សង្ឃ​ខ្វះ​​វិន័យ​ អាច​​បង្កឱ្យខូច​​តម្លៃ​នៃ​​ព្រះពុទ្ធ​សាសនា​

07-06-2018 3:41 pm 1257
  ស្តាប់
ពិធីកោសក់បួសក្នុង ព្រះពុទ្ធសាសនា។
ស្តាប់ជាសំឡេង

​អ្នកបួស​ជា​«​ព្រះសង្ឃ​» ក្នុង​ព្រះពុទ្ធសាសនា ត្រូវបាន​សង្គម​ខ្មែរ​ឱ្យ​តម្លៃ​ថា គឺជា​មនុស្ស​មានចំណេះដឹង​ជ្រៅជ្រះ ព្រោះ​បាន​សិក្សា​ពី​ធម៌​វិន័យ​របស់​ព្រះពុទ្ធ​។ ដួច្នេះហើយ បានជា​ដូនតា​ខ្មែរ អប់រំ​កូនចៅ​ឱ្យ​គោរព​តាម​វិន័យ​នៃ​ព្រះពុទ្ធ ព្រោះថា «​វិន័យ​នាំមក​នូវ​សេចក្តីថ្លៃថ្នូរ​»​។ ប៉ុន្តែ​បច្ចុប្បន្ន គេ​ពិនិត្យឃើញថា ជំនឿ​លើ​ព្រះសង្ឃ​ក្នុងសង្គម​ខ្មែរ ហាក់​មាន​ការធ្លាក់ចុះ​។ ការធ្លាក់ចុះ​នេះ អាច​ដោយសារតែ​សង្ឃ​មួយចំនួន មិន​គោរព​តាម​ធម៌​វិន័យ​ត្រឹមត្រូវ ដែល​បង្ក​ឱ្យ​ប៉ះពាល់​ដល់​កិត្តិយស​នៃ​ព្រះពុទ្ធសាសនា និង សង្ឃ​ដ៏ទៃទៀត​។

ការ​បួស​ក្នុង​ព្រះពុទ្ធសាសនា ពិតជា​មាន​សារសំខាន់ ព្រោះថា ធម៌​វិន័យ​របស់​ព្រះពុទ្ធ បាន​ជួយ​អប់រំ​មនុស្ស​ប្រុស ស្រី ឱ្យ​ប្រព្រឹត្ត​នូវ​អំពើ​ល្អ សម្រាប់​រស់នៅ​ក្នុងសង្គម​។ ជាទូទៅ អ្នក​បួស គឺ​មានឱកាស និង ពេលវេលា​ច្រើន សម្រាប់​សិក្សា​រៀនសូត្រ គ្រប់​មុខវិជ្ជា ទោះ​អ្នកបួស​នោះ ជា​កូន​អ្នក​ស្រែចម្ការ ក្រីក្រ​ក្តី​។​

​តាមរយៈ​សិក្សា ទាំង​ធម៌​វិន័យ និង សិក្សា​ពី​ខាងក្រៅ​ផង មនុស្ស​មិនល្អ អាច​ក្លាយជា​មនុស្ស​ល្អ​សម្រាប់​សង្គម​។ ម្លោះ​ហើយ បានជា​នៅ​បណ្តា​ប្រទេស​មួយចំនួន គេ​មាន​ច្បាប់ទម្លាប់ ដើម្បីឱ្យ​មនុស្ស​ប្រុស បាន​បួស​រៀន​ធម៌​វិន័យ ក្នុង​ព្រះពុទ្ធសាសនា​។ ចំណែក ក្នុងសង្គម​ខ្មែរ​ពី​បូរាណ អ្នក​ដែល​លាចាក​សិក្ខាបទ​ពី​ព្រះសង្ឃ ត្រូវបាន​គេ​ប្រសិទ្ធ​នាម​ថា ជា​«​អន្ទិត​» ប្រែ​កថា​«​បណ្ឌិត​»​ជាដើម​។ នេះ​បើតាម​វចនានុក្រម សម្ដេច​សង្ឃ ជួន ណាត ទំព័រ ៥៤៤​។​

​ដោយ​មើលឃើញថា ការអប់រំ​ក្នុង​ព្រះពុទ្ធសាសនា ដើរតួនាទី​សំខាន់​ក្នុងសង្គម ទើបបានជា​រាជរដ្ឋាភិបាល​កម្ពុជា សម្រេច​ដាក់​បញ្ជូ​ល ព្រះពុទ្ធសាសនា ជា​សាសនា​របស់​ដ្ឋ ដែល​មានចែង នៅក្នុង​រដ្ឋធម្មនុញ្ញ​មាត្រា ៤៣​។​

​តែ​យ៉ាងណា នៅ​ប៉ុន្មាន​ឆ្នាំ​ចុងក្រោយ​នេះ ក្នុងសង្គម​ខ្មែរ​គេ​សង្កេតឃើញថា តម្លៃ​របស់​ព្រះពុទ្ធសាសនា និង ការអនុវត្ត​ធម៌​វិន័យ​របស់​ព្រះ​ភិក្ខុសង្ឃ​ហាក់ដូចជា ធ្លាក់ចុះ​។ ធ្លាក់ចុះ​នេះ​ក៏​អាច​បណ្តាលមកពី ព្រះ​ភិក្ខុសង្ឃ និង សាមណេរ​មួយចំនួន ប្រព្រឹត្ត​ប្រាសចាក​ធម៌​វិន័យ​របស់​ព្រះសម្មាសម្ពុទ្ធ និង យក​តួនាទី​របស់​ព្រះពុទ្ធសាសនា បោកប្រាស់​ពុទ្ធសាសនិក ធ្វើឱ្យ​ជាប់​ជា​ទោសទណ្ឌ ឬ​បទឧក្រិដ្ឋ​ដទៃទៀត​។

​ជាក់ស្តែង​ថ្មីៗ​នេះ ព្រះចៅអធិការ​វត្តភ្នំ​បាក់​លើ ស្ថិតក្នុង ខេត្ត​បន្ទាយមានជ័យ ត្រូវបាន​ថ្នាក់ដឹកនាំ​សង្ឃ និង មន្ត្រី​ធម្មការ​ខេត្ត​បន្ទាយមានជ័យ សម្រេច​ចាប់ផ្សិក​ភ្លាមៗ ក្រោយពី​លេច​ធ្លាយ​វិដេអូ ដោយ​អតីត​សង្ឃ​អង្គ​នេះ បាន​ប្រលែង​លេង​យ៉ាង​ស្រើប​ស្រាស​ជាមួយ​ស្រី​ស្នេហ៍ និង លេងល្បែង នៅលើ​បណ្តាញ​ទំនាក់ទំនង សង្គម​ហ្វេ​សប៊ុក​។​

​ជាមួយ​ការពិត សកម្មភាព​នេះ បាន​ជះ​ផល​ឥទ្ធិពល​អាក្រក់ ដល់​តម្លៃ​នៃ​ព្រះពុទ្ធសាសនា និង ព្រះ​ភិក្ខុសង្ឃ​ដទៃទៀត ជា​អ្នកបួស​ត្រឹមត្រូវ​។ ព្រោះថា ករណី​ខាងលើនេះ វា​មិនមែនជា​ករណី​ថ្មី​នោះទេ សម្រាប់​ព្រះសង្ឃ​នៅក្នុង​សង្គម​ខ្មែរ​។ ហើយ​រូបភាព​បែបនេះ វា​បាន​ដើរ​ខុស​នឹង​ពាក្យចាស់​បូរាណ​ពោលថា «​វិន័យ​នាំមក​នូវ​សេចក្តីថ្លៃថ្នូរ​» ។​

​ការប៉ះពាល់​តម្លៃ​នៃ​សាសនា​ជា​រឿង​មួយ ហើយ​រឿង​ក៏​សំខាន់​ជាងនេះទៅទៀត​នោះ គឺ​ការធ្លាក់ចុះ​នេះ អាច​បណ្តាលឱ្យ សីលធម៌ ប្រពៃណី ទំនៀមទម្លាប់​ខ្មែរ មួយចំនួន ត្រូវ​បាត់បង់​ផងដែ​។ បាត់បង់​ព្រោះថា បុព្វ​ជិត​ក្នុង​ព្រះពុទ្ធសាសនា​មួយចំនួន បាន​ប្រព្រឹត្ត​ខុសពី​ក្បូន​ច្បាប់​នៃ​ព្រះពុទ្ធសាសនា និង បំភ្លេចចោល​នូវ​តួនាទី​ជា​អ្នក​អប់រំ​។​

​តែ​យ៉ាងណាក្តី គេ​មិនអាច​ស្តីបន្ទោស​តែ​លើ​ព្រះសង្ឃ​ទាំងអស់​នោះទេ ព្រោះថា រឿងរ៉ាវ​ដែល កើតឡើង​កន្លងទៅនេះ វា​ក៏​ជាប់​ទាក់ទិន្ទ​នឹង​ការរីកចំរើន​នៃ​សង្គម​សម័យថ្មី ការគ្រប់គ្រង​របស់​ក្រសួង ការអនុវត្ត​ច្បាប់​ផងដែរ​។ បើតាម​អ្នកជំនាញ ធ្លាប់​អះអាងថា  ការអប់រំ​សីលធម៌​របស់​ព្រះសង្ឃ​ដល់​មនុស្ស​ប្រុស​ស្រី​ក្នុងសង្គម​ខ្មែរ​សព្វថ្ងៃ គឺ​មិនអាច​ធ្វើបាន​ច្រើន​ដូច​ព្រះសង្ឃ​ក្នុងសង្គម​ខ្មែរ​កាលពី​សម័យមុន​នោះទេ​។ មិន​ច្រើន ព្រោះ​ក្នុង​សម័យនេះ គឺ​អ្វីៗ​មាន​ការវិវឌ្ឍ​ជឿនលឿន​សំបូរ​ទៅដោយ​ច្បាប់​ផ្សេងៗ ជា​ហេតុនាំឱ្យ​សង្គម​ហាក់​ឃ្លាតឆ្ងាយ ពី​ពុទ្ធសាសនា និង ព្រះសង្ឃ​។​

​ជារួម​មកវិញ សង្គម​ខ្មែរ​នៅតែ​ត្រូវការ ព្រះសង្ឃ​នៃ​ព្រះពុទ្ធសាសនា ចូលរួម​ជួយ​ទូន្មាន​អប់រំ​ផ្នែក​សីលធម៌ ដើម្បីឱ្យ​ប្រទេស ឬ​ពលរដ្ឋ​កម្ពុជា មាន​ភាពថ្លៃថ្នូរ និង មាន​ជីវភាព​រស់នៅ​ល្អប្រសើរ តាម​គន្លង​ព្រះពុទ្ធសាសនា ដែល​ដូនតា​ខ្មែរ គោរព​តាំងតែ​ពី​ដើម​រៀងមក​។ ដូច្នេះ មានតែ​សង្ឃ​អង្គឯង​ទេ គូរ​តែ​បង្កើន​ការគោរពវិន័យ តាមច្បាប់​ក្បួន ហើយ​បន្ត​ស្វែងរក​ចំណេះដឹង ដើម្បី​ចូលរួម​ជួយ​ទូន្មាន​អប់រំ ផ្នែក​សីលធម៌ ដល់​ជន​ប្រុស​ស្រី តាមតែ​អាច​ធ្វើទៅបាន​។​

​ជាមួយគ្នានេះ ក្រសួង​ធម្មការ និង សាសនា គួរតែ​ពិនិត្យ​ចំ​ប្រព័ន្ធគ្រប់គ្រង​ជាថ្មី ឱ្យ​ជាក់លាក់​ជាង​មុន ទៅលើ​វត្ត​អារាម​នៅ​ទូទាំងប្រទេស ដោយ​មិន​រង់ចាំ​ស្តាប់​តែ​របាយការណ៍​ពី​ថ្នាក់ក្រោម​នោះឡើយ​។ ប្រព័ន្ធគ្រប់គ្រង​ថ្មី ក្នុង​ពិនិត្យ​ទៅ​ចំនួន​ព្រះសង្ឃ ការអនុវត្ត​ធម៌​វិន័យ កម្ម​ពិធី​សិក្សា គ្រូ ការ​ស្នាក់នៅ​ព្រះ​ភិក្ខុសង្ឃ ឬ​សាមណេរ និង ជាពិសេស ការប្រើប្រាស់​ប្រព័ន្ធ​បច្ចេកវិទ្យា​ទំនើប​។ បើ​មិន​ប្រឹងប្រែង​ទេ តម្លៃ​នៃ​ព្រះពុទ្ធសាសនា អាច​នឹង​ធ្លាក់ចុះ ក៏​ព្រោះតែ​ភាព ធូ​រលុងក្នុង​ការគោរព​ច្បាប់ វិន័យ នៃ​សង្ឃ​ទូទៅ​៕

ព័ត៌មានផ្សេងទៀត