គ​.​ជ​.​ប​ចាត់តាំង​មន្ត្រីជាន់ខ្ពស់​២២​រូប​ទៅ​ចូលរួម​វគ្គ​បណ្តុះបណ្តាល​នៅ​ឥណ្ឌា​

03-02-2020 4:33 pm 221
  ស្តាប់
ស្តាប់ជាសំឡេង

​គណៈកម្មាធិការ​ជាតិ​រៀបចំ​ការបោះឆ្នោត (​គ​.​ជ​.​ប​) នៃ​ព្រះរាជាណាចក្រ​កម្ពុជា និង​គណៈកម្មាធិការ​ជាតិ​រៀបចំ​ការបោះឆ្នោត​នៃ​សាធារណរដ្ឋ​ឥណ្ឌា បាន​សហការ​គ្នា​រៀបចំ​វគ្គ​បណ្តុះបណ្តាល​ពិសេស​ស្តីពី​កម្មវិធី​កសាង​សមត្ថភាព​លើ​ការគ្រប់គ្រង​ការបោះឆ្នោត​សម្រាប់​កម្ពុជា ក្រោម​ការឧបត្ថម្ភ​ពី​រដ្ឋាភិបាល​នៃ​ប្រទេស​ឥណ្ឌា​។ នេះ​បើ​យោងតាម​សេចក្ដីប្រកាស​ព័ត៌មាន​របស់​គណៈកម្មាធិកា​រ​ជាតិ​រៀបចំ​ការបោះឆ្នោត ។​

​វគ្គ​បណ្តុះបណ្តាល​ពិសេស​នេះ នឹង​ប្រព្រឹត្តទៅ​នៅ​ទីក្រុង​ញ៉ូ​ដែលី ប្រទេស​ឥណ្ឌា ចាប់ផ្តើម​ពី​ថ្ងៃ​ទី ៣ ដល់​ថ្ងៃ​ទី​២៨ ខែ​កុម្ភៈ ឆ្នាំ​២០២០ ហើយ​មាន​តែ​មន្ត្រី​ជាន់ខ្ពស់ គ​.​ជ​.​ប កម្ពុជា ចំនួន ២២​រូប តែប៉ុណ្ណោះ​ដែល​ត្រូវបាន​ឱ្យ​ចូលរួម​ក្នុង​វគ្គ​បណ្តុះបណ្តាល​នេះ​។​

​ប្រទេស​ឥណ្ឌា​ត្រូវបានគេទទួលស្គាល់​ថា​ជា​ប្រទេស​មាន​លទ្ធិប្រជាធិបតេយ្យ​ធំជាងគេ​នៅលើ​ពិភពលោក ហើយ​អ្នកមាន​សិទ្ធិ​បោះឆ្នោត​ក្នុង​ឆ្នាំ​២០១៩ មាន​ជាង ៩០០​លាន​នាក់​។​

​គ​.​ជ​.​ប យល់ឃើញថា នេះ​គឺជា​ឱកាស​ពិសេស​មួយ ដែល​សិក្ខាកាម​ទាំង ២២​រូប អាច​ដកស្រង់​បទពិសោធន៍​ពី​ប្រទេស​ដែល​មាន​អ្នក​មាន​សិទ្ធិ​បោះ​ឆ្នោត​ដ៏​ច្រើន ស្របពេល​ដែល​កម្ពុជា​កំពុង​ត្រៀម​រៀបចំ​ដំណើរការ​ការពិនិត្យ​បញ្ជី​ឈ្មោះ និង​ការចុះឈ្មោះ​បោះឆ្នោត ឆ្នាំ​២០២០ និង​ការបោះឆ្នោត​សកល​នា​ឆ្នាំ​២០២២​និង​ឆ្នាំ​២០២៣ ហើយក៏​ជា​ឱកាស​ដែល​សិក្ខាកាម​បាន​បង្ហាញ និង​ចែករំលែក​បទពិសោធន៍​របស់​ខ្លួន​អំពី​ការបោះឆ្នោត​នៅ​កម្ពុជា​ផង​ដែរ​។​

​វគ្គ​បណ្តុះបណ្តាល​នេះ​នឹង​ជំរុញ​បន្ថែមទៀត​នូវ​ទំនាក់ទំនង​កាន់តែ​ល្អ​រវាង គ​.​ជ​.​ប នៃ​ព្រះរាជាណាចក្រ​កម្ពុជា និង គ​.​ជ​.​ប នៃ​សាធារណរដ្ឋ​ឥណ្ឌា ក្នុង​ភាព​ជា​ដៃគូ​ដើម្បី​លើកកម្ពស់​ដំណើរការ​លទ្ធិប្រជាធិបតេយ្យ និង​ការបោះឆ្នោត​នៅ​ព្រះរាជាណាចក្រ​កម្ពុជា​៕​

ព័ត៌មានផ្សេងទៀត