Facebook​​បញ្ជាក់ថា​​គណនី​​ប្រមាណ​​៨៧​លាន​​ត្រូវបាន​​គេ​លួច​យក​​ទិន្នន័យ​​ទៅ​ប្រើប្រាស់​

05-04-2018 1:54 pm 842
រូបភាព​ក្រុមហ៊ុនហ្វេសប៊ុក

​កន្លងមក​ក្រុមហ៊ុន​Facebook​បានប្រកាសថា មាន​ទិន្នន័យ​នៅលើ​គណនី​អ្នកប្រើប្រាស់​ប្រមាណ​៥០​លាន​គណនី ត្រូវបាន​គេ​លួច​យកទៅ​ប្រើប្រាស់​។ ក្រុមហ៊ុន​ដែល​ពាក់ព័ន្ធ​នឹង​ការចូល​លួច​ទិន្នន័យ​អ្នកប្រើប្រាស់​Facebook គឺ​ក្រុមហ៊ុន​Cambridge Analytica​របស់​អង់គ្លេស ដែល​ត្រូវបាន​ជួល​ឲ្យធ្វើ​យុទ្ធនាការ​ឃោសនាបោះឆ្នោ​ត​ប្រធានាធិបតី​ដូ​ណាល់ ត្រាំ​កន្លងមក​។ ប៉ុន្ដែ​ក្រុមហ៊ុន​នេះ​បាន​ច្រានចោល​ការចោទប្រកាន់​។

​ដ្បិត​បានប្រកាសថា មាន​ទិន្នន័យ​សម្ងាត់​នៅលើ​គណនី​ប្រមាណ​តែ​៥០​លាន​ត្រូវបាន​គេ​លួច ប៉ុន្ដែ​កាលពី​ថ្ងៃទី​០៤​មេសា​ក្រុមហ៊ុន​Facebook បានបង្ហាញ​ចំនួន​ពិតប្រាកដ​មាន​រហូតដល់​៨៧​លាន​គណនី​ឯណោះ​។ ក្នុងចំណោម​៨៧​លាន​គណនី មាន​៧០​លាន​ជា​គណនី​នៅ​អាមេរិក ហ្វីលីពីន ឥណ្ឌូនេស៊ី នៅ​អង់គ្លេស​មាន​១​លាន​គណនី និង​នៅ​វៀតណាម​មាន​៤០​ម៉ឺន​គណនី​ផងដែរ​។​

​ទន្ទឹមគ្នានេះ Facebook​ក៏​បានបង្ហាញ​ពី​ការផ្លាស់ប្ដូរ​មួយចំនួន សម្រាប់​ទប់ស្កាត់​ការ​លួច​ទិន្នន័យ​អ្នកប្រើប្រាស់​បន្ដទៀត​។ គួរ​បញ្ជាក់ថា ចាប់តាំងពី​មាន​ព័ត៌មាន​បែកធ្លាយ​ពី​ការ​លួច​យក​ទិន្នន័យ​អ្នកប្រើប្រាស់ ក្រុមហ៊ុន Facebook​កំពុង​ប្រឈម​នឹង​ការរិះគន់​យ៉ាងខ្លាំង ទាក់ទង​នឹង​សុវត្ថិភាព​នៃ​ការរក្សា​ទិន្នន័យ​សម្ងាត់​របស់​អ្នកប្រើប្រាស់​៕

ព័ត៌មានផ្សេងទៀត