រដ្ឋមន្ដ្រីក្រសួង​កិច្ចការនារី​​ស្នើឲ្យ​ម្ចាស់​ក្រុមហ៊ុន​ទាំងអស់​បន្ដ​ផ្ដល់ឱកាស​ការងារដ​ល់​ស្ដ្រី​​

07-12-2018 12:01 pm

​លោកស្រី អ៊ឹង កន្ថាផាវី រដ្ឋមន្ដ្រីក្រសួង​កិច្ចការនារី បាន​ស្នើឲ្យ​ម្ចាស់​ក្រុមហ៊ុន​ក្នុងស្រុក​ទាំងអស់ បន្ដ​ផ្ដល់ឱកាស​ការងារ​ដល់​ស្ដ្រីខ្មែរ ដែលជា​កន្លែង​ការងារ​មួយ​សមរម្យ និង​មាន​កម្រិត​ខ្ពស់​។ ការស្នើ​នេះ គឺ​បាន​ធ្វើឡើង​ក្នុងឱកាស​ដែល​លោកស្រី​អ៊ឹង កន្ថាផាវី អញ្ជើញ​ចូលរួម​ក្នុង​ពិធី​សម្ពោធ​ហាង​លក់​គ្រឿងអលង្ការ​ម៉ាក PANDORA និង​នាឡិកាដៃ​ម៉ាក BERING នៅ​ផ្សារ​ទំនើប​អ៊ី​អន​២ សែន​សុខ ដែល​នាំចូល​ដោយ​ក្រុមហ៊ុន សាន​ដា​រ៉ា អ៊ិន​ដាស​ស្ទ្រី ឌី​វេឡុ​ប​មេន នា​ថ្ងៃទី​០៦ ខែ​ធ្នូ ឆ្នាំ​២០១៨​។​

​លោកស្រី​អ៊ឹង កន្ថាផាវី បានប្រកាស​ស្វាគមន៍​ចំពោះ​ក្រុមហ៊ុន​សាន​ដា​រ៉ា​អ៊ិន​ដាស​ស្ទ្រី ឌី​វេឡុ​ប​មេន ដែល​បាន​បង្កើត​ការងារ ជូន​ស្ដ្រីខ្មែរ​បន្ថែមទៀត ដោយ​ក្នុងនោះ បច្ចុប្បន្ន​មាន​បុគ្គលិក​ចំនួន​ប្រមាណ​៣០​នាក់ កំពុង​បម្រើ​ការងារ​នៅទីនេះ ដែល​ភាគច្រើន​ជា​ស្ដ្រីខ្មែរ​។ លោកស្រី​បន្ថែមថា ក្នុងនាម​ជា​រាជរដ្ឋាភិបាល លោកស្រី ក៏​សូម​ស្វាគមន៍​ទៅដល់​សហគ្រិន​ខ្មែរ ដែលមាន​ភាព​សកម្ម និង​មានគំនិត​ថ្មី​ក្នុង​ការបង្កើត​ការងារ ជូន​ប្រជាពលរដ្ឋ​ខ្មែរ​ផងដែរ​៕ 

ព័ត៌មានផ្សេងទៀត