ការពារ​កុំឲ្យ​​ឆ្លង​កូវី​ដ​-១៩​​នៅតែ​ជា​កត្ដា​​ចម្បង​​បំផុត​​ទោះ​អ្នក​វិទ្យាសាស្ដ្រ​​​រកឃើញ​​វ៉ាក់សាំង​

20-03-2020 5:39 pm 1030
អ្នកវិទ្យាសាស្ដ្របញ្ជាក់បានរកឃើញវ៉ាក់សាំង​និងថ្នាំប្រឆាំងវីរុសកូវីដ-១៩

​វីរុស​កូរ៉ូ​ណាឬកូវី​ដ​-១៩​ដែល​កំពុង​ឆ្លង​រាតត្បាត​ទូទាំង​ពិភពលោក គឺជា​បញ្ហា​ប្រឈម​សម្រាប់​មនុស្សជាតិ ហើយក៏​ជា​បញ្ហា​ប្រឈម​មិន​ធ្លាប់មាន​សម្រាប់​អ្នកវិទ្យាសាស្ដ្រ​ផងដែរ​។ ល្បឿន​នៃ​ការឆ្លង​រាលដាល​វីរុស​កូរ៉ូណា កំពុង​ធ្វើឲ្យ​អ្នកវិទ្យាសាស្ដ្រ​ពន្លឿន​ការសិក្សា​ស្រាវជ្រាវ ក៏​អាច​និយាយបានថា​វីរុស​នេះ​កំពុង​សាកល្បង​សមត្ថភាព​អ្នកវិទ្យាសាស្ដ្រ​ទាំងអស់ ថា​តើ​អា​ចរកថ្នាំ​ព្យាបាល​ឬ​វ៉ាក់សាំង​ការពារ​បាន​ដែរឬទេ​។ 

​កន្លងមក​ធ្លាប់មាន​ការចុះផ្សាយ​នៅតាម​បណ្ដាញសារព័ត៌មាន​ថា មាន​ថ្នាំ​ជាច្រើន​ប្រភេទ​ដែល​បាន​យកទៅ​ប្រើប្រាស់​សាកល្បង​ព្យាបាល​វីរុស​កូរ៉ូ​ណាឬកូវី​ដ​-១៩​នេះ ហើយ​លទ្ធផល​វិជ្ជមាន​គួរឲ្យកត់សម្គាល់​។ ក្នុងនោះ​មានដូចជា​ថ្នាំ​ប្រឆាំង​គ្រុនចាញ់ ថ្នាំ​ប្រឆាំង​ជំងឺអេដស៍​ជាដើម ប៉ុន្ដែ​ពុំទាន់​មាន​ការប្រកាស​ទទួលស្គាល់​ពី​អង្គការ​សុខភាព​ពិភពលោក ថា​អាច​យកទៅ​ប្រើប្រាស់​ជា​ផ្លូវការ​បានឡើយ​។ 

​ប៉ុន្មាន​ថ្ងៃ​មុននេះ​មាន​ការប្រកាស​យ៉ាង​ភ្ញាក់ផ្អើល​ដែរ ហើយ​ត្រូវបាន​គេ​ចាត់ទុកថា​ជា​ជំហាន​ដ៏​សំខាន់​ក្នុង​ការលុបបំបាត់​វីរុស​កូវី​ដ​-១៩ នោះ​គឺ​ការប្រកាស​ថា​បាន​រកឃើញ​វ៉ាក់សាំង​។ ដំណឹង​ដំបូង​ចេញពី​សហរដ្ឋអាមេរិក​។ អាមេរិក​ប្រកាសថា​បង្កើតបាន​វ៉ាក់សាំង​ប្រឆាំង​វីរុស​កូរ៉ូ​ណាហើយ និង​បាន​សាកល្បង​ជាក់ស្ដែង​ទៅលើ​មនុស្ស​ថែមទៀត​។ ប៉ុន្ដែ​ទោះបីជា​មានការ​ធ្វើតេស្ដ​លើ​មនុស្ស​នៅពេលនេះ យ៉ាងហោចណាស់​ក៏ត្រូវ​ចំណាយពេល​ដល់​១៨​ខែ​ទៀត ទើប​វ៉ាក់សាំង​អាច​ដាក់ឲ្យ​ប្រើប្រាស់​ជា​សាធារណៈ​បាន មានន័យថា​ត្រូវ​ឆ្លងកាត់​ការពិសោធ​ច្រើន​ដំណាក់កាល និង​រង់ចាំ​មើល​លទ្ធផល​ជាក់ស្ដែង​។​

​វ៉ាក់សាំង​នេះ​មាន​ឈ្មោះថា​mRNA-1273 ស្រាវជ្រាវ​និង​បង្កើតឡើង​ដោយ​អ្នកវិទ្យាសាស្ដ្រ​នៃ​វិទ្យាស្ថាន​សុខភាព​ជាតិ​អាមេរិក និង​សហការី​នៅ​ក្រុមហ៊ុន​ជីវ​បច្ចេកវិទ្យា​Moderna​។ ការពិសោធ​នឹង​ធ្វើឡើង​ទៅលើ​មនុស្ស​ស្ម័គ្រចិត្ដ​ដែលមាន​សុខភាព​ល្អ​ចំនួន​៤៥​នាក់ អាយុ​ចន្លោះ​ពី​១៨​ដល់​៥៥​ឆ្នាំ ក្នុង​រយៈពេល​៦​សប្ដាហ៍​រៀបចំ​តាម​ដំណាក់កាល​។  

​តាម​ការបញ្ជាក់​ពី​លោក​វេជ្ជបណ្ឌិត​John Tregoning អ្នកជំនាញ​ផ្នែក​ជំងឺឆ្លង​ទៅ​មហាវិទ្យាល័យ​Imperial​ក្នុង​ទីក្រុង​ឡុង​ដ៍​ចក្រភព​អង់គ្លេស វ៉ាក់សាំង​នេះ​ត្រូវបាន​បង្កើតឡើង​តាម​ស្ដង់ដា​ខ្ពស់​ណាស់ ប្រើប្រាស់​សារធាតុ​ដែល​ដឹង​មុន​ថា​មាន​សុវត្ថិភាព​សម្រាប់​មនុស្ស​។ ចំពោះ​អ្នក​ដែល​ចូលរួម​ក្នុង​ការសាកល្បង​ក៏មាន​ការត្រួតពិនិត្យ​យ៉ាង​ល្អិតល្អន់​បំផុត​។ លោក​សង្កត់ធ្ងន់ថា​ការពិសោធ​ពិតណាស់ថា​វា​លឿន ប៉ុន្ដែ​វា​ជាការ​ប្រណាំងប្រជែង​ប្រឆាំងនឹង​វីរុស មិនមែន​ប្រឆាំងនឹង​អ្នកវិទ្យាសាស្ដ្រ​ដូចគ្នា​ទេ​។ ម្យ៉ាង​នេះ​គឺជា​រឿង​ដែល​ត្រូវធ្វើ​ដើម្បី​ជា​ប្រយោជន៍​សម្រាប់​មនុស្សជាតិ​។​

​ចំណែក​ប្រទេស​ចិន​វិញ ចិន​ក៏​បានប្រកាស​ដែរ​ថា​ក្រុម​អ្នកវិទ្យាសាស្ដ្រ​របស់ខ្លួន បាន​រកឃើញ​វ៉ាក់សាំង​ប្រឆាំង​វីរុស​កូរ៉ូ​ណាឬកូវី​ដ​-១៩​យ៉ាង​ជោគជ័យ​។ ការស្រាវជ្រាវ​ដឹកនាំ​ដោយ​លោកស្រី​ជិន វៃ អ្នកជំនាញ​ផ្នែក​កិច្ចការ​ស្រាវជ្រាវ​វេជ្ជសាស្ដ្រ​យោធា នៃ​វិទ្យាសា្ថន​វិទ្យាសាស្ដ្រ​យោធា​ចិន​។ វ៉ាក់សាំង​នេះ​ក៏​ទទួលបាន​ការអនុញ្ញាតឲ្យ​សាកល្ប​ង​ដូចគ្នា​។ វា​ក៏​ជា​វ៉ាក់សាំង​ផលិត​តាម​ស្ដង់ដា​កំណត់ដោយ​អន្ដរជាតិ​និង​តាម​បទ​បញ្ញត្ដិ​ក្នុងប្រទេ​សចិន​។ ការរកឃើញ​ត្រូវបាន​ចាត់ទុកជា​ដំណាក់កាល​បឋម ដែល​ប្រកបដោយ​សុវត្ថិភាព ប្រសិទ្ធភាព និង​គុណភាព​។ វ៉ាក់សាំង​កំពុង​ត្រៀម​ផលិត​ជា​លក្ខណៈ​ទ្រង់ទ្រាយ​ធំ ប៉ុន្ដែ​ចិន​មិន​បានបញ្ជាក់​នោះទេ​ថា​អាច​ប្រើប្រាស់​ជា​ផ្លូវការ​នៅពេលណា​។​

​ក្នុងពេល​បន្ដបន្ទាប់​គ្នា​ជប៉ុន​បាន​ជូនដំណឹង​ដែរថា បាន​រកឃើញ​ថ្នាំ​ប្រឆាំងនឹង​វីរុស​កូវី​ដ​-១៩​នេះដែរ ដោយ​គ្រោង​នឹង​ផ្សព្វផ្សាយ​ពី​ការប្រើប្រាស់​របស់​វា​ជា​សាធារណៈ​។ តាម​ការចុះផ្សាយ​របស់​សារព័ត៌មាន​ជប៉ុន​NHK ថ្នាំ​ប្រឆាំង​វីរុស​កូវី​ដ​-១៩​នោះ​មាន​ឈ្មោះថា​Avigan អភិវឌ្ឍ​ដោយ​ក្រុមហ៊ុន​ជប៉ុន​និង​ទទួលស្គាល់​ប្រសិទ្ធភាព​ដោយ​មជ្ឈមណ្ឌល​ជាតិ​ចិន ក្រោយ​យក​ទៅប្រើ​សាកល្បង​លើ​អ្នកជំងឺ​ក្នុង​ក្រុង​វូ​ហាន​និង​ស៊ិន​ជិន​។​

​ជាមួយនឹង​ការចុះ​ផ្សាយដំណឹង​ដ៏​ល្អ​នេះ​បាន​ក្លាយជា​ក្ដីសង្ឃឹម​សម្រាប់​មនុស្សជាតិ ព្រោះ​គិតថា​មិនយូរ​ទេ​វីរុស​កូរ៉ូ​ណាឬកូវី​ដ​-១៩​នឹង​បាត់​មុខ​ពី​ពិភពលោក​។ យ៉ាងណាក៏ដោយ​វ៉ាក់សាំង​ដែល​រកឃើញ​ក៏ត្រូវ​រង់ចាំ​ការ​ធ្វើតេស្ដ​បញ្ចប់​ហើយ​ប្រកាស​ពី​ប្រសិទ្ធភាព ព្រមទាំង​ទទួលបាន​ការអនុញ្ញាត​ពី​អង្គការ​សុខភាព​ពិភពលោក​ជាមុនសិន​ដែរ ពោលគឺ​ត្រូវ​ចំណាយពេល​ដល់​ឆ្នាំ​។ អ្វីដែល​អាច​ធ្វើបាន​មុន​មាន​វ៉ាក់សាំង​ប្រើប្រាស់​ផ្លូវការ គឺ​ការចូលរួម​ទប់ស្កាត់​និង​ការពារ​កុំឲ្យ​ឆ្លង​វីរុស​កូវី​ដ​-១៩​នេះ​។ ការទប់ស្កាត់​និង​ការពារ​កុំឲ្យ​ឆ្លង​កូវី​ដ​-១៩ នៅតែ​ជា​កត្ដា​ដ៏​ចម្បង​បំផុត​មិន​ថា​អ្នកវិទ្យាសាស្ដ្រ​ប្រកាសថា​បាន​រកឃើញ​វ៉ាក់សាំង​ក៏ដោយ​៕

ព័ត៌មានផ្សេងទៀត