រដ្ឋាភិបាលដាក់ឱ្យដំណើរការសេវាដឹកជញ្ជូនឥតគិតប្រាក់អ្វីខ្លះក្នុងឱកាសចូលឆ្នាំខ្មែរ?

07-04-2018 3:31 pm
  ស្តាប់
ស្តាប់ជាសំឡេង

​កាលពី​ថ្ងៃ​ទី​០៦ ខែ​មេសា រដ្ឋាភិបាល​កម្ពុជា តាមរយៈ​ក្រសួង​សាធារណការ​និង​ដឹកជញ្ជូន បាន​ប្រកាស​ដាក់​ឱ្យ​ដំណើរការ​ជា​បណ្តោះអាសន្ន នូវ​កាណូត​ដឹក​អ្នកដំណើរ ពី​ខណ្ឌ​ព្រែក​ព្នៅ ឆ្ពោះទៅ​កាន់​ក្រុង​តាខ្មៅ ខេត្ត​កណ្តាល ដែល​នេះ គឺជា​លើក​ដំបូង​ដែល​កម្ពុជា​ចាប់ផ្តើម​ដំណើរការ និង​ប្រើប្រាស់​ផ្លូវទឹក​ឡើងវិញ ។​

​លោក​ស៊ុន ចាន់ថុល បាន​ថ្លែង​ប្រាប់​ក្រុមអ្នកកាសែត ក្នុង​ពិធី​បើកសម្ពោធ​ដំណើរការ កាណូត​ដឹក​អ្នកដំណើរ នៅ​ព្រឹក​ថ្ងៃ​ដដែល​ថា កាណូត​ដឹក​អ្នកដំណើរ​នេះ នឹង​ធ្វើដំណើរ​តាម​បណ្តោយ​ទន្លេសាប និង​ទន្លេបាសាក់ ។ កំពង់ផែ​ចំនួន​៦​ទីតាំង និង​កាណូត​ចំនួន​២​គ្រឿង នាំចូល​ពី​ប្រទេស​វៀតណាម រួមជាមួយ​នឹង​កាណូត​ចាស់ៗ ចំនួន​២​គ្រឿង​ទៀត សរុប​ទាំងអស់​៤​គ្រឿង ដែល​កាណូត​មួយគ្រឿង អាច​ផ្ទុក​អ្នកដំណើរ​បាន​ចំនួន​ជាង​៥០​ទៅ​៦០​នាក់ ។ 

​កាណូត​នីមួយៗ ត្រូវបាន​បំពាក់​ម៉ាស៊ីនត្រជាក់ និង​ពោង​សុវត្ថិភាព ដោយ​ចាប់ផ្ដើម​ផ្ដល់​សេវា ពី​ម៉ោង ៥:៣០​នាទី​ព្រឹក ដល់​ម៉ោង ៥:៣០​នាទី​ល្ងាច ។ រាល់​ការចត​ដឹក​អ្នកដំណើរ សម្រាប់​ចំណត​នី​មួយៗ​មិន​លើស​ពី​១០​នាទី​នោះ​ទេ ។​

​ចំពោះ​កំពង់ផែ​សម្រាប់​ចំណត​ទាំង​៦​ទីតាំង​នោះ រួមមាន កំពង់ផែ​ព្រែក​ព្នៅ​, កំពង់ផែ​មុខ​ឃ្លាំង​សាំង​ឫស្សីកែវ ឬ​ហៅ​ថា​ទីលាន​ប្រជាធិបតេយ្យ​ថ្មី​, កំពង់ផែ​ផែបណ្តែត​ទល់មុខ​ផ្សា​រាត្រី​, កំពង់ផែ​ណាហ្គា​ក្បែរ​កោះ​ពេជ្រ​, កំពង់ផែ​ភូមិ​ដើម​ចាន់​ច្បារអំពៅ និង​កំពង់ផែ​សួនច្បារ​តាខ្មៅ ។ ដោយឡែក កំពង់ផែ​ទាំង​៦​នេះ ត្រូវបាន​ដាក់​ឱ្យ​ដំណើរការ​តែ​៤​សិន​ប៉ុណ្ណោះ ចំពោះ​កំពង់ផែ​ព្រែក​ព្នៅ និង​កំពង់ផែ​ភូមិ​ដើម​ចាន់​ច្បារអំពៅ មិនទាន់​ត្រូវបាន​ដាក់​ឱ្យ​ដំណើរការ​នៅឡើយ ព្រោះ​មិន​ទាន់​សាងសង់​រួចរាល់ ។​

​កាណូត​ដឹក​អ្នកដំណើរ​នេះ នឹង​ផ្តល់ឱ្យ​ពលរដ្ឋ​ធ្វើដំណើរ​តាម​ផ្លូវទឹក ដោយ​មិន​គិត​ប្រាក់ ចាប់ពី​ថ្ងៃ​ទី​០៦ ខែ​មេសា រហូត​ដល់​ថ្ងៃ​ទី​៣១ ខែកក្កដា ឆ្នាំ​២០១៨ ។ យ៉ាងណាក៏ដោយ ចាប់ពី​ខែ​សីហា ឆ្នាំ​២០១៨​តទៅ ការធ្វើដំណើរ​តាម​កាណូត​ទាំងនេះ នឹង​តម្រូវ​ឱ្យ​បង់​ប្រាក់​ចំនួន ៣២០​រៀល ក្នុង​១​គីឡូម៉ែត្រ ។ ជារួម បើ​គេ​ធ្វើដំណើរ​ពី​ឫស្សីកែវ ដល់​ក្រុង​តាខ្មៅ ក្នុង​ចម្ងាយ​ជិត​២០​គីឡូម៉ែត្រ នោះ គឺ​ត្រូវ​ចំណាយ​ប្រាក់ ៥.៩០០​រៀល និង​ប្រើ​រយៈពេល​ធ្វើ​ដំណើរ​ប្រមាណ ៤៥​នាទី ។​

​យ៉ាងណាម៉ិញ ក្រៅ​ពី​ដាក់​ឱ្យ​ដំណើរការ​ផ្លូវទឹក រដ្ឋាភិបាល​កម្ពុជា​ក៏​បាន​ប្រកាស​ដាក់​ឱ្យ​ដំណើរការ​នូវ សេវា​ឡានក្រុង​ជូន​ពលរដ្ឋ ដោយ​ឥតគិតថ្លៃ​ក្នុងឱកាស​ចូលឆ្នាំថ្មី​ដែរ ។ តាមរយៈ​រដ្ឋាករ​ស្វយ័ត​ដឹកជញ្ជូន​សាធារណៈ រថយន្ត​ក្រុង​ចំនួន​៦០​គ្រឿង ត្រូវបាន​រៀបចំ​សម្រាប់​ដឹកជញ្ជូន​ពលរដ្ឋ​ពី​រាជធានី​ភ្នំពេញ ទៅកាន់​បណ្តា​ខេត្ត​នានា ចាប់ពី​ថ្ងៃ​ទី​១២ ដល់​ថ្ងៃ​ទី​១៨ ខែ​មេសា ឆ្នាំ​២០១៨ ។​

​គោលដៅ​ចេញ​ដំណើរ​របស់​រថយន្ត​ក្រុង​ទាំង​៦០​គ្រឿង​នោះ រួមមាន ផ្លូវជាតិ​លេខ​១ មាន​ចំនួន​២​ខ្សែ ។ ខ្សែរ​ត់ទី​១ ពី​ភ្នំពេញ - កណ្តាល - ព្រៃវែង ចំនួន​៥​គ្រឿង គោលដៅ​ចំណត​បញ្ចប់​នៅ​ទី​រួម​ខេត្តព្រៃវែង និង​ខ្សែរ​ត់ទី​២ ពី​ភ្នំពេញ - កណ្តាល - ស្វាយរៀង ចំនួន​៥​គ្រឿង ដោយ​គោលដៅ​ចំណត​បញ្ចប់​នៅ​ទី​រួម​ខេត្ត​ស្វាយរៀង ។ ប្រជាពលរដ្ឋ​ត្រូវ​រង់ចាំ​នៅ​ផ្លូវ​៦០​ម៉ែត្រ ទល់មុខ​ក្រុមហ៊ុន​ម៉ែ​ក​ស៊ី​ដែស បិ​ន ដោយ​ចូល​តាម​ផ្លូវ​មុខ​វត្ត​ចាក់អង្រែ​ក្រោម ចម្ងាយ​ប្រមាណ ៧០០​ម៉ែត្រ ។ 

​ផ្លូវជាតិ​លេខ​៣ មាន​២​ខ្សែ ខ្សែរ​ត់ទី​១ ពី​ភ្នំពេញ - តាកែវ - កំពត ចំនួន​៥​គ្រឿង គោលដៅ​ចំណត​បញ្ចប់​នៅ​ទី​រួម​ខេត្តកំពត និង​ខ្សែរ​ត់ទី​២ ពី​ភ្នំពេញ - តាកែវ - កែប ចំនួន​៥​គ្រឿង គោលដៅ​ចំណត​បញ្ចប់​នៅ​ទី​រួម​ខេត្ត​កែប ។ ប្រជាពលរដ្ឋ​ត្រូវ​រង់ចាំ​នៅ​ចំណុច​ផ្លូវជាតិ​លេខ​៣ ហួស​រង្វង់​មូល​ចោមចៅ នៅ​ជិត​បញ្ជាការដ្ឋាន​កងពល​តូច​លេខ​៧០ សង្កាត់​ចោមចៅ ខណ្ឌ​ពោធិ៍​សែន​ជ័យ ។​

​ផ្លូវជាតិ​លេខ​៤ មាន​២​ខ្សែ ខ្សែរ​ត់ទី​១ ពី​ភ្នំពេញ - កំពង់ស្ពឺ ចំនួន​៣​គ្រឿង គោលដៅ​ចំណត​បញ្ចប់​នៅ​ទី​រួម​ខេត្តកំពង់ស្ពឺ និង​ខ្សែរ​ត់ទី​២ ពី​ភ្នំពេញ - ព្រះសីហនុ ចំនួន​៧​គ្រឿង គោលដៅ​ចំណត​បញ្ចប់​នៅ​ទី​រួម​ខេត្ត​ព្រះសីហនុ ។ ប្រជាពលរដ្ឋ​ត្រូវ​រង់ចាំ​នៅ​ចំណុចប្រសព្វ​ផ្លូវជាតិ​លេខ​៤ និង​មហាវិថី​ឈ្នះ​ឈ្នះ សង្កាត់​ចោមចៅ ខណ្ឌ​ពោធិ៍​សែន​ជ័យ ។​

​ផ្លូវជាតិ​លេខ​៥ មាន​៤​ខ្សែ ខ្សែរ​ត់ទី​១ ពី​ភ្នំពេញ - កំពង់ឆ្នាំង ចំនួន​៣​គ្រឿង គោលដៅ​ចំណត​បញ្ចប់​នៅ​ទី​រួម​ខេត្តកំពង់ឆ្នាំង​, ខ្សែរ​ត់ទី​២ ពី​ភ្នំពេញ - ពោធិ៍សាត់ ចំនួន​៥​គ្រឿង គោលដៅ​ចំណត​បញ្ចប់​នៅ​ទី​រួម​ខេត្តពោធិ៍សាត់​, ខ្សែរ​ត់ទី​៣ ពី​ភ្នំពេញ - បាត់ដំបង ចំនួន​៦​គ្រឿង គោលដៅ​ចំណត​បញ្ចប់​នៅ​ទី​រួម​ខេត្តបាត់ដំបង និង​ខ្សែរ​ត់ទី​៤ ពី​ភ្នំពេញ - បន្ទាយមានជ័យ ចំនួន​៦​គ្រឿង គោលដៅ​ចំណត​បញ្ចប់​នៅ​ទី​រួម​ខេត្តបន្ទាយមានជ័យ ។ ប្រជាពលរដ្ឋ​ត្រូវ​ទៅ​រង់ចាំ​នៅ​ចំណត​សួន​ឫស្សីកែវ ឬ​ហៅ​ថា ទីលាន​ប្រជាធិបតេយ្យ​ថ្មី ផ្លូវជាតិ​លេខ​៥ សង្កាត់​ឫស្សីកែវ ខណ្ឌ​ឫស្សីកែវ ។​

​ផ្លូវជាតិ​លេខ​៦ មាន​២​ខ្សែ ខ្សែរ​ត់ទី​១ ពី​ភ្នំពេញ - កំពង់ធំ ចំនួន​៥​គ្រឿង គោលដៅ​ចំណត​បញ្ចប់​នៅ​ទី​រួម​ខេត្តកំពង់ធំ និង​ខ្សែរ​ត់ទី​២ ពី​ភ្នំពេញ - សៀមរាប ចំនួន​៥​គ្រឿង គោលដៅ​ចំណត​បញ្ចប់​នៅ​ទី​រួម​ខេត្តសៀមរាប ។ ប្រជាពលរដ្ឋ​ត្រូវ​ទៅ​រង់ចាំ​នៅ​ចំណុច​ផ្លូវ​បេតុង ក្នុង​តំបន់​អភិវឌ្ឍន៍​ជ្រោយចង្វារ របស់​ក្រុមហ៊ុន​វិនិយោគទុន​អាណិកជន​កម្ពុជា (OCIC) សង្កាត់​ជ្រោយចង្វារ ខណ្ឌ​ជ្រោយចង្វារ ។ ខ្សែ​រត់​នីមួយៗ ចាប់ផ្តើម​ចេញដំណើរ​នៅ​ម៉ោង ៥:០០​ព្រឹក ហើយ​អ្នក​មក​ដល់​មុន នឹង​បាន​ចេញដំណើរ​មុន ។​

​ជាមួយគ្នានេះ ក្រៅ​ពី​ដាក់​ដំណើរការ​កាណូត​ដឹក​អ្នកដំណើរ និង​រថយន្ត​ក្រុង​ដោយ​មិន​យក​ប្រាក់ រដ្ឋាភិបាល​កម្ពុជា​ក៏​បាន​ប្រកាស​ដាក់​ឱ្យ​ដំណើរការ​សាកល្បង ខ្សែ​រថភ្លើង​មួយ​ខ្សែ​ពី ប៉ោយ​ប៉ែត ទៅ​សិរីសោភ័ណ ចាប់ពី​ថ្ងៃ​ទី​០៤ ខែ​មេសា រហូត​ដល់​ថ្ងៃ​ទី​៣១ ខែកក្កដា ឆ្នាំ​២០១៨ ដោយ​ឥតគិតថ្លៃ​ដែរ ។​

​ដំណើរការ​សាកល្បង​នេះ មាន​៣​ជើង ចេញពី​ប៉ោយប៉ែត ទៅ​សិរីសោភ័ណ និង​៣​ជើង​ពី​សិរីសោភ័ណ ត្រឡប់​ទៅ​ប៉ោយប៉ែ​ត​វិញ ដោយ​ចាប់ផ្តើម​ពី​ម៉ោង​៧​ព្រឹក និង​ចប់​នៅ​ម៉ោង​៥​និង​១៥​នាទី​ល្ងាច ។ ក្នុង​ដំណើរការ​ដំបូង​នេះ ខ្សែ​រថភ្លើង​មាន​ទូ​អ្នកដំណើរ​បំពាក់​កៅអី​ពូក និង​ម៉ាស៊ីនត្រជាក់ ១​ទូ និង​ទូ​ដឹក​អីវ៉ាន់​១៕ (​ដោយ​៖ គង់ ឧត្តម​)

ព័ត៌មានផ្សេងទៀត