កម្ពុជា​និង​ឥណ្ឌូនេស៊ី​​​ឯកភាពគ្នា​វិនិយោគ​​លើ​អ្វីខ្លះ​​ក្នុងជំនួប​ប្រមុខ​ការទូត​?​

06-12-2018 3:46 pm
  ស្តាប់
ស្តាប់ជាសំឡេង

​ក្រសួងការបរទេស​កម្ពុជា តាមរយៈ​សេចក្ដីប្រកាស​ព័ត៌មាន​បានឱ្យដឹងថា ក្នុង​កិច្ច​គណៈកម្មការ​ចម្រុះ​នៃ​កិច្ចសហប្រតិបត្តិការ​ទ្វេភាគី​កម្ពុជា​-​ឥណ្ឌូនេស៊ី កាលពី​ថ្ងៃទី​៤​ធ្នូ រវាង​លោក​ប្រាក់ សុខុន រដ្ឋមន្ត្រីការបរទេស​កម្ពុជា ជាមួយ​រដ្ឋមន្ត្រីការបរទេស​ឥណ្ឌូនេស៊ី អ្នក​ទាំង​ពីរបាន​ឯកភាពគ្នា​ឱ្យមាន​ការពិភាក្សា​ពី​លទ្ធភាព​ក្នុង​ការធ្វើ​វិសោធនកម្ម​នៃ​កិច្ចព្រមព្រៀង​ពាណិជ្ជកម្ម​រវាង​កម្ពុជា និង​ឥណ្ឌូនេស៊ី ដែល​បាន​ចុះហត្ថលេខា​នៅ​ឆ្នាំ​១៩៩៣ ដើម្បី​រួម​បញ្ជូល​ការវិវត្ត​ថ្មីៗ​នៃ​ពាណិជ្ជកម្ម​នៅក្នុង​ប្រទេស​ទាំងពីរ​។​

​សេចក្ដីប្រកាស​ព័ត៌មាន​ដដែល ក៏​បានឱ្យដឹង​ផងដែរ​ថា កិច្ចប្រជុំ​នោះ​ក៏បាន​ឯកភាព​លើកទឹកចិត្ត​ការវិនិយោគ​លើ​ឧស្សាហកម្ម​ថ្នាំពេទ្យ ស៊ីម៉ង់ ជីគីមី កៅស៊ូ អាហារ​កែឆ្នៃ​និង​ឧស្សាហកម្ម​រថយន្ត​។ រដ្ឋមន្ត្រី​ទាំង​ពីរបាន​ស្វាគមន៍​ការកើនឡើង​ការវិនិយោគ​របស់​ឥណ្ឌនេស៊ី​នៅ​កម្ពុជា​ផងដែរ​។ ដោយ​កត់សម្គាល់ឃើញ​ភាព​វិជ្ជមាន​នេះ ភាគី​ឥណ្ឌនេស៊ី ឯកភាព​បន្ត​លើកទឹកចិត្ត​អ្នកវិនិយោគ មក​វិនិយោគ​នៅ​កម្ពុជា បន្ថែមទៀត​។ កិច្ចប្រជុំ​ក៏បាន​ឯកភាព​សម្រួល​ការធ្វើ​ពាណិជ្ជកម្ម​បន្ថែមទៀត​លើ​ផលិតផល​កសិកម្ម និង​ពន្លឿន​កិច្ចពិភាក្សា​លើ​អនុស្សរណៈ​យោគយល់​គ្នា​ស្ដីពី​កិច្ចសហប្រតិបត្តិកា​រលើ​វិស័យ​កសិកម្ម​។​

​សេចក្ដីប្រកាស​ព័ត៌មាន​នេះ ក៏បាន​បញ្ជាក់ថា កិច្ចប្រជុំ​បាន​ជំរុញឱ្យមាន​ការបង្កើន​ការតភ្ជាប់​ផ្លូវអាកាស និង​លើកទឹកចិត្ត​ប្រតិបត្តិ​ករ​អាកាសចរណ៍​ឱ្យធ្វើ​ប្រតិបត្តិ​ការហោះហើរ​ត្រង់​រវាង​ប្រទេស​ទាំងពីរ​កម្ពុជា​-​ឥណ្ឌូនេស៊ី​។ ជាមួយគ្នា​នោះ​ភាគី​ទាំង​ពីរបាន​លើកទឹកចិត្ត​ស្ថាប័ន​ពាក់ព័ន្ធ ឱ្យ​ពិនិត្យឡើងវិញ​លើ​អនុស្សរណៈ​យោគយល់​គ្នា​ស្ដីពី​កិច្ចសហប្រតិបត្តិការ​លើ​វិស័យ​ទេសចរណ៍ ដែល​បាន​ចុះហត្ថលេខា​នៅ​ឆ្នាំ​១៩៩៩ និង​បាន​ស្វាគមន៍​គំនិត​ផ្ដួចផ្ដើម​ពង្រីក​កិច្ចសហប្រតិបត្តិការ​រួម​គ្នា ដើម្បី​ជម្រុញ​ទិដ្ឋភាព​វប្បធម៌​រវាង​កម្ពុជា និង​ឥណ្ឌូនេស៊ី ហើយក៏​បាន​លើកទឹកចិត្ត​ឱ្យមាន​ការបន្ត​សុពលភាព​អនុស្សរណៈ​ស្ដីពី​កិច្ចសហប្រតិបត្តិការ​វប្បធម៌ ដែល​នឹង​ត្រូវអស់​សុពលភាព​នៅ​ថ្ងៃទី​២៦ ខែ​កុម្ភៈ ឆ្នាំ​២០១៩៕

ព័ត៌មានផ្សេងទៀត