លោក​សុខ ឥសាន​ ប្រាប់​បរទេស​​ឲ្យ​ឈប់​លូកដៃ​​កកូរកកាយ​​ផ្ទៃក្នុង​​កម្ពុជា​ទៀត​

16-01-2019 3:12 pm 1198
  ស្តាប់
ស្តាប់ជាសំឡេង

​ថ្លែង​ជា​សាធារណៈ​តាមរយៈ​បណ្តាញ​តេ​ឡេ​ក្រាម អ្នកនាំពាក្យ​គណបក្ស​ប្រជាជន​កម្ពុជា លោក​សុខ ឥសាន បាន​លើកឡើងថា ទម្រាំ​មាន​ថ្ងៃនេះ កម្ពុជា​បាន​ឆ្លងកាត់​ដំណាក់កាល​ប្រវត្តិសាស្ត្រ​ដ៏​ជូរចត់​ជាច្រើន តាមរយៈ​ការ​លូកដៃ​របស់​បរទេស​ចូល​កិច្ចការ​ផ្ទៃក្នុង​កម្ពុជា​។ លោក​ថា នៅ​ទសវត្សរ៍​ឆ្នាំ​៧០ ពួកគេ​មក​បង្កើត​សង្គ្រាម​៥​ឆ្នាំ​នៅ​កម្ពុជា ទម្លាក់​គ្រាប់បែក​រាប់លាន​តោន ធ្វើឲ្យ​ប្រជាជន​កម្ពុជា ស្លាប់​រាប់សែន​នាក់​។ នៅ​ចុង​ទសវត្សរ័​ឆ្នាំ​៧០​គេ​នាំគ្នា​គាំទ្រ និង​ឧបត្ថម្ភ​របប​ខ្មែរក្រហម ឲ្យ​កាប់​សម្លាប់ប្រជាជន​កម្ពុជា​អស់​រាប់លាន​នាក់​ទៀត​។​

​លោក​សុខ ឥសាន​បន្ថែមថា នៅ​ទសវត្សរ៍​ឆ្នាំ​៨០​គេ​នាំគ្នា​ដាក់​ទណ្ឌកម្មសេដ្ឋកិច្ច នយោបាយ​មកលើ​កម្ពុជា ដឹកនាំ​ដោយ​គណបក្ស​ប្រជាជន​កម្ពុជា ដែល​បាន​បូជាជីវិត​ដើម្បី​រំដោះប្រជាជន​ឲ្យ​រួច​ផុតពី​ការកាប់សម្លាប់​នៃ​របប​ប្រល៍យពូជសាស​ន៍​។ លោក​ចំអក​ទៅ​បរទេស ដែល​ព្រមាន​កម្ពុជា ពេលនេះ​ថា កុំ​អាង​អី​ដាក់​សម្ពាធមក​លើ​កម្ពុជា វា​សុំា​សម្រាប់​ប្រជាជន​កម្ពុជា​ទៅហើយ ហើយ​កម្ពុជា​មិន​ស្ថិតនៅ​ជា​ភូមិសាស្ត្រ​នយោបាយ​របស់​ពួក​បរទេស​ណា​ទៀតឡើយ​។ 

​លោក​សុខ ឥសាន ប្រាប់ថា ស្ថិតនៅ​ចំពោះមុខ​ស្ថានភាព​នេះ កម្ពុជា គ្មានអ្វី​ក្រៅពី​ត្រូវខិតខំ​រើបម្រះ​ដើម្បី​រស់​ដោយ​ខ្លួនឯង មិន​ពឹង​លើ​ដង្ហើម​គេ​ទាំងស្រុង​នោះឡើយ​។ ដូច្នេះ បរទេស​ទាំងឡាយ ឈប់​លូកដៃ កកូរកកាយ​ផ្ទៃក្នុង​កម្ពុជា​ទៀត​។ 

​លោក​និយាយថា គោលការណ៍​លទ្ធិប្រជាធិបតេយ្យ និង​នីតិរដ្ឋ​គឺជា​រឿង​ដែល​រដ្ឋាភិបាល​កម្ពុជា​ត្រូវតែ​ពង្រឹង​ដើម្បី​ធានា​រក្សា​សន្តិភាព ស្ថិរភាព​នយោបាយ និង​សុខ​សុវត្ថិភាព​នៅ​កម្ពុជា​។ លោក​បញ្ជាក់ថា បើ​បរទេស​ណា ចង់​មាន​ទំនាក់ទំនង​ល្អ​ជាមួយ​កម្ពុជា ហើយ​ដាក់​លក្ខខណ្ឌ​ថា​ត្រូវតែ​ដោះលែង​លោក​កឹម សុខា ឲ្យ​រួចខ្លួន​នោះ​គឺជា​ការចង់​បង្គាប់បញ្ជា ជាការ​លូកដៃ​ចូល​កិច្ចការ​ផ្ទៃក្នុង​កម្ពុជា និង​ជា​ការរំលោភ​គោលការណ៍​លទ្ធិប្រជាធិបតេយ្យ និង​នីតិរដ្ឋ​នៅ​កម្ពុជា​។​

​ពាក់ព័ន្ធ​នឹង​ការព្រមាន​ដាក់ទណ្ឌកម្ម​មកលើ​កម្ពុ​ជា ក៏​ត្រូវបាន​លើក​ហ៊ុន សែន ថា ល្បែង​គំរាម​ដាក់ទណ្ឌកម្ម​មក​លើក​ប្រទេស​ទន់ខ្សោយ​ពី​ប្រទេស​មានអំណាច ល្មម​ត្រូវ​បញ្ចប់​ហើយ​។ លោក​ហ៊ុន សែន បញ្ជាក់ថា កម្ពុជា​មិន​ចង់​ធ្វើ​សត្រូវ​ជាមួយ​ប្រទេស​ណាមួយ​នោះទេ គឺ​ចង់​ធ្វើ​មិត្តភក្តិ​ជាមួយ​ប្រទេស​ទាំងអស់​នៅលើ​ពិភពលោក​។ ប៉ុន្តែ​លោក​ហ៊ុន សែន អះអាងថា មិន​ខ្លាច​ការដាក់ទណ្ឌកម្ម ពី​សំណាក់​អន្តរជាតិ​នោះទេ​។ ព្រោះ​លោក​ធ្លាប់​ដឹកនាំ​ប្រទេស ក្រោម​ការហ៊ុមព័ទ្ធ​សេដ្ឋកិច្ច​ដ៏​លំបាក​នេះ រួចមកហើយ​។​

​ប្រតិកម្ម​របស់លោក​សុខ ឥសាន ក៏​ដូច​ការ​ថ្លែង​របស់លោក ហ៊ុន សែន ថ្មីៗ​នេះ គឺ​ស្របពេល​ដែល​សហភាព​អឺរ៉ុប កំពុងតែ​រៀបចំ​នីតិវិធី​ដាក់ទណ្ឌកម្ម​លើ​រដ្ឋាភិបាល​កម្ពុជា ដោយ​ផ្តាច់ការ​អនុគ្រោះ​ពន្ធ​EBA ក្នុងករណី​ដែល​រដ្ឋាភិបាល​កម្ពុជា មិន​ស្តារ​លទ្ធិប្រជាធិបតេយ្យ​ឡើងវិញ ដោយ​ដោះលែង​លោក​កឹម សុខា និង​ឲ្យ​គណបក្ស​សង្គ្រោះ​ជាតិ​ដំណើរការ​ឡើងវិញ​ទេនោះ​៕

ព័ត៌មានផ្សេងទៀត