តូយ៉ូតា​ប្រកាស​​ប្រមូល​​រថយន្ដ​​ចូល​​ក្រុមហ៊ុន​​វិញ​ជាង​​១​លាន​គ្រឿង​​ក្នុងនោះ​​មាន​​រថយន្ដ​Prius​ផងដែរ​

07-09-2018 10:14 am 1471
រូបភាពរថយន្ដ​Prius ​PHV​ និង Prius hybrid

​ក្រុមហ៊ុន​ផលិត​រថយន្ដ​តូយ៉ូតា​បានប្រកាស​កាលពី​ថ្ងៃ​ពុធ​ថា ក្រុមហ៊ុន​នឹង​ប្រមូល​រថយន្ដ​ប្រមាណ​ជាង​១​លាន​គ្រឿង​ត្រឡប់មក​ក្រុមហ៊ុន​វិញ ក្នុងនោះ​មាន​ប្រភេទ​រថយន្ដ​Prius​ហាយ​ប្រី​ដ​ផងដែរ ដោយសារតែ​មាន​បញ្ហា​ប្រព័ន្ធ​ភ្លើង​អាច​បណ្ដាលឲ្យ​រថយន្ដ​ឆេះ​ក្នុង​លក្ខខណ្ឌ​ណាមួយ​។ រថយន្ដ​ដែល​ត្រូវ​ប្រមូល​មកវិញ​មាននៅ​ក្នុងប្រទេស​ជប៉ុន អាមេរិក​ខាងជើង អឺរ៉ុប និង​តំបន់​ផ្សេងៗ​ទៀត​ជាច្រើន​។ 

​បញ្ហា​ប្រព័ន្ធ​ភ្លើង​នេះ​កើតមាន​លើ​រថយន្ដ ផលិត​ចន្លោះ​ពី​ពាក់កណ្ដាល​ឆ្នាំ​២០១៥​ដល់​ខែឧសភា​ឆ្នាំ​២០១៨ ដែលមាន​ទាំង​រថយន្ដ​Prius រថយន្ដ​C-HR​ប្រភេទ​SUV​ផងដែរ ដែល​លក់​នៅក្នុង​ប្រទេស​ជប៉ុន នៅ​អឺរ៉ុប អូស្ដ្រាលី និង​ប្រទេស​ដទៃទៀត​។ 

​អ្នកនាំពាក្យ​ក្រុមហ៊ុន​តូយ៉ូតា​លោក​Jean-Yves Jault​និយាយថា រថយន្ដ​ត្រូវ​ប្រមូល​មកវិញ​មាន​ប្រមាណ​ពាក់កណ្ដាល​នៅក្នុង​ប្រទេស​ជប៉ុន​។ ដោយឡែក​រថយន្ដ​Prius​ដែល​ត្រូវ​ប្រមូល​មកវិញ​នៅ​អាមេរិក មាន​ប្រមាណ​១៩២,០០០​គ្រឿង នៅ​សិង្ហ​បុរី​មាន​ចំនួន​៤,១១៥​គ្រឿង​។ ប៉ុន្ដែ​ក្រុមហ៊ុន​ចែកចាយ​នឹង​ប្រកាស​ឲ្យ​អតិថិជន យក​រថយន្ដ​មក​ត្រួតពិនិត្យ​ដោយ​មិន​គិត​ប្រាក់​ឡើយ ដើម្បី​ធានា​ពី​សុវត្ថិភាព​ក្នុង​ការប្រើប្រាស់​៕

ព័ត៌មានផ្សេងទៀត