កម្ពុជា​-​ចិន​នឹង​ធ្វើ​សមយុទ្ធ​រួម​គ្នា​រយៈពេល ១៩​ថ្ងៃ​នៅ​លើ​ទឹកដី​ខេត្ត​កំពត​

13-03-2020 3:22 pm 197

​ទោះបីជា​វីរុស​កូរ៉ូណា​កំពុង​រាតត្បាត​ស្ទើរតែ​ទូទាំង​ប្រទេស​នៅ​លើ​ពិភពលោក​ក៏ដោយ តែ​កម្ពុជា​និង​ចិន​នៅ​តែ​រៀបចំ​ធ្វើ​សមយុទ្ធ​រួមគ្នា ដើម្បី​ដកស្រង់​បទពិសោធន៍​គ្នា​ទៅវិញទៅមក និង​បង្កើន​សមត្ថភាព​។​
​សមយុទ្ធ​នាគ​មាស ឆ្នាំ​២០២០​រវាង​កងយោធពល​ខេមរភូមិន្ទ​កម្ពុជា និង​កងទ័ព​រំដោះប្រជាជន​ចិន នឹង​ចាប់ផ្តើម​ឡើង​ចាប់ពី​ថ្ងៃ​ទី​១៤ ខែ​មីនា ដល់​ថ្ងៃ​ទី​១ ខែ​មេសា ឆ្នាំ​២០២០​នៅ​សាលា​ហ្វឹកហ្វឺន​តេជោ​សែន​ជុំ​គិរី នៃ​កងពល​តូច​លេខ​៧០ ស្រុក​ជុំ​គិរី ខេត្ត​កំពត ក្រោម​ប្រធានបទ​«​រួម​គ្នា​ប្រឆាំង​ភេរវកម្ម និង​ការងារ​មនុស្សធម៌​កម្ពុជា​-​ចិន​»​។​

​ពាក់ព័ន្ធ​ទៅនឹង​ការរៀបចំ​ធ្វើ​សមយុទ្ធ​នេះដែរ កន្លង​មក​អ្នកស្រី​ឱ វណ្ណឌី​ន អ្នកនាំពាក្យ​ក្រសួង​សុខាភិបាល​កម្ពុជា ធ្លាប់បាន​លើកឡើង​នៅក្នុង​សន្និសីទ​សារព័ត៌មាន​កាល​ពី​ល្ងាច​ថ្ងៃ​ទី​៧ ខែ​មីនា​ថា ក្រសួង​សុខាភិបាល​នឹង​សហការគ្នា​ជាមួយ​ស្ថាប័ន​ពាក់ព័ន្ធ ដើម្បី​ត្រួតពិនិត្យ​កំដៅ​របស់​កងទ័ព​ចិន ហើយ​នឹង​មាន​ការ​រៀប​ចំ​បំពេញ​នូវ​ទម្រង់​បែបបទ​ប្រកាស​ព័ត៌មាន​ពី​សុខភាព​របស់​ពួកគាត់ ព្រមទាំង​មាន​ការតាមដាន​សុខភាព និង​ណែនាំ​ដល់​អ្នក​ដែល​ទទួលខុសត្រូវ លើ​កិច្ចការ​នេះ​ផង​ដែរ ។​

​សូម​ជម្រាប​ជូន​ដែរ​ថា សមយុទ្ធ​នាគ​មាស​នៅក្នុង​ឆ្នាំ​២០២០​នេះ នឹង​មាន​កម្លាំង​ចូលរួម​ជាង ៣​ពាន់​នាក់ ដែល​ក្នុងនោះ​ភាគី​ចិន មាន​កងទ័ព​ចូលរួម​សរុប​ចំនួន ២៦៥​នាក់ ចំណែក​ភាគី​កម្ពុជា មាន​កម្លាំង​ចូលរួម​២,៨៧១​នាក់​។ រីឯ​គ្រឿង​យុទ្ធភណ្ឌ​សម្រាប់​បំពាក់​ឱ្យ​សមយុទ្ធ​នេះ មានដូចជា​ឧទ្ធម្ភាចក្រ កាំភ្លើង​ធំ រថក្រោះ រថពាសដែក កាំភ្លើង​ត្បាល់ អាវុធ​ធុន​ស្រាល និង​បរិក្ខា​យោធា​មួយចំនួនទៀត​ជាដើម​។​

​គួរ​កត់សម្គាល់​ដែរ​ថា សមយុទ្ធ​នាគ​មាស​នេះ នៅតែ​បន្ត​ផ្តោត​សំខាន់​លើ​ការប្រឆាំង​ភេ​វរ​កម្ម និង​ការងារ​មនុស្សធម៌ ដែល​ជា​ឱកាស សម្រាប់​កងទ័ព​ប្រទេស​ទាំង​២ កម្ពុជា​-​ចិន បន្ត​សិក្សា​រៀនសូត្រ ដក​បទពិសោធន៍​គ្នា​ទៅវិញទៅមក ដើម្បី​បង្កើន​សមត្ថភាព​វិជ្ជាជីវៈ ក្នុង​ជួយសង្គ្រោះ​ប្រជាពលរដ្ឋ​ពេល​មាន​គ្រោះមហន្តរាយ ការរក្សា​សន្តិភាព ក៏ដូចជា​សម្រាប់​ការបំពេញ​ភារកិច្ច​ការ​ពារ​ជាតិ ឲ្យ​កាន់តែ​មាន​ប្រសិទ្ធិភាព និង​ខ្លាំងក្លា​ថែម​ទៀត​។​

​សូម​បញ្ជាក់​ដែរ​ថា នេះ​ជា​លើក​ទី ៤​ហើយ ដែល​កងទ័ព​កម្ពុជា​-​ចិន ធ្វើ​លំ​ហាត់​នាគ​មាស​រួមគ្នា នៅក្នុង​ព្រះរាជាណាចក្រ​កម្ពុជា ដោយ​លើក​ទី​១ ធ្វើឡើង​នៅ​ឆ្នាំ​២០១៦ និង​លើក​ទី​២ នៅ​ឆ្នាំ​២០១៨ លើក​ទី​៣​នៅ​ឆ្នាំ​២០១៩​។ ចំណែក​លទ្ធភាព​នៃ​ការធ្វើ​សមយុទ្ធ​ក៏​កាន់តែ​ធំ​ឡើង​ពី​មួយ​ឆ្នាំ​ទៅ​មួយ​ឆ្នាំ​ដែរ​៕

ព័ត៌មានផ្សេងទៀត