កែវ​ថ្មី​ទឹក​​ចាស់​តែអាច​​ផ្លាស់​​រស់​ជាតិ​ឬ​​?​

07-09-2018 9:24 am
  ស្តាប់
កិច្ចប្រជុំគណៈរដ្ឋមន្ដ្រីលើកដំបូង សម្រាប់អាណត្តិទី៦ នៅថ្ងៃទី០៧ ខែកញ្ញា ឆ្នាំ២០១៨។
ស្តាប់ជាសំឡេង

​គណៈរដ្ឋមន្ត្រី​ថ្មី អាណត្តិ​ទី​៦ ដែល​គេ​រង់ចាំ​អស់​ជាច្រើន​ថ្ងៃ ត្រូវបាន​រដ្ឋសភាជាតិ​អនុម័ត​ជា​ផ្លូវការ នៅ​ថ្ងៃទី​០៦ កញ្ញា​នេះ​។ ជា​គណៈរដ្ឋមន្ត្រី​ដែល​រក្សាទុក​រដ្ឋមន្ត្រី​ចាស់ ដោយ​មិនមាន​ការផ្លាស់ប្តូរ ឬ​ផ្ទេរ​ទៅកាន់​ក្រសួង​ផ្សេងៗ​។ ប៉ុន្តែ​ចំនួន​ឧបនាយករដ្ឋមន្ត្រី និង ទេសរដ្ឋមន្ត្រី ត្រូវបាន​កែសម្រួល និង បង្កើន​ចំនួន​បន្ថែម​។​គណៈរដ្ឋមន្ត្រី​ថ្មី​ដែល​រក្សាទុក​នៅ​រដ្ឋមន្ត្រី​ចាស់​ដដែល​នេះ គេ​មើលឃើញថា អាចជា​យុទ្ធសាស្ត្រ​នៃ​ការដឹកនាំ​រាជរដ្ឋាភិបាល​លោក​នាយករដ្ឋមន្ត្រី​ហ៊ុន សែន ដើម្បី​ទប់ទល់​ការរិះគន់​ពី​មជ្ឈដ្ឋាន​ខាងក្រៅ និង លទ្ធផល​ការងារ​មន្ត្រី​ក្នុង​ជួរ​រដ្ឋាភិបាល​របស់លោក​។

​សមាភាព​គណៈរដ្ឋមន្ត្រី​នៃ​រដ្ឋាភិបាល អាណត្តិ​ទី​៦ ត្រូវបាន​ផ្សព្វផ្សាយ​ជា​ផ្លូវកា​រហើយ នៅ​ថ្ងៃទី​០៦ ខែកញ្ញា​នេះ បន្ទាប់ពី​ទទួលបាន​ការអនុម័ត​ពី​រដ្ឋសភាជាតិ​។ បញ្ជី​ឈ្មោះ​រដ្ឋមន្ត្រី​អាណត្តិ​ថ្មី​ចំនួន​២៩​រូប មិន​ត្រូវបាន​ផ្លាស់ប្តូរ​នោះទេ​។ ប៉ុន្តែ​ចំនួន​ឧបនាយករដ្ឋមន្ត្រី និង ទេសរដ្ឋមន្ត្រី ត្រូវបាន​កែសម្រួល និង បង្កើន​ចំនួន​បន្ថែម​។​

​ឧបនាយករដ្ឋមន្ត្រី​ថ្មី ក្នុង​អាណត្តិ​ទី​៦​នេះ បាន​កើនឡើង​១​រូប និង​ទេសរដ្ឋមន្ត្រី​កើនឡើង​ចំនួន​២​រូប​។​តំណែង​ឧបនាយករដ្ឋមន្ត្រី ត្រូវបាន​បំពេញបន្ថែម​ដោយ​ឥស្សរជន​ថ្មី​៣​រូប គឺ​លោក ប្រាក់ សុខុន លោក អូន ព័ន្ធមុនីរ័ត្ន និង លោក ជា សុផារ៉ា ដែល​ធ្វើឱ្យ​ចំនួន​ឧបនាយករដ្ឋមន្ត្រី​កើនឡើង​ពី​៩​នាក់​នៅ​អាណត្តិ​ទី​៥ ដល់​១០​នាក់​នៅ​អាណត្តិ​ទី​៦​នេះ​។​

​ចំណែកឯ​ទេសរដ្ឋមន្ត្រី​វិញ ក៏​ត្រូវបាន​បង្កើន​ពី​១៥​រូប​នៅ​អាណត្តិ​ទី​៥ ដល់​១៧​រូប នៅក្នុង​អាណត្តិ​ទី​៦​។​ក្នុងនោះ​លោក អ៊ឹម ឈុនលឹម លោក​ច័ន្ទ សារុន និង លោក សេរី កុសល ដែល​ធ្លាប់ជា​ទេសរដ្ឋមន្ត្រី​អាណត្តិ​ទី​៥ ត្រូវបាន​ផ្លាស់ប្តូរ និង ជំនួស​មកវិញ ដោយ​ទេសរដ្ឋមន្ត្រី​ថ្មី​៤​រូប​រួមមាន លោក ប៉ុល សារឿន លោក គន់ គីម លោក មាស សុភា និង​លោក អូស្មាន ហាស្សាន់​។​ហើយ​លោក ប៊ិន ឈិន គឺជា​រដ្ឋមន្ត្រី​ទទួលបន្ទុក​ទីស្តីការគណៈរដ្ឋមន្ត្រី​ពេញសិទ្ធិ​។​

​ការ​រក្សាទុក​រដ្ឋមន្ត្រី​ចាស់​រដ្ឋាភិបាល អះអាងថា ជា​ការឆ្លុះ​បញ្ជាំង​ចំពោះ​ការផ្តល់​ទំនុកចិត្ត​ពី​សំណាក់​ពលរដ្ឋ​ដែល​បោះឆ្នោតឱ្យ​គណបក្ស​ប្រជាជន​កម្ពុជា ជាពិសេស លោក​នាយករដ្ឋមន្ត្រី ហ៊ុន សែន​។ លោក ហ៊ុន សែន ក្រោយ​រដ្ឋសភា​ផ្តល់​សេចក្តីទុកចិត្ត​ដឹកនាំ​រដ្ឋាភិបាល អាណត្តិ​ទី​៦ បាន​ប្តេជ្ញាចិត្ត​ខ្ពស់​ក្នុង​ការបម្រើ​ជាតិ និង ប្រជាជន ឆ្ពោះទៅកាន់​ស្ថានភាព​ល្អប្រសើរ ហើយ​រាជរដ្ឋាភិបាល​អាណត្តិ​ថ្មី របស់លោក នឹង បន្ត​ប្រឹងប្រែង​ដ៏​មុត​ស្រួច​ក្នុង​ការអភិវឌ្ឍ​ជាតិ ឱ្យ​កាន់តែ​រីកចម្រើន​បន្ថែមទៀត សម្រាប់​ថ្ងៃ​អនាគត​។

​ជា​ការពិត ការរក្សា​នូវ​រដ្ឋមន្ត្រី​ចាស់ និង មិន​ផ្លាស់ប្តូរ​ថ្មី ទំនងជា​លោក​នាយករដ្ឋមន្ត្រី​យល់ថា រដ្ឋមន្ត្រី​ទាំងនោះ នៅ​ប្រើប្រាស់​បាន ហើយ​មិនសូវ​បង្ក​ឱ្យ​ប៉ះពាល់​ដល់​ការដឹកនាំ​របស់លោក​។ ឥស្សរៈជន ដែល​បន្ត​កាន់ដំណែង​នៅ អាណត្តិ​ថ្មី​នេះ អាចជា​ដែន​អំណាច​របស់​លោកនាយក​រដ្ឋមន្ត្រី ហ៊ុន សែន ដើម្បី​ឆ្លើយតប​នឹង​ការចង់បាន​របស់​មហា​ជន​ទូទៅ​។​

​ហេតុផល​មួយទៀត រដ្ឋាភិបាល​របស់លោក ហ៊ុន សែន កាលពី​ពាក់កណ្តាល អាណត្តិ​ទី​៥ ធ្លាប់បាន​ធ្វើ​ការរុះរើ​គណៈរដ្ឋមន្ត្រី​ម្តង​រួចទៅហើយ ហើយ​រដ្ឋមន្ត្រី​វ័យក្មេង​មួយចំនួន បានបង្ហាញ​សមត្ថភាព​ការងារ​របស់ខ្លួន​បាន​យ៉ាង​ល្អ រហូតដល់​មាន​ការកោតសរសើរ​ជា​សាធារណៈ តួយ៉ាង​ដូចជា រដ្ឋមន្ត្រី​ក្រសួងបរិស្ថាន​លោក សាយ សំ​អាល់​, រដ្ឋមន្ត្រីក្រសួង​អប់រំ យុវជន និង​កីឡា លោក ហង់ ជួន​ណារ៉ុន​, រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ លោក អូន ព័ន្ធមុនីរ័ត្ន​, និង រដ្ឋមន្ត្រីក្រសួង​សាធារណការ និង ដឹកជញ្ជូន លោក ស៊ុន ចាន់ថុល ជាដើម​។

​តែ​យ៉ាងណា សមាសភាព​គណៈរដ្ឋមន្ត្រី អាច​នឹងធ្វើ​ការរុះរើ តាម​ការជាក់ស្តែង ឬ​នៅ​ពាក់កណ្តាល អាណត្តិ​ទី​៦ ប្រសិនបើ​រដ្ឋមន្ត្រី​នីមួយៗ​បំពេញការងារ​មិន​ស្របតាម​ការចង់បានរ​បស់​លោក​នាយករដ្ឋមន្ត្រី ។ ចំណែក​រដ្ឋមន្ត្រី​ប្រតិភូ​អម​នាយករដ្ឋមន្ត្រី រដ្ឋលេខាធិការ និង អនុរដ្ឋលេខាធិការ ដែល​មិនមែនជា​សមាជិក​រាជរដ្ឋាភិបាល​ទេ​។​

​គួរ​បញ្ជាក់ថា គណៈរដ្ឋមន្ត្រី​កម្ពុជា នៅ​ពាក់កណ្តាល​អាណត្តិ​ទី​៥ ត្រូវបាន​រុះរើ​ម្តង​រួចមកហើយ​។​កាលណោះ រដ្ឋមន្ត្រី​២​រូប និង ឧបនាយករដ្ឋមន្ត្រី​១​រូប ត្រូវបាន​បញ្ចប់​មុខតំណែង​។​ជាមួយគ្នា​នោះ​លោក​នាយករដ្ឋមន្ត្រី ហ៊ុន សែន បានស្នើ​ឱ្យមាន​ការធ្វើ​វិសោធនកម្ម​ច្បាប់រដ្ឋធម្មនុញ្ញ ស្តី​ចំនួន​៥​មាត្រា​រួមមាន មាត្រា​៣៤​ថ្មី មាត្រា​៤២ មាត្រា​៤៩ មាត្រា​៥៣ និង មាត្រា​១១៨​ថ្មី នៃ​រដ្ឋធម្មនុញ្ញ​។​

 មាត្រា​១១៨​ថ្មី (​មួយ​) កថាខណ្ឌ​ទី​២ រដ្ឋាភិបាល​របស់លោក​ហ៊ុន សែន បាន​លុប​ពាក្យ​រដ្ឋលេខាធិការ​ចេញ​ពី​មាត្រា​ចាស់ ហើយ​សរសេរថា គណៈរដ្ឋមន្ត្រី​ត្រូវបាន​ដឹកនាំ​ដោយ នាយករដ្ឋមន្ត្រី​១​រូប អមដោយ​ឧបនាយករដ្ឋមន្ត្រី ព្រមទាំង​មាន​ទេសរដ្ឋមន្ត្រី និង​រដ្ឋមន្ត្រី​ជា​សមាជិក​។​

​ក្រោយមកទៀត រដ្ឋាភិបាល​បានរៀបចំ​ច្បាប់ ច្បាប់​ស្តីពី​ការរៀបចំ និង ការប្រព្រឹត្តទៅ​នៃ​គណៈរដ្ឋមន្ត្រី​សម្រាប់​អាណត្តិ​ទី​៦​។​មាត្រា​៥៣​នៃ​ច្បាប់​នេះ ក៏​ចែង​ដែរថា រដ្ឋមន្ត្រី​ប្រតិភូ​អម​នាយករដ្ឋមន្ត្រី រដ្ឋលេខាធិការ និង អនុរដ្ឋលេខាធិការ មិនមែនជា​សមាជិក​រា​ជ​រដ្ឋាភិបាល​ទេ ហើយក៏​មិនមែនជា​ភ្នាក់ងារ​រដ្ឋបាល​អចិន្ត្រៃយ៍​ដែរ​។

​ការតែងតាំង ផ្លាស់ប្តូរ និង បញ្ចប់​មុខតំណែង​រដ្ឋលេខាធិការ និង អនុរដ្ឋលេខាធិកា​នៅ​ទីស្តីការគណៈរដ្ឋមន្ត្រី និង នៅតាម​ក្រសួង ស្ថាប័ន​នានា ត្រូវធ្វើឡើង​តាមរយៈ​ព្រះរាជក្រឹត្យ បន្ទាប់​មាន​ពី​មាន​សំណើ​របស់​នាយករដ្ឋមន្ត្រី​។​

​តាមរយៈ​ច្បាប់​ខាងលើ​សមាសភាព​សមាជិក​រដ្ឋាភិបាល នៃ​នីតិកាល​រដ្ឋសភា​ទី​៦ មាន​ទំហំ​តូច​ជាង​មុន ដោយសារតែ​ចំនួន​រដ្ឋលេខាធិការ​ដ៏​ច្រើន​សន្ធឹកសន្ធាប់​នៅតាម​ក្រសួង​នី​មួយៗ នឹង​លែង​ជា​សមាជិក​រដ្ឋាភិបាល​។ ក្រសួង​នីមួយៗ ច្បាប់​តម្រូវឱ្យមាន​រដ្ឋ​លេខាធិការ​ប្រចាំការ​មួយរូប ដែល​ចាត់តាំង​ដោយ​នាយករដ្ឋមន្ត្រី​។​

​ជារួម បើ​ពិនិត្យ​ឱ្យ​ស៊ីជម្រៅ អំណាច​កំពុង​ឋិត​ក្នុង​កណ្តាប់ដៃ​ដែក​របស់​លោក​នាយករដ្ឋមន្ត្រី​ទាំងមូល​។ ការរៀបចំ​សមាភាព​គណៈរដ្ឋមន្ត្រី​ពេលនេះ ក៏​អាចជា​ការឆ្លើយតប​ទៅនឹង​ការរិះគន់​ពី​ក្រុមប្រឆាំង និង អ្នកវិភាគ​មួយចំនួន​នាពេល​កន្លងមក​ដែលថា រដ្ឋាភិបាល​របស់លោក ហ៊ុន សែន ជា​រដ្ឋាភិបាល​ក្បាល​ធំ​ជាង​ខ្លួន​។​ម្យ៉ាងវិញទៀតក៏​ជាការ​កំណែទម្រង់​បន្ថែម លើក​សកម្មភាព​ការងារ​របស់​មន្ត្រី​ក្នុង​ជួរ​រាជរដ្ឋាភិបាល​ផងដែរ​។ តែ​យ៉ាងណា ការងារ​នេះ​ត្រូវការ​តាំងចិត្ត​ខ្ពស់​ពី​លោក​នាយករដ្ឋមន្ត្រី ទើប​អាច​ជោគជ័យ​សម្រាប់​ថ្ងៃ​អនាគត បើ​មិន​ដូច្នោះ​ទេ វា​អាចនឹង​បរាជ័យ​ជាក់ជាពុំខាន​៕

ព័ត៌មានផ្សេងទៀត