កម្ពុជា​​នឹង​ផ្តល់​ម៉ាស​៣​សែន​​និង​ខោអាវការពារ​វីរុស​​Covid-19ឲ្យ​​ចិន​​​​

25-02-2020 5:32 pm 226

លោក​ឧបនាយករដ្ឋមន្ត្រី​ទៀ បាញ់ រដ្ឋមន្ត្រី​ក្រសួងការពារជាតិ បានឲ្យដឹងថា​ក្រសួង​ការពារជាតិក​ម្ពុ​ជា នឹង​ប្រគល់​ម៉ាស​ចំនួន​៣​សែន​ម៉ាស និង​សំលៀកបំពាក់​ការពារ​ការឆ្លង​មេរោគ​មួយចំនួនទៀត​ទៅ​ក្រសួងការពារជាតិ​ចិន​ដើម្បី​ជួយ​រំលែក​ការលំបាក​ដល់​ប្រជាជន និង​រដ្ឋាភិបាល​ចិន ក្នុង​ការបង្ការ​នូវ មេរោគ កូរ៉ូណា​ថ្មី ឬ Covid-19 ខណៈដែល​ជម្ងឺ​នេះ​កំពុងតែ​រាតត្បាត​ទូទាំង​ពិភពលោក ហើយ​បណ្តាលឲ្យមនុស្ស​រាប់ពាន់នាក់​ស្លាប់ និង​រាប់ម៉ឺន​នាក់​បាន​ឆ្លង​នូវ​មេរោគ​នេះ​។​លោក​ទៀ បាញ់ បាន​ថ្លែង​ដូចនេះ នៅក្នុង​កម្មវិធី​បិទ​វគ្គ​បណ្តុះបណ្តាល និង​ហ្វឹកហ្វឺន​ឆ្នាំ​២០១៩ និង​បើ​កវគ្គ​សិក្សា​ឆ្នាំ​២០២០ និង​ពិធី​កាត់​ខ្សែបូ សម្ពោធ​ដាក់ឲ្យ​ប្រើប្រាស់​អគារសិក្សា​មួយ​ខ្នង នៅ​សាកលវិទ្យាល័យ​ការពារជាតិ នៅ​ថ្ងៃទី​២៥ ខែ​កុម្ភៈ ឆ្នាំ​២០២០។

​នៅក្នុង​ឱកាស​នោះ លោក​រដ្ឋមន្ត្រី​ក្រសួងការពារជាតិ​បានបញ្ជាក់​បន្ថែមថា​៖ «​ដោយសារតែ​យើង​ឃើញ​នូវ​ទុក្ខ​ធុរៈ​របស់​មិត្ត​ចិន គឺមាន​សភាព​ធ្ងន់ធ្ង​រណាស់ ក្រសួង​ការពារជាតិ​យើង​នៅ​ថ្ងៃទី​២៥ ខែ​កុម្ភៈ បាន​ជូនដំណឹង​ទៅ​ស្ថានទូត​ចិន​ប្រចាំ​កម្ពុជា​ហើយ ដោយ​យើង​បានសម្រេច​ប្រមូលបាន​ម៉ាស់​មួយចំនួន ហើយ​បើទោះបីជា​វា​មិន​ច្រើន​សម្រាប់​ប្រទេស​ចិន​មែន​តែ​ចំពោះ​ម៉ាស់​ចំនួន​៣​សែន​នេះ វា​ជា​ទឹកចិត្ត​របស់​យើង​ក្នុង​ការចូលរួម​ជាមួយ​មិត្ត​របស់​យើង​»​។​

​ទន្ទឹមនឹងនោះ​ដែរ លោក​ទៀ បាញ់ ក៏បាន​ដាស់តឿន​ទៅដល់​នាយទាហាន នាយទាហានរង និង​ពលទាហាន​ក្នុង​កង​យោធពលខេមរភូមិន្ទ​ទាំងមូល ត្រូវមាន​ការប្រុងប្រយ័ត្ន​ឲ្យបាន​ខ្ពស់​ក្នុង​ការការពារ ដោយ​ត្រូវមាន​អនាម័យ​ជានិច្ច និង​ត្រូវ​ចូលរួម​សហការ​ជាមួយ​ក្រសួងសុខាភិបាល​ដើម្បី​បង្ការ​និង​ទប់ស្កាត់​នូវ​ជំងឺឆ្លង​Covid-19​នេះ​។ លោក​បន្តថា កន្លងមក ក្រសួងសុខាភិបាល​កម្ពុ​ជា ក៏​ធ្លាប់បាន​ធ្វើ​ការណែនាំ​ពី​វិធានការ​បង្ការ​ជាច្រើន​ទៅ​ប្រជាពលរដ្ឋ​ឲ្យ​ប្រុងប្រយ័​ត្ន ហើយ​ក្នុងនាម ជា​កងទ័ព​ត្រូវ​ចូលរួម​អនុវត្ត​ការណែនាំ​នេះ ឲ្យបាន​ល្អ​ដើម្បី​ការពារ​នូវ​ជំងឺ​នេះ​ផងដែរ​៕

ព័ត៌មានផ្សេងទៀត