ទូត​ចិន​ប្រកាសថា​​ក្រុម​ស្រាវជ្រាវ​វេជ្ជសាស្ត្រ​​ចិន​​រកឃើញ​វ៉ាក់សាំងការពារ​កូវី​ដ​-១៩​

18-03-2020 10:03 am 368

ខណ​:​ដែល​វីរុស​កូវី​ដ​-១៩ ពេលនេះ​កំពុងតែ​រាតត្បាត​ទូទាំង​ស​កលោក ស្ថានទូត​ចិន​ប្រចាំ​កម្ពុជា នៅ​ព្រឹក​ថ្ងៃទី​១៨ ខែមីនា​នេះ បានប្រកាស​ព័ត៌មាន​ដ៏​សំខាន់​មួយ​សម្រាប់​ពិភពលោក​ថា ក្រុម​អ្នកស្រាវជ្រាវ​វេជ្ជសាស្ត្រ​យោធា​របស់​ចិន រកឃើញ​វ៉ាក់សាំង​នៃ​វីរុស​កូវី​ដ​-១៩ បាន​យ៉ាង​ជោគជ័យ​ហើយ​។ ការប្រកាស​ព័ត៌មាន​នេះដែរ ធ្វើឡើង​តាមរយ​:​ទំព័រ​ហ្វេ​សប៊ុក​របស់​ស្ថានទូត​ចិន​ប្រចាំ​កម្ពុជា​។​

​តាមរយ​:​ការប្រកាស​របស់​ទូត​ចិន​បញ្ជាក់ថា ក្រុម​ស្រាវជ្រាវ​វិទ្យាសាស្ត្រ​ដែល​ដឹកនាំ​ដោយ​លោកស្រី​Chen Wei អ្នកជំនាញ​ផ្នែក​កិច្ចការ​ស្រាវជ្រាវ​វេជ្ជសាស្ត្រ​យោធា នៃ​វិទ្យាស្ថាន​វិទ្យាសាស្ត្រ​យោធា ប្រទេស​ចិន បាន​ស្រាវជ្រាវ​រកឃើញ​វ៉ាក់សាំង​នៃ​ជំងឺ​បង្កឡើង​ដោយ​វីរុស​កូវី​ដ​-១៩​យ៉ាង​ជោគជ័យ​។ វ៉ាក់សាំង​ប្រភេទ​នេះ ទទួលបាន​ការអនុញ្ញាត ក្នុង​ដំណើរការ​ពិសោធ​ព្យាបាល​ជំងឺ​។ 

​ជាមួយគ្នា​នោះ ទូត​ចិន​បញ្ជាក់ទៀតថា តាម​ស្តង់ដា​កំណត់​នៃ​អន្តរជាតិ និង​តាម​បទបញ្ញត្តិ​ក្នុងប្រទេស​ចិន វ៉ាក់សាំង​នេះ ត្រូវបាន​ចាត់ជា​កិច្ចការ​រៀបចំ​បឋម ដែល​ប្រកបដោយ​សុវត្ថិភាព ប្រសិទ្ធភាព គុណភាព​ដែល​អាច​គ្រប់គ្រង​បាន និង​ការផលិត​ក្នុង​ទ្រង់ទ្រាយ​ធំ​។ 

​សូម​ជម្រាបជូន​ថា គិត​ត្រឹម​រសៀល​ថ្ងៃទី​១៨ ខែ​មីនា ឆ្នាំ​២០២០​នេះ ចំនួន​មនុស្ស​ដែល​បាន​ឆ្លង​វីរុស​កូវី​ដ​-១៩​នេះ បាន​កើនឡើង​ជិត​២០​ម៉ឺន​នាក់​ហើយ ជិត​៨​ពាន់​នាក់​បាន​ស្លាប់ និង​ជិត​៨​ម៉ឺន​នាក់​ទៀត​បាន​ជាសះស្បើយ នៅ​ទូទាំង​សកលលោក​។ វីរុស​កូវី​ដ​-១៩​នេះ​បាន​វាយលុក​ចូលដល់​ប្រទេស និង​ដែនដី​ជាង​១៦០​ប្រទេស​នៅ​ទូទាំង​សកលលោក ពោល​បាន​សាយភាយ​ពាសពេញ​ទ្វីប​ទាំងអស់​លើ​ភពផែនដី លើកលែងតែ​ទ្វីប​ទឹកកក​អង់តាក់ទិក​១​ប៉ុណ្ណោះ​។ 

​សូមបញ្ជាក់​ផងដែ​រថា សម្រាប់​ប្រទេស​កម្ពុជា​វិញ​គិត​ត្រឹម​ព្រឹក​ថ្ងៃទី​១៨ ខែ​មីនា ឆ្នាំ​២០២០​នេះ ក៏មាន​អ្នក​ឆ្លង​វីរុស​កូវី​ដ​-១៩​នេះ កើនឡើង​រហូតដល់​៣៥​នាក់​៕

ព័ត៌មានផ្សេងទៀត