អាមេរិក​​យក​វ៉ាក់សាំង​​ប្រឆាំង​​វីរុស​​កូរ៉ូណា​​ធ្វើតេស្ដ​លើកដំ​បូង​លើ​​មនុស្ស​​

17-03-2020 10:00 am 598

សហរដ្ឋអាមេរិក​បាន​យក​វ៉ាក់សាំង​ប្រឆាំង​វីរុស​កូរ៉ូ​ណាឬកូវី​ដ​-១៩ ទៅ​ចាក់​ធ្វើតេស្ដ​សាកល្បង​លើ​មនុស្ស​លើកដំបូង​ហើយ​។ នេះ​បើតាម​ការបញ្ជាក់​ពី​មន្ដ្រី​អាមេរិក​កាលពី​ថ្ងៃ​ចន្ទ​។ ដំណើរការ​នេះ​បាន​ក្លាយជា​ក្ដីសង្ឃឹម​មួយ​សម្រាប់​ពិភពលោក ក្នុង​ការប្រយុទ្ធប្រឆាំង​វីរុស​កូរ៉ូណា​ដែល​កំពុង​រាតត្បាត​ស្ទើរពេ​ញ​ពិភពលោក​។ ប៉ុន្ដែ​ទោះបីជា​មានការ​ធ្វើតេស្ដ​លើ​មនុស្ស​នៅពេលនេះ យ៉ាងហោចណាស់​ក៏ត្រូវ​ចំណាយពេល​ដល់​១៨​ខែ​ទៀត​ដែរ ទើប​វ៉ាក់សាំង​អាច​ដាក់ឲ្យ​ប្រើប្រាស់​ជា​សាធារណៈ​បាន មានន័យថា​ត្រូវ​ឆ្លងកាត់​ការពិសោធ​ច្រើន​ដំណាក់កាល​ទៀត​។​

​វ៉ាក់សាំង​នេះ​មាន​ឈ្មោះថា​mRNA-1273 ស្រាវជ្រាវ​និង​បង្កើតឡើង​ដោយ​អ្នកវិទ្យាសាស្ដ្រ​នៃ​វិទ្យាស្ថាន​សុខភាព​ជាតិ និង​សហការី​នៅ​ក្រុមហ៊ុន​ជីវ​បច្ចេកវិទ្យា​Moderna​។ ការពិសោធ​នឹង​ធ្វើឡើង​ទៅលើ​មនុស្ស​ស្ម័គ្រចិត្ដ​ដែលមាន​សុខភាព​ល្អ​ចំនួន​៤៥​នាក់ អាយុ​ចន្លោះ​ពី​១៨​ដល់​៥៥​ឆ្នាំ ក្នុង​រយៈពេល​៦​សប្ដាហ៍​រៀបចំ​តាម​ដំណាក់កាល​។  

​តាម​ការបញ្ជាក់​ពី​លោក​វេជ្ជបណ្ឌិត​John Tregoning អ្នកជំនាញ​ផ្នែក​ជំងឺឆ្លង​ទៅ​មហាវិទ្យាល័យ​Imperial​ក្នុង​ទីក្រុង​ឡុង​ដ៍​ចក្រភព​អង់គ្លេស វ៉ាក់សាំង​នេះ​ត្រូវបាន​បង្កើតឡើង​តាម​ស្ដង់ដា​ខ្ពស់​ណាស់ ប្រើប្រាស់​សារធាតុ​ដែល​ដឹង​មុន​ថា​មាន​សុវត្ថិភាព​សម្រាប់​មនុស្ស​។ ចំពោះ​អ្នក​ដែល​ចូលរួម​ក្នុង​ការសាកល្បង​ក៏មាន​ការត្រួតពិនិត្យ​យ៉ាង​ល្អិតល្អន់​បំផុត​។ លោក​សង្កត់ធ្ងន់ថា​ការពិសោធ​ពិតណាស់ថា​វា​លឿន ប៉ុន្ដែ​វា​ជាការ​ប្រណាំងប្រជែង​ប្រឆាំងនឹង​វីរុស មិនមែន​ប្រឆាំងនឹង​អ្នកវិទ្យាសាស្ដ្រ​ដូចគ្នា​ទេ​។ ម្យ៉ាង​នេះ​គឺជា​រឿង​ដែល​ត្រូវធ្វើ​ដើម្បី​ជា​ប្រយោជន៍​សម្រាប់​មនុស្សជាតិ​។​

​ចំពោះ​ប្រធានាធិបតី​អាមេរិក​លោក​ដូណាល់ ត្រាំ បាន​ថ្លែង​ក្នុង​សន្និសីទកាសែត​ថា លោក​សូម​កោតសរសើរ​ដែល​ការស្រាវជ្រាវ​ដំណើរការ​យ៉ាង​ឆាប់រហ័ស​។ គួរបញ្ជាក់​ផងដែ​រថា កន្លងមក​អ្នកជំនាញ​ចិន​ធ្លាប់​បានប្រកាស​ពី​ថ្នាំ​ដែលមាន​ប្រសិទ្ធភាព​ខ្ពស់​ក្នុង​ការប្រឆាំង​វីរុស​កូរ៉ូណា ក្នុងនោះ​មាន​ថ្នាំ​ប្រឆាំង​ជំងឺគ្រុនចាញ់​ជាដើម ប៉ុន្ដែ​រហូត​មកដល់ពេលនេះ​នៅ​ពុំទាន់​មាន​ប្រភេទ​ថ្នាំ ឬ​វ៉ាក់សាំង​ណាមួយ​ត្រូវ​បានដាក់ឲ្យ​ប្រើប្រាស់​ជា​សាធារណៈ​នោះទេ ដោយ​អ្នកវិទ្យាសាស្ដ្រ​ជាច្រើន​ក្រុម​កំពុង​សិក្សា​ស្រាវជ្រាវ​៕

ព័ត៌មានផ្សេងទៀត