ប្រជា​ពលរដ្ឋ​ខ្មែរ​​ក្តុកក្តួល​​ជាថ្មី​នៅ​ថ្ងៃ​​ដង្ហែ​ព្រះ​អដ្ឋិ​​ព្រះករុណា​​ព្រះបាទ​​នរោត្តម​​សីហនុ​

11-07-2014 6:10 pm 2411
ប្រជាពលរដ្ឋកម្ពុជាចូលរួមដង្ហែព្រះអដ្ឋិព្រះករុណាព្រះបរមរតនកោដ្ឋព្រះបាទនរោត្តមសីហនុ

ថ្ងៃទី​១១​កក្កដា ត្រូវ​នឹង​ថ្ងៃ​១៥​កើត ខែ​អាសាឍ ជា​ថ្ងៃ​ទី​ពីរ​នៃ​ព្រះរាជ​ពិធី​ដង្ហែ​ព្រះ​បរម​អដ្ឋិ​ព្រះករុណា​ព្រះបាទ នរោត្តម សីហនុ ព្រះមហា​វីរៈ​ក្សត្រ​ខ្មែរ​។ ​ព្រះរាជ​ពិធី​កាលពី​ព្រឹក​ថ្ងៃ​ដដែល​នោះ បាន​ប្រ​ព្រឹត្ត​ទៅ​ក្រោម​វត្ត​ឥស្សរជន​ជាន់ខ្ពស់ និង​ប្រជាពលរដ្ឋ​ខ្មែរ​យ៉ាង​ច្រើន​កុះករ​ចូលរួម​។ ​ព្រះរាជ​ពិធី​ដង្ហែ​ព្រះ​បរម​អ​ដ្ឋិ ព្រះករុណា​ព្រះមហា​វីរៈ ក្សត្រ មានការ​ហែរ​ហម​យ៉ាង​អធិក​អធ័ម មាន​បារគូ​ថ្វាយ​ស័ង្ខ មាន​គង​ជ័យ និង​ស្គរជ័យ ប្រគំ​ថ្វាយ មាន​សម្លេង​រណ្តំ ធ្វើឲ្យ​អ្នកចូលរួម​ហែហម មាន​អារម្មណ៍​ក្តុកក្តួល​ឥតឧបមា​។​

 

​ចង់ដឹងថា ប្រជាពលរដ្ឋ​ដែល​ចូលរួម​ដង្ហែ​ព្រះ​បរម​អដ្ឋិ​របស់​ព្រះករុណា ព្រះ​បរម​រតន​កោដ្ឋ ព្រះវររាជបិតា​ជាតិ​ខ្មែរ​មាន​អារម្មណ៍​យ៉ាងណា​? ជា​បន្ត​សូម​ប្រិយមិត្ត​ស្តាប់​បទ​យកការណ៍​ដែល​រៀបចំ​ដោយ អ៊ុន សុខ​ឡា​ដូចតទៅ​៖

 

សម្លេង​​ផ្លេង​ស្គ​រជ័យ៖

សំ​ម្លេង​បា​រគូ​ថ្វាយ​ស័ង្ខ ភ្លេង​ទាំងអស់​មាន​គង​ជ័យ និង​ស្គរជ័យ ប្រគំ​ថ្វាយ ត្រូវបាន​បន្លឺ យ៉ាង​កងរំពង តាមផ្លូវ​ដង្ហែ​ព្រះ​បរម​រតន​កោដ្ឋ​។ ​ពោល​គឺ​ព័ទ្ធជុំវិញ​ព្រះបរមរាជវាំង  តាម​មហាវិថី​សម្តេច​សុធារស មហាវិថី​សម្តេចព្រះ​ធម្មលិខិត​អ៊ុក តា​មហាវិថី​ព្រះ​នរោត្តម រហូត​ដល់​ព្រះ​ឧបោសថរតនារាម ព្រះ​កែវ​មរកត​។

 

​អម​ដោយ​អ្នក​ចូលរួមបាន​ដើរ​ដង្ហែ គ្រង​ដោយ​សំលៀក​បំពាក់ព៌​ណស លាយ​ខ្មៅ អ្នកខ្លះ​បាន​កាន់​ព្រះ​ឆ័យ​លក្ខណ៍ របស់​ព្រះករុណា​ព្រះបាទ នរោត្តម សីហនុ ព្រះវររាជបិតា​ជាតិ​ខ្មែរ និង​ខ្លះទៀតបាន​កាន់​​ផ្កា​ផ្ញី បោះ​ជំហាន​ដើរ​សន្សឹមៗ ​ស្របតាមសម្លេង​ភ្លេង​ដែល​បាន​ប្រគុំ​ដង្ហែ​ថ្វាយ​។​

 

ដោយឡែក​តាម​ដងផ្លូវ​ដែល​ដង្ហែ​ព្រះ​អដ្ឋិ​ព្រះករុណា ត្រូវបាន​គេ​ប្រទះ​ឃើញ​មាន​ប្រជាពលរដ្ឋ​មួយចំនួន ​អង្គុយ​លើកដៃ​ប្រណព្យ​ទាំង​ទឹកមុខ​ស្រពាប់​ស្រពោន លាយឡំ​អារម្ភ ក្តុកក្តួល​ពន់ពេក​។​ លោក​​​យាយ​ណ​យ ស្លៀកសំពត់​ពណ៍​ខ្មៅ អាវ​ពណ៌​ស គ្រង​ក្រ​ម៉ា​ពានា​ពណ៌​ស មាន​ជន្មាយុ​ជិត​៧០​វស្សាបាន​ខ្នះខ្នែង ធ្វើដំណើរ​តាំងពី​ខេត្ត​កណ្តាល មក​ភ្នំពេញដើម្បី​ចូលរួម​ពិធី​ដង្ហែ​ព្រះ​អដ្ឋិ​។​ ទោះ​បីជា​លោកយាយ​មិន​មាន​កម្លាំង​ដើរ​ដង្ហែ​ព្រះ​បរម​អដ្ឋិ​ព្រះករុណាក៏ដោយ ​ប៉ុន្តែ​លោកយាយ​បានអង្គុយ​ប្រណព្យ មុខ​ព្រះបរមរាជវាំងតាំងពី​ព្រឹក​ព្រលឹម​។​

 

លោកយាយ ណ​យ៖

 

ដោយសារតែ​ជីវភាព​ខ្វះខាត​ និង​ការគោរព​ស្រឡាញ់​ព្រះករុណា អ្នក​មីង សន ចន្ថា​បាន​ធ្វើដំណើរ​ដោយ​ថ្មើរជើង ពី​ទួល​សង្កែ​តាំង​ពី​មាន់រងាវ ដើម្បី​​មក​ឲ្យទាន់​ពិធីដង្ហែ​ព្រះ​បរមអ​ដ្ឋិ​ព្រះ បរម​រតន​កោដ្ឋ​។ អ្នក​មីង​បានបង្ហាញ​ពី​អារម្មណ៍ ដែល​បាន​ចូលរួម​នៅក្នុង​កម្មវិធីដង្ហែ​ព្រះ​អ​ដ្ឋិថា ដោយសារតែ​ការ​នឹករលឹក សោកស្តាយ​ព្រះករុណា ទើប​ជម្រុញ​អ្នក​មីង​រូតរះ​ដើរ​មក​តែម្តង​៖

 

អ្នក​មីង សន សន្ថា​៖

 

​ក្រោយ​ពី​ពិធី​ដង្ហែ ព្រះ​បរម​អដ្ឋិ​ព្រះករុណា​បាន​ដង្ហែ​មកដល់ ព្រះបរមរាជវាំង អ្នក​មីង ស៊ី​មួន បាន​អង្គុយ​ប្រណព្យ​ទាំង​កណ្តាល​ថ្ងៃ នៅ​មុខ​ព្រះបរមរាជវាំង​។ ​ដៃ​លើក​ប្រណព្យបណ្តើរ អ្នក​មី​ស៊ី​មួន​បាន​ផ្តល់​បទសម្ភាសន៍​បណ្តើរ​ថា ​នៅ​ថ្ងៃ​ដង្ហែ​ព្រះ​អដ្ឋិ​ព្រះករុណា​ថ្ងៃនេះ អ្នក​មីង​បានមក​អង្គុយ​បួងសួង សុំ​ឲ្យ​ដួងព្រះ​វិញ្ញាណក្ខន្ធ ព្រះអង្គ​តាម​បីបាច់​ថែរក្សា កូនចៅ​ដូចដែល​ព្រះអង្គ​នៅ​មាន​ជីវិត​៖

​អ្នក​មីង ស៊ី​មួន​៖

​ដោយសារតែ​ថ្ងៃ​ប្រារ​ពពី​ធី​បូជា​ព្រះ​ម​រម​សព ព្រះករុណា ព្រះបាទ​នរោត្តម​ សីហនុមិនបាន​ចូលរួម ​ប៉ុន្តែ​នៅ​ថ្ងៃ​ប្រា​រព​ពិធី​ដង្ហែ​ព្រះ​អដ្ឋិ​ព្រះករុណា អ្នក​មីង សានបាន​ធ្វើដំណើរ​តាំងពី​ខេត្តសៀមរាប​មក​ដល់​ភ្នំពេញ។

 

អ្នក​មីង​បានបង្ហាញ​អារម្មណ៍​ចេញពី​ដួង​ហទ័យ​អ្នក​មីង​ថា អ្នក​មីង​មាន​អារម្មណ៍​រំភើប​ខ្លាំងណាស់​ ដែល​បាន​មក​ចូលរួម​ពិធី​ដង្ហែ ព្រះ​បរម​អដ្ឋិ​ព្រះករុណា ព្រះបាទ​សម្តេចព្រះ​នរោត្តម​សីហនុ​។ ​មាន​អា​រម្មណ៍​រំភើប ដោយសារ​តែ​អ្នក​មីង​ចាត់ទុក​ព្រះករុណា ជា​ជាតិ​របស់​ខ្មែរ ជា​អ្នកគ្រប់គ្រង ប្រទេស​ប្រកបដោយ​សុខដុម​រម្យ​នា​៖

 

​អ្នក​មីង សាន​៖

 

​នៅ​ក្រោម​ម្លប់​ដើម​ពោធិ៍ មុខ​ព្រះបរមរាជវាំង​ពោ​ពេញ​ដោយ​មនុស្សម្នារ​ច្រើន​កុះករ សុទ្ធតែ​អ្នកចូលរួម​ពិធី​ដង្ហែ​ព្រះ​អដ្ឋិ​។ នៅ​ទី​ដែល​ពោ​ពេញ​ទៅ​ដោយ​មនុស្សម្នា ខ្ញុំ​ក្រឡេកឃើញលោកយាយ​ម្នាក់​កំ​ពុង​អង្គុយ​បត់​ជើង​លើកដៃ​ប្រណព្យ ​លាយឡំ​ទឹកមុខ​ស្រពាប់​ស្រពោន​ នោះ​គឺ​លោកយាយ​យឺន បាន​ស្វះស្វែង​មកពី​ស្រុក​បសេដ្ឋ ខេត្ត​កំពង់ស្ពឺ ដើម្បី​ចូលរួម​ពិធី​ដង្ហែ​ព្រះ​អដ្ឋិ​ព្រះករុណា ព្រះ​បរម​រតន​កោដ្ឋ​។​ លោកយាយ​បាន​និយាយ​ទាំង​ទឹកភ្នែក​រលីងរលោង ​ធ្លាក់​លើ​ថ្ពាល់​របស់​លោកយាយ​ ព្រម​ជាមួយ​ពាក្រ​សម្តី​អាឡោះអាល័យ​ព្រះករុណា​ថា​៖

 

លោកយាយ​​ យឺន​៖

 

​ជា​ការកត់សំគាល់​ព្រះរាជ​ពិធី​ដង្ហែ និង​តំកល់​ព្រះ​បរម​អដ្ឋិ​ព្រះករុណា ព្រះបាទ​សម្តេចព្រះ​នរោត្តម​សីហនុ ព្រះ​បរម​រតន​កោដ្ឋ ព្រះវររាជបិតា​ជាតិ​ខ្មែរ ព្រះមហា​វារ​ក្សត្រ​នៃ​ព្រះរាជាណាចក្រ​កម្ពុជា បាន​ប្រព្រឹត្តទៅ​ដោយ​អធឹកអធ័ម​ ក្រោម​វត្តមាន​ចូលរួម​ពី​មន្ត្រីរាជការ​នាម៉ឺន​សព្វ​មុខ​ន្ត្រី​គ្រប់​ក្រសួង​មន្ទីរ ​(​ទាហាន​-​ស៊ីវិល​) ​មន្ត្រីកិត្តិយស​នៅខាងមុខ​ព្រះបរមរាជវាំង​ និង​នៅខាងមុខ​ព្រះទីនាំង​ទេ​វា​វិនិច្ឆ័យ​។

 

​រួម​ទាំង​ការអញ្ជើញ​មក​ដល់​ ពី​សំណាក់​ព្រះរាជវង្សានុវង្ស​រួម​ នឹង​មន្ត្រី​ថ្នាក់ដឹកនាំ​រដ្ឋាភិបាល​ផងដែរ​។ ព្រះរាជ​ពិធី​ដង្ហែ និង​តំ​ដល់​ព្រ​អដ្ឋិ​ព្រះករុណា​ព្រះ​បរម​រតន​កោដ្ឋ នៅ​ថ្ងៃ​ទី​១១​កក្កដា​នេះ បាន​ធ្វើឲ្យ​អារម្មណ៍​ប្រជាជន​កម្ពុជា​ក្តុកក្តួល​សារជាថ្មី ខណៈ​ក្តី​សង្វែក​ទាំងនោះ​ធ្លាប់​កើតមាន​ម្តង​រួចមកហើយ កាល​ពី​ព្រះអង្គសោយ​ទីវង្គត​កាលពី ថ្ងៃទី​១៥​ ខែតុលា ​ឆ្នាំ​២០១២​កន្លងទៅ​៕

ព័ត៌មានផ្សេងទៀត