោះស្រាយ ផលវិបាក​ធ្ងន់ធ្ងរ​ដល់​ប្រជាពលរដ្ឋ និង​សង្គមជាតិ​ដែល​បណ្តាល​មក​ពី​វិបត្តិកូ​វីដ​-១៩​នោះទេ​។​

​ទាក់ទង​ទៅនឹង​ការស្នើ​របស់​គណបក្ស​ប្រជាធិបតេយ្យ​មូលដ្ឋាន​ដល់​អង្គនីតិប្បញ្ញត្តិ​ឲ្យ​អនុម័ត​ច្បាប់​បញ្ចេញ​កញ្ចប់​ថវិកា​ពិសេស​បន្ថែម​នេះ​ដែរ លោក​ផៃ ស៊ីផា​ន អ្នកនាំពាក្យ​រាជរដ្ឋាភិបាល​បានឲ្យដឹងថា រាជរដ្ឋាភិបាល​មាន​កញ្ចប់​រួច​ហើយ​សម្រាប់​គ្រាអាសន្ន និង​មាន​ការ​តៀម​ថវិកាបម្រុង​ទាំង​នៅក្នុង​និង​ក្រៅប្រទេស​ផង​ដែរ ហើយ​រាជរដ្ឋាភិបាល​ចាយ​អ្វី​ដែល​មាន មិន​ចាយ​ឲ្យអស់​ប្រាក់​សន្សំ​នោះទេ​...

​សំឡេង​លោក​ផៃ ស៊ីផា​ន​៖

​សូម​ជម្រាប​ជូន​ដែរ​ថា សេចក្តីព្រាងច្បាប់​ស្តីពី​ហិរញ្ញវត្ថុ​សម្រាប់​ការគ្រប់គ្រង​ឆ្នាំ​២០២០​នះ រាជរដ្ឋាភិបាល​កម្ពុជា គ្រោង​នឹង​ចំណាយ​ថវិកា​សរុប​ប្រមាណ​៨,២២៣​លាន​ដុល្លារ​សហរដ្ឋអាមេរិក សម្រាប់​គ្រប់គ្រង​រដ្ឋ​។​មួយវិញទៀត​ប្រមុខ​រាជរដ្ឋាភិបាល​កម្ពុជា ធ្លាប់បាន​លើកឡើង​ថា រាជរដ្ឋាភិបាល​ក៏​បាន​ត្រៀម​ថវិកា​ប្រមាណ​ពី​៨០០ ទោ​២,០០០​លាន​ដុល្លារ​អាមេរិក​ផងដែរ ដើម្បី​សង្គ្រោះ​សេដ្ឋកិច្ច​កម្ពុជា ទៅ​តាម​ដំណាក់កាល​នៃ​ការវាយប្រហារ​របស់​មេ​រោគកូ​វីដ​-១៩​។​

​សូម​បញ្ជាក់​ដែរ​ថា កញ្ចប់​ថវិការ​ពិសេស​បន្ថែម ដែល​គណបក្ស​ប្រជាធិបតេយ្យ​មូលដ្ឋាន បានស្នើ​នោះ គឺ​សម្រាប់​រដ្ឋាភិបាល​អាច​អនុវត្ត​គោល​នយោបាយ​ដោះស្រាយ​បញ្ហា​ចំនួន​៥ រួមមាន​ដូចជា​៖

១.​ថវិកា ជា​ទុន​កម្ចី​បន្ថែម​ដែល​មាន​អត្រា​ការប្រាក់​ទាប​បំផុត សម្រាប់​អនុវត្ត​គោលនយោបាយ​ហិរញ្ញវត្ថុ ជួយ​ធនាគារ​ឯកជន និង​ស្ថាប័ន​មីក្រូហិរញ្ញវត្ថុ ដើម្បី​ឲ្យ​ធនាគារឯកជ​ន និង​ស្ថាប័ន​មីក្រូហិរញ្ញវត្ថុ​សម្រួល​ដល់​ការផ្អាក​បង់​រំលស់​ប្រចាំខែ​របស់​ប្រជាពលរដ្ឋ​ក្នុង​រយៈពេល​ខ្លី​មួយ​

២.​ឧបត្ថម្ភ​ដល់​កម្មករ បុគ្គលិក​ទាំង​ក្នុង និង​ក្រៅ​ប្រព័ន្ធ​ដែល​អត់​ការងារ​ធ្វើ​ដោយសារ​ផលប៉ះពាល់​នៃ​ជំងឺ​កូវី​ដ​-១៩ ដោយ​ក្នុង​នោះ​ប្រជាពលរដ្ឋ ១​នាក់ គួរ​ទទួល​បាន​ចាប់​ពី​៥០ ម៉ឺន​រៀល ក្នុង​មួយ​ខែ ក្នុង​រយៈពេល​កំណត់​មួយ តាមរយៈ​ការប្រើប្រាស់​មួយចំណែក នៃ​ថវិកា​ត្រៀម​របស់​រាជរដ្ឋាភិបាល​ចំនួន​២,០០០​លាន​ដុល្លារ​

៣.​ថវិកា​សម្រាប់​គាំទ្រ​ដល់​កសិករ បង្កើន​ការផលិត​ទូទាំង​ប្រទេស និង​បែងចែក​ស្បៀង​(​ជាពិសេស​បន្លែ ស៊ុត សាច់​) ភ្ជាប់​ជាមួយ​នឹង​ការបញ្ជូន​គ្រូ​កសិកម្ម​ល្អៗ​ចំនួន ៥០០​នាក់ ដើម្បី​ជួយ​ដល់​កសិករ​ផលិត ដែល​មាន​ចំនួន ៣០,០០០​នាក់ ។​ថវិកា​សម្រាប់​គាំទ្រ​ដល់​កសិករ ពិសេស​ដោះស្រាយ​បញ្ហា​ទឹក ទុន ការប្រមូលផ្តុំ​ផលិតផល និង​ដឹកជញ្ជូន​មក​ទីផ្សារ​

៤.​ថវិកា​សម្រាប់​គាំទ្រ​ដល់​រោង​ម៉ាស៊ីនកិនស្រូវ​ទាំងអស់ ដើម្បី​ធានា​ឲ្យមាន​ស្រូវស្តុក​ទុក​គ្រប់គ្រាន់​ក្នុង​តម្លៃ​សម​រ​ម្យ​មួយ​សម្រាប់​ផ្គត់ផ្គង់​ជូន​ប្រជាពលរដ្ឋ រហូត​ដល់​រដូវ​ប្រមូល​ផល​ក្រោយ​

៥.​ថវិកា​សម្រាប់​គាំទ្រ​ដល់​ក្រុមហ៊ុន សហគ្រាស ដែល​រង​ផលប៉ះពាល់ តាមរយៈ​ការអនុគ្រោះ​ពន្ធ ការកាត់បន្ថយ​ចំណាយ​លើ​អគ្គិសនី និង​ការឧបត្ថម្ភ​ធន​ផ្សេងៗ​ទៀត​៕

ព័ត៌មានផ្សេងទៀត