អាមេរិក​ចាប់ផ្តើម​ដកទ័ព​ចេញពី​ប្រទេស​អា​ហ្វ​ហ្គានី​ស្ថាន​

11-03-2020 10:43 am 177

​អាមេរិក​បានចាប់ផ្តើម​ដក​កងទ័ព ចេញពី​ប្រទេស​អា​ហ្វ​ហ្គានី​ស្ថាន ក្នុងដំណាក់កាល​ដំបូង​នៅ​ថ្ងៃ​ចន្ទ ដើម​សប្តាហ៍​នេះ ដែលជា​ផ្នែក​មួយ​នៃ​កិច្ចព្រមព្រៀង​សន្តិភាព សម្រាប់​ប្រទេស​អា​ហ្វ​ហ្គានី​ស្ថាន​។ កិច្ចព្រមព្រៀង​សន្តិភាព ដែល​ចុះហត្ថលេខា​រវាង​អាមេរិក​និង​ក្រុម​តា​លី​បង់ កាលពី​ថ្ងៃទី​២៩​ខែកុម្ភៈ​ឆ្នាំ​២០២០ មានចែង​លក្ខខណ្ឌ​មួយចំនួន​។ នៅ​ក្នុងនោះ អាមេរិក​យល់ព្រម​បន្ថយ​ទ័ព​ដែល​បច្ចុប្បន្ន​មាន​ចំនួន​ប្រហែល​១២,០០០​នាក់ នៅក្នុង​ប្រទេស​អា​ហ្វ​ហ្គានី​ស្ថាន ដោយ​រក្សាទុក​តែ​៨,៦០០​នាក់​ប៉ុណ្ណោះ ហើយ​ការ​ដកទ័ព​ត្រូវធ្វើឡើង​ជា​ដំណាក់កាល ក្នុង​រយៈពេល​១៣៥​ថ្ងៃ រាប់​ចាប់តាំងពី​ថ្ងៃ​ចុះហត្ថលេខា​។ ចំណែក​ក្រុម​តា​លី​បង់​វិញ បាន​យល់ព្រម​បញ្ឈប់​ការវាយប្រហារ និង​បញ្ឈប់​ការអនុញ្ញាតឲ្យ​ក្រុម​សកម្មប្រយុទ្ធ​អាល់កៃ​ដា និង​ក្រុម​សកម្មប្រយុទ្ធ​ដទៃទៀត ធ្វើ​ប្រតិបត្តិការ​នៅ​តំបន់​ដែល​ពួកគេ​កាន់កាប់​។​

​បន្ទាប់ពី​អាមេរិក​និង​ក្រុម​តា​លី​បង់ រកបាន​កិច្ចព្រមព្រៀង​សន្តិភាព​ជា​ប្រវត្តិសាស្ត្រ ដើម្បី​បញ្ចប់​ជម្លោះ​១៨​ឆ្នាំ ក្នុងប្រទេស​អា​ហ្វ​ហ្គានី​ស្ថាន​បានហើយ គឺ​ដល់​វេន​ដែល​តំណាង​រដ្ឋាភិបាល​អា​ហ្វ​ហ្គានី​ស្ថាននិង​ក្រុមតា​លីបង់ ត្រូវ​ចរចា​ដាច់ដោយឡែក​ជាមួយគ្នា​ម្តង​។ តាម​គម្រោង​ភាគី​ទាំងពីរ ចាប់ផ្តើម​ពិភាក្សា​នៅ​ថ្ងៃ​អង្គារ​សប្តាហ៍​នេះ ប៉ុន្តែ​ត្រូវ​ពន្យា​ពេល​ដោយសារតែ​ការខ្វែងគំនិត​គ្នា លើ​លក្ខខណ្ឌ​នៃ​ការចរចា​។ ខ្វែងគំនិត​គ្នា​ត្រង់​ថា ក្រុម​តា​លី​បង់​ចង់ឲ្យ​អា​ហ្វ​ហ្គានី​ស្ថាន​ដោះលែង​អ្នកទោស​ដែលជា​គ្នីគ្នា​ពួកគេ​មុន​ចរចា តែ​អា​ហ្វ​ហ្គានី​ស្ថាន​បដិសេធ​។ 

​យ៉ាងណាក៏ដោយ បន្តិចក្រោយមក ប្រធានាធិបតី​អា​ហ្វ​ហ្គានី​ស្ថាន​លោក Ashraf Ghani បាន​ចុះហត្ថលេខា​លើ​ក្រឹត្យ​មួយ ដោយ​យល់ព្រម​ដោះលែង​អ្នកទោស​តា​លី​បង់​ចំនួន​១,៥០០​នាក់ ក្នុង​រយៈពេល​១៥​ថ្ងៃ ហើយ​ក្នុង​មួយថ្ងៃៗ​ដោះលែង​១០០​នាក់​។ រីឯ​ក្រុម​តា​លី​បង់ ព្រម​ព្រៀម​ដោះលែង​កងទ័ព​អា​ហ្វ​ហ្គានី​ស្ថាន ចំនួន​១០០០​នាក់​វិញ​ផងដែរ​។ ការដោះដូរ​អ្នកទោស​ទៅវិញទៅមក ត្រូវធ្វើឡើង​នៅពេល​ការចរចា​ចាប់ផ្តើម ពោល ចរចា​បណ្តើរ​ដោះលែង​អ្នកទោស​បណ្តើរ​។ លោក Ashraf Ghani បញ្ជាក់ថា ប្រសិនបើ​កិច្ចពិភាក្សា​រីកចម្រើន រដ្ឋាភិបាល​សន្យា​ដោះលែង​អ្នកទោស​តា​លី​បង់​បន្ថែម​ចំនួន ៥០០ នាក់​ទៀត​រៀងរាល់ ២ សប្តាហ៍​ម្តង រហូតដល់​គ្រប់​ចំនួន ៥,០០០ នាក់​។ នៅក្នុង​ក្រឹត្យ​ដដែល​ប្រធានាធិបតី​តម្រូវឲ្យ​អ្នកទោស​ទាំងអស់ ផ្តល់​ការធានា​ជា​លាយលក្ខណ៍អក្សរ ដើម្បី​កុំ​វិលត្រឡប់​ទៅ​សមរភូមិ​វិញ​។ ការដោះលែង​អ្នកទោស​នេះ មាន​គោលបំណង បង្កើត​ការជឿទុកចិត្ត​គ្នា រវាង​ភាគី​ទាំងពីរ ក្នុងន័យ​គាំទ្រ​ការពិភាក្សា ដើម្បី​បញ្ចប់សង្គ្រាម​។​

​សង្គ្រាម​នៅក្នុង​ប្រទេស​អា​ហ្វ​ហ្គានី​ស្ថាន បានអូសបន្លាយ​អស់​រយៈពេល​ជិត​ពីរ​ទសវត្សរ៍​មកហើយ នៅពេល​អាមេរិក​បញ្ជូន​ទ័ព​ទៅ​ទីនោះ ដើម្បី​តាម​ផ្តាច់​ឫសគល់​ក្រុម​ភេរ​វករ ក្រោយ​មាន​ហេតុការណ៍​វាយប្រហារ​ភេរវកម្ម លើ​អគារ​ពាណិជ្ជកម្ម​ក្នុង​ក្រុង​ញូវយ៉ក​សហរដ្ឋអាមេរិក កាលពី​ថ្ងៃទី​១១ ខែ​កញ្ញា ឆ្នាំ​២០០១​។ អាមេរិក​បាន​បញ្ជូន​ទ័ព​ទៅ​ដាក់ពង្រាយ​នៅ​ប្រទេស​អា​ហ្វ​ហ្គានី​ស្ថាន​ជាង​១០​ម៉ឺន​នាក់ តែ​ក្រោយមក កងទ័ព​ភាគច្រើន​បាន​ដកចេញ​មកវិញ និង​ខ្លះ​បាន​ធ្លាក់ខ្លួន​ស្លាប់​៕ 

ព័ត៌មានផ្សេងទៀត