ពលរដ្ឋ​កម្ពុជា​នៅ​ប្រទេស​ជប៉ុន​ធ្វើ​បាតុកម្ម​ទាមទា​រលោក ហ៊ុន សែន ចុះចេញ​ពី​តំណែង​

07-10-2018 3:30 pm 7971
  ស្តាប់
សកម្មភាពធ្វើបាតុកម្មរបស់ពលរដ្ឋខ្មែរក្នុងប្រទេសជប៉ុន នៅថ្ងៃទី០៧ ខែតុលា ឆ្នាំ២០១៨។ រូបថត៖ ហ្វេសប៊ុក
ស្តាប់ជាសំឡេង

​ពលរដ្ឋ​កម្ពុជា ដែល​ជា​អ្នកគាំទ្រ​អតីត​គណបក្ស​សង្គ្រោះ​ជាតិ នៅក្នុង​ប្រទេស​ជប៉ុន នៅ​ថ្ងៃ​ទី​០៧ ខែតុលា ឆ្នាំ​២០១៨ បាន​ដង្ហែ​ក្បួន​បាតុកម្ម ប្រឆាំង​វត្តមាន​លោកនាយក​រដ្ឋមន្ត្រី ហ៊ុន សែន និង​ទាមទារ​ឲ្យ​លោក ចុះចេញ​ពី​តំណែង​។ ការធ្វើ​បាតុកម្ម​នេះ​ស្របពេល​ដែល​លោក ហ៊ុន សែន កំពុង​មាន​វត្តមាន​នៅ​ក្នុង​ប្រទេស​ជប៉ុន ដើម្បី​ចូលរួម​កិច្ចប្រជុំ​កំពូល​មេគង្គ​-​ជប៉ុន​លើ​ក​ទី​១០​។

​តាមរយៈ​វីដេអូ​ផ្សាយ​ផ្ទាល់​នៅលើ​បណ្ដាញ​សង្គម ក្រុម​បាតុករ​ដែល​អះអាង​ថា​មាន​គ្នា​៥០០ ទៅ​៦០០​នាក់ បាន​ដើរ​តាម​ផ្លូវ​ក្នុង​ទីក្រុង​តូ​ក្យូ ដោយ​មាន​កាន់​រូបថត​លោកនាយក​រដ្ឋមន្ត្រី ហ៊ុន សែន ទង់ជាតិ​កម្ពុជា និង​ទង់​អតីត​គណបក្ស​សង្គ្រោះ​ជាតិ​ផងដែរ​។ ពួកគេ​បាន​ស្រែក​ទាមទារ​ឲ្យ​លោក ហ៊ុន សែន ចុះចេញ​ពី​តំណែង និង​ថា​ពួកគេ​មិន​ទទួលស្គាល់​លទ្ធផល​បោះឆ្នោត​ដែល​គណបក្ស​ប្រជាជន ក្ដោប​យក​កៅអី​សភា​ទាំង​១២៥​នោះទេ​។​

​នេះ​ជា​លើក​ទី​៣​ហើយ​ដែល​ពលរដ្ឋ​កម្ពុជា​នៅក្នុង​ប្រទេស​ជប៉ុន បាន​នាំគ្នា​ធ្វើ​បាតុកម្ម​បែបនេះ ក៏​ប៉ុន្តែ​ការធ្វើ​បាតុកម្ម​ជា​ថ្មី​នេះ​គឺ​ស្របពេល​ដែល លោក នាយករដ្ឋមន្ត្រី ហ៊ុន សែន កំពុង​មាន​វត្តមាន​នៅ​ក្នុង​ប្រទេស​ជប៉ុន​តែម្ដង​។​

​លោក ហ៊ុន សែន កំពុង​ចូលរួម​កិច្ចប្រជុំ​កំពូល​មេគង្គ​-​ជប៉ុន​លើ​ក​ទី​១០ ចាប់ពី​ថ្ងៃ​ទី​០៦ រហូត​ដល់​ថ្ងៃ​ទី​១០ ខែតុលា ឆ្នាំ​២០១៨ នៅក្នុង​ប្រទេស​ជប៉ុន​។ កិច្ចប្រជុំ​នេះ​គឺជា​កិច្ចសហប្រតិបត្តិកា​ររ​វា​ង​ប្រទេស​ចំនួន​៥ រួមមាន ជប៉ុន កម្ពុជា ឡាវ មី​យ៉ាន់​ម៉ា ថៃ និង​វៀតណាម​។

​ខណៈ​មាន​ការធ្វើ​បាតុកម្ម​នៅតាម​ដងផ្លូវ លោកនាយក​រដ្ឋមន្ត្រី ហ៊ុន សែន នៅ​ព្រឹក​នេះ បាន​អញ្ជើញ​ទៅ​ទស្សនា​មជ្ឈមណ្ឌល​សំអាត​ទឹកលូ ក្នុង​ទីក្រុង​តូ​ក្យូ ព្រមទាំង​បាន​ទៅ​ទស្សនា​កំពង់ផែ​អន្តរជាតិ​យូ​កូហា​ម៉ា នៅក្នុង​ខេត្ត​ខេត្ត​កា​ណាហ្កា​វ៉ា​ផងដែរ​។ នេះ​បើ​តាម​ការ​បង្ហោះ​រូបភាព នៅលើ​ទំព័រ​ហ្វេ​សប៊ុក​របស់លោក​។​

​នៅក្នុង​ដំណើរ​ចូលរួម​កិច្ចប្រជុំ​ក្នុង​ប្រទេស​ជប៉ុន​នេះ​ដែរ លោកនាយក​រដ្ឋមន្ត្រី ហ៊ុន សែន បាន​ផ្ដល់​បទសម្ភាសន៍​ដល់​ទីភ្នាក់ងារ​ព័ត៌មាន​ជប៉ុន Kyodo​។​

​តប​ទៅ​នឹង​សំណួរ​ថា តើ​រដ្ឋាភិបាល​របស់​លោក នឹង​ធ្វើ​បែប​ណា​ទៀត​ដើម្បី​ឆ្ពោះទៅ​រក​គន្លង​ប្រជាធិបតេយ្យ ក្រោយ​ពី​គណបក្ស​ប្រជាជន​កម្ពុជា​របស់​លោក ឈ្នះឆ្នោត​ទាំង​ដែល​គ្មាន​វត្ត​មាន​អតីត​បក្សប្រឆាំង​ចូលរួម កាលពី​ថ្ងៃ​ទី​២៩ ខែកក្កដា កន្លង​ទៅ​នោះ​។​

​លោក ហ៊ុន សែន បាន​ឆ្លើយតប​ថា​៖ «​ខ្ញុំ​តែងតែ​មើល​ប្រទេស​អភិវឌ្ឍ​ជាច្រើន​ក្នុង​តំបន់ និង​ជុំវិញ​ពិភពលោក​។ ដូច្នេះ ខ្ញុំ​អាច​រៀនសូត្រ​ពី​ពួកគេ​ទាំង​ទិដ្ឋភាព​សេដ្ឋកិច្ច និង​នយោបាយ ជាពិសេស​គឺ​ប្រទេស​ជប៉ុន ដែល​មាន​ស្ថិរភាព​នយោបាយ និង​សេដ្ឋកិច្ច​រឹងមាំ និង​ជា​គំរូ​លទ្ធិប្រជាធិបតេយ្យ​ពិតប្រាកដ​»​។​

​គួរបញ្ជាក់​ថា​បាតុកម្ម​ប្រឆាំង​វត្តមាន​លោក ហ៊ុន សែន ក៏​ធ្លាប់​កើតមានឡើង​នៅលើ​ទឹកដី​សហរដ្ឋអាមេរិក ខណៈពេលដែល​លោក​ចេញ​ទៅ​ថ្លៃ​ង​ការណ៍​នៅ​ក្នុង​មហាសន្និបាត​អង្គការសហប្រជាជាតិ កាលពី​ពេល​ថ្មីៗ​នេះ​ផង​ដែរ​។​

​គោលបំណង​នៃ​ការធ្វើ​បាតុកម្ម​ហាក់​មិន​ខុស​គ្នា​នោះ​ទេ គឺ​ក្រុមបាតុករ​បាន​ទាមទារ​កុំឲ្យ​អន្តរជាតិ ទទួលស្គាល់​រដ្ឋាភិបាល ដែល​កើត​ក្រោយ​ការបោះឆ្នោត​ដ៏​ចម្រូងចម្រាស់ ព្រមទាំង​ទាមទារ​ឲ្យ​លោក ហ៊ុន សែន ចុះចេញ​ពី​តំណែង​ជាដើម​។​

​លោក ផៃ ស៊ីផា​ន អ្នកនាំពាក្យ​រដ្ឋាភិបាល​កម្ពុជា ធ្លាប់បាន​លើកឡើង​ថា ការធ្វើ​បាតុកម្ម​របស់​ពលរដ្ឋ​ខ្មែរ​នៅ​ក្រៅប្រទេស ជា​សកម្មភាព​មិន​អាច​ទទួលយកបាន និង​គ្មាន​ឥទ្ធិពល​នោះឡើយ​។​

​អ្នកនាំពាក្យ​រូប​នេះ​បាន​សរសេរ​នៅលើ​ទំព័រ​ហ្វេ​សប៊ុក​របស់​លោកថា​៖ «​រាជរដ្ឋាភិបាល​កម្ពុជា ដែល​កើតចេញ​ពី​ជម្រើស នៃ​ឆន្ទៈ​របស់​ប្រជា​ពលរដ្ឋ​ខ្មែរ តាមរយៈ​ការបោះឆ្នោត​ដែល​មាន​ច្រើន​ជាង​កៅសិប​ភាគរយ គាំទ្រ និង​ទទួលស្គាល់​រាជរដ្ឋាភិបាល​អាណត្តិ​ទី​៦ ដែល​ដឹកនាំ​ដោយ សម្តេច​អគ្គមហាសេនាបតី​តេជោ ហ៊ុន សែន មាន​សិទ្ធិ និង​ការទទួលខុសត្រូវ​លើ​ជោគវាសនា​របស់​ប្រជា​ពលរដ្ឋ​ខ្មែរ ដែល​ជា​កាតព្វកិច្ច​របស់​រាជរដ្ឋាភិបាល ក្នុង​កិច្ច​លើក​តំកើង និង​ការពារ​។​»

​លោក ផៃ ស៊ីផា​ន បន្ថែមទៀតថា​៖ « គ្មាន​ស្ថាប័ន ឬ​អង្គការ ដាច់​ដោយឡែក​ណាមួយ មាន​សមត្ថកិច្ច និង​សិទ្ធ ក្នុង​កិច្ច​គ្រប់គ្រង​ជោគវាសនា​កម្ពុជា ក្រៅ​ពី​ស្ថាប័ន នីតិបញ្ញត្តិ ស្ថាប័ន​នីតិប្រតិបត្តិ និង​ស្ថាប័ន​តុលាការ របស់​កម្ពុជា​តែ​ប៉ុណ្ណោះ​»​។​

​គួរ​រម្លឹក​ដែរ​ថា រដ្ឋាភិបាល​ជប៉ុន ដែល​បាន​ផ្តល់​ជំនួយ​ដល់​ការបោះឆ្នោត​នៅ​កម្ពុជា ធ្លាប់បាន​បង្ហាញ​ការខកចិត្ត​ចំពោះ​ការបោះឆ្នោត​អាណត្តិ​ទី​៦​នៅ​កម្ពុជា ព្រមទាំង​បាន​ជំរុញ​ទៅ​រដ្ឋាភិបាល​កម្ពុជា ឲ្យ​បើកផ្លូ​វចរចា​ជាមួយ​អតីត​គណបក្សប្រឆាំង​ឡើងវិញ​ដើម្បី​ផ្សះផ្សា​ជាតិ​។

ព័ត៌មានផ្សេងទៀត