លោក​ស៊ី ជីន​ពីង​​ចង់ឲ្យ​ចិន​​ស្ថិតក្រោម​​ការដឹកនាំ​រ​បស់​​មនុស្ស​តែ​ម្នាក់​​គ្មាន​​ការផ្លាស់ប្ដូរ​?

27-02-2018 5:03 pm
ប្រធានាធិបតីចិនលោកស៊ី ជីនពីង

​ការព្រួយបារម្ភ​បាន​កើតឡើង​កាន់តែខ្លាំង ចំពោះ​ការសម្រេច​របស់​គណបក្ស​កុម្មុយនីស្ដ​ចិន ស្នើឲ្យ​លុបចោល​ការកំណត់​អាណត្ដិ​ប្រធានាធិបតី​។ គណៈកម្មាធិការ​កណ្ដាល​បាន​ស្នើឲ្យ​ផ្លាស់ប្ដូរ​ការកំណត់​អាណត្ដិ​ប្រធានាធិបតី​ចេញពីរដ្ឋធម្មនុញ្ញ​។ តាម​រដ្ឋធម្មនុញ្ញ​ប្រធានាធិបតី​អាច​កាន់អំណាច​បានតែ​ពីរ​អាណត្ដិ​ប៉ុណ្ណោះ​ស្មើនឹង​១០​ឆ្នាំ​។ តើ​ផែនការ​ដែល​គណបក្ស​កុម្មុយនីស្ដ​ចិន​បង្ហាញ​នេះ ជា​ចេតនា​ចង់​ពង្រីក​អំណាច​គ្រប់គ្រង​ប្រទេស ឲ្យ​ស្ថិតក្រោម​ការដឹកនាំ​រប​ស់មនុស្ស​តែ​ម្នាក់​ដូច​សម័យ​លោក​ម៉ៅ សេទុង​គ្រប់គ្រង​ប្រទេស​ចិន​ឬ​យ៉ាងណា​?

​ជា​បន្ដ​សូម​ស្ដាប់​សេចក្ដីរាយការណ៍​ពិស្ដារ​ពី​ពេញ ផេង នៅក្នុង​នាទី​វិភាគ​ព្រឹត្ដិការណ៍​អន្ដ​រ​ជាតិ​ដូចតទៅ​៖

​សំឡេង​៖

​សារព័ត៌មាន​រដ្ឋ​ចិន​ស៊ីន​ហ៊ួ​រ​បាន​ចេញផ្សាយ​ជា​សាធារណៈ​កាលពី​ថ្ងៃអាទិត្យ​ទី​២៥​កុម្ភៈ ហើយ​ត្រូវបាន​សារព័ត៌មាន​អន្ដរជាតិ​នានា​ដកស្រង់​ទៅ​ចុះផ្សាយ​បន្ដ រឿង​ដែល​ចិន​ស្នើឲ្យ​លុបចោល​ការកំណត់​អាណត្ដិ​ប្រធានាធិបតី​។ គណៈកម្មាធិការ​កណ្ដាល​បក្ស​កុម្មុយនីស្ដ​ចិន បានស្នើ​ឲ្យធ្វើ​វិសោធនកម្ម​រដ្ឋធម្ម​នុ​ញ្ញ ដកចេញ​ការកំណត់​អាណត្ដិ​ប្រធានាធិបតី​ដែលបាន​ចែកក្នុង​រដ្ឋធម្មនុញ្ញ ត្រឹមតែ​ពីរ​អាណត្ដិ​ស្មើនឹង​១០​ឆ្នាំ​។ ការធ្វើ​ដូច្នេះ​អាចជួយ​ពង្រឹង​ដល់​មេដឹកនាំ​ប្រទេស​ចិន នេះ​បើតាម​ការចុះផ្សាយ​របស់​សារព័ត៌មាន​រដ្ឋ​ស៊ីន​ហ៊ួ​រ​។​

សំណើ​ដែល​បានដាក់​នឹងត្រូវ​លើកយក​ទៅ​ពិភាក្សា ក្នុង​សមាជ​សភាជាតិ​នៅ​ខែ​មីនាឆ្នាំ​២០១៨​នេះហើយ​។ បើសិនជា​ត្រូវ​បានអនុម័ត​មែន​នោះ លោក​ប្រធានាធិបតី​ស៊ី ជីន​ពីង​នឹង​អាច​បន្ដ​កាន់តំណែង​ប្រធានាធិបតី​ដល់​ក្រោយ​ឆ្នាំ​២០២៣ បើទោះបី​លោក​ចប់​អាណត្ដិទីពី​រហើ​យក្ដី​។ ការព្រួយបារម្ភ​បាន​កើតឡើង​កាន់តែខ្លាំង បានរ​ម្ភ​ខ្លាច​ការផ្លាស់ប្ដូរ​នេះ​ធ្វើឲ្យប៉ះពាល់​ដល់​ស្ថិរភាព​នៅ​ចិន ទាំង​នយោបាយ សេដ្ឋកិច្ច និង​សន្ដិសុខ​សង្គម​។

តើ​លោ​ស៊ី ជីន​ពីង​ពិតជា​ចង់ឲ្យ​ចិន​ស្ថិតក្រោម​ការគ្រប់គ្រង​របស់​មនុស្ស​តែ​ម្នាក់​ដូច​សម័យកាល របស់ លោក​ម៉ៅ សេទុង​ឬយ៉ាងណា?

​ទោះបី​លោក​ស៊ី​មិន​បានបញ្ជាក់ ប៉ុន្ដែ​វា​ហាក់​ឆ្លុះបញ្ចាំង​ឲ្យឃើញ​រួចទៅហើយ​ពី​ចេតនា​ចង់​បំប៉ោង​អំណាច​គ្រប់គ្រង​ប្រទេស​។ ការស្នើ​ធ្វើឡើង​ដោយ​គណបក្ស​កុម្មុយនីស្ដ​ចិន ក្រោម​ការដឹកនាំ​របស់​លោក អ្នកវិភាគ​ជាច្រើនរូប​បាន​បញ្ចេញ​ប្រតិកម្ម ព្រោះ​ពួកគេ​បាន​ឃ្លាំមើល​មិន​ដាក់​ភ្នែក​ពី​ស្ថានភាព​នៅក្នុង​ប្រទេស​ចិន​។ ក្រុមអ្នកវិភាគ​លើកឡើងថា គោលបំណង​ចង់​ដកចេញ​ការកំណត់​អាណត្ដិ​ប្រធានាធិបតី វា​ដូចជា​ការបង្ហាញ​ពី​អំណាច​ផ្ដាច់ការ ហើយ​អាចជា​ចំណុចខ្សោយ​ផងដែរ ដែល​លោក​ស៊ី​មិន​ចង់ឲ្យមាន​គូប្រជែង​នយោបាយ​លេច​មុខ​ឡើង​។ ធ្វើបែបនេះ​អាចដឹកនាំ​ប្រទេស​ចិន​ទៅ​ជួប​បញ្ហា​អស្ថរិភាព​នៅ​ពេលអនាគត​។ លោក​ស៊ី​ក៏​អាច​ក្លាយជា​មនុស្ស​ងាយ​រងគ្រោះ ក្នុង​កាលៈទេសៈ​ដែលមាន​វិបត្ដិ​សេដ្ឋកិច្ច​ឬ​នយោបាយ​ការបរទេស​កើតឡើង​។​

លោក​Michael Dutton​ជា​សាស្ដ្រាចារ្យ​ទំនាក់ទំនង​អន្ដរជាតិ​នៃ​សាកលវិទ្យាល័យ​Goldsmiths University និង​លោក​Robert Weatherley ជា​គ្រូបង្រៀន​ផ្នែក​នយោបាយ​ចិន​នៅ​សាកលវិទ្យាល័យ Cambridge បាន​មើលឃើញ​ដូច្នេះ​ថា ចាប់តាំងពី​ចូល​កាន់តំណែង​ក្នុង​ឆ្នាំ​២០១២ លោក​ស៊ី ជីន​ពីង​បាន​បង្កើន​យុទ្ធនាការ​ប្រឆាំង​និង​ចាប់ខ្លួន​សកម្មជន​ដែល​ប្រឆាំង​រដ្ឋាភិបាល​។ លោក​បាន​បង្ក្រាប​យ៉ាង​ចាស់ដៃ​លើ​ប្រព័ន្ធ​ផ្សព្វផ្សាយ​ឯករាជ្យ និង​អ្នក​ដែល​បញ្ចេញមតិ​តាម​បណ្ដាញ​សង្គម​នានា​។ ក្រុម​អ្នក​រិះគន់​ចាប់ផ្ដើម​ព្រួយបារម្ភ​កាន់តែខ្លាំង ហើយក៏​ពិបាក​ជាង​មុន​នៅពេល​ពួកគេ​បញ្ចេញ​ទស្សនៈ​ប្រឆាំង​បក្ស​កុម្មុយនីស្ដ​ចិន​។ លោក​ស៊ី​កំពុង​បង្កើត​បរិយាកាស​ដែល​មិន​ខុសគ្នា​ប៉ុន្មាន​ឡើយ​ពី​លោក​ម៉ៅ សេទុង​។​

​លោក​ប្រធានាធិបតី​ស៊ី ជីន​ពីង​ក៏បាន​ពង្រឹង​អំណាច​នៅ​ជុំវិញខ្លួន ដែល​មិន​ត្រូវបាន​គេ​មើលឃើញ​ឡើយ​។ លោក​ស៊ី​បានធ្វើ​រឿង​ជាច្រើន បើ​ប្រៀបធៀប​ទៅ​លោក​តេង ស៊ា​វ​ពីង​ជា​មេដឹកនាំ​ចិន​ល្បីឈ្មោះ​ម្នាក់​ដែរនោះ គឺ​ខុសគ្នា​ស្រឡះ​។ លោក​ស៊ី​បាន​តម្រែតម្រង់​ផ្លូវ​នយោបាយ​របស់លោក ដោយ​ធ្វើជា​ប្រធានាធិបតី​ផង​និង​ជា​អគ្គលេខាធិការ​បក្ស​កុម្មុយនីស្ដ​ផង មានអំណាច​ច្បាស់លាស់​ពិតប្រាកដ​។ ចំណែក​លោក​ស៊ា​វ​ពីង​បាន​ដឹកនាំ​ប្រទេស​ចិន​មែន ប៉ុន្ដែ​គ្មាន​អំណាច​ជាក់លាក់​ទេ មានន័យថា​លោក​ជា​ក្រុមប្រឹក្សា​យោធា ប៉ុន្ដែ​លោក​មិនមែនជា​អគ្គលេខាធិការ​បក្ស​ឡើយ ក្នុងអំឡុងពេល​ធ្វើជា​មេដឹកនាំ​កំពូល​។​

បើ​គិត​តាំងពី​លោក​ម៉ៅ សេទុង​ស្លាប់​ក្នុង​ឆ្នាំ​១៩៧៦ នៅ​ឆ្នាំ​១៩៨២​ក៏មាន​ការកំណត់​អាណត្ដិ​ប្រធានាធិបតី នៅពេល​មាន​បដិវត្ដន៍​វប្បធម៌​។ អ្នកដឹកនាំ​ជំនាន់​ក្រោយ​បាន​ផ្លាស់ប្ដូរ​ចេញ​ការគ្រប់គ្រង​ប្រទេស​ដោយ​មនុស្ស​តែ​ម្នាក់ ទៅរក​ប្រព័ន្ធ​ឯកភាព​មួយ​ដែល​អំណាច​ត្រូវបាន​ចែករំលែក​ដោយ​មន្ដ្រី​គណបក្ស​មាន​ឋានៈ​ខ្ពស់​។ តាំងពី​ពេល​នោះមក​ការផ្ទេរអំណាច​បាន​ធ្វើឡើង​ជា​បន្ដបន្ទាប់ គឺ​ពី​លោក​ប្រធានាធិបតី​ជាំ​ង ហ្សេ​មីន​ទៅ​លោក​ហ៊ួ ជីន​តាវ​ក្រោយមក​ទៅ​លោក​ស៊ី ជីន​ពីង សុទ្ធតែ​បាន​កាន់តំណែង​ពីរ​អាណត្ដិ​។

ប៉ុន្ដែ​នៅក្នុង​អាណត្ដិទី​មួយ​របស់លោ​ក​ស៊ី បាន​ស្ដែង​ឲ្យឃើញថា​លោក​បានខិត​ខំប្រឹងប្រែ​ង​ឲ្យមាន​និន្នាការ​ពង្រឹង​អំណាច​។ លោក​ត្រូវ​បានប្រកាស​ជា​មេដឹកនាំ​ស្នូល​របស់​បក្ស ហើយ​ទស្សនៈ​របស់លោក​បាន​បញ្ចូល​ក្នុង​រដ្ឋធម្មនុញ្ញ​ទៀត​។ អ្វីដែល​គួរឲ្យកត់សម្គាល់ ក្នុងពេល​លោក​ស៊ី​កាន់តំណែង លោក​បាន​ព្យាយាម​យ៉ាងខ្លាំង​ក្នុង​ការបង្ក្រាប​អំពើពុករលួយ​។ មើល​តែ​ម្ខាង​យុទ្ធនាការ​នេះ​ពិតជា​មាន​សារៈសំខាន់​ណាស់​នៅក្នុង​សង្គម​ចិន តែបើ​មើល​ម្ខាង​ទៀត​លោក​ស៊ី​បាន​ព្យាយាម​បង្ក្រាប​លើ​គូប្រជែង​ក្នុង​បក្ស​ដែលមាន​សក្ដានុពល​។

​គួរ​បញ្ជាក់ថា ការប្រកាស​ស្នើសុំ​លុបចោល​ការកំណត់​អាណត្ដិ​ប្រធានាធិបតីរបស់​ចិ​ន ក៏​ជា​សារ​មួយ​ប្រាប់​ទៅដល់​គូសត្រូវ​ថា បុរស​ខ្លាំង​ស៊ី ជីន​ពីង​ជា​មេដឹកនាំ​គណបក្ស​កុម្មុយនីស្ដ​ចិន​នឹងមិន​ចាកចេញ​ទៅណា​ឡើយ លោក​អាច​បន្ដ​ដឹកនាំ​ប្រទេស​ចិន​បាន​ច្រើន​ឆ្នាំ​ទៀត​។ អាមេរិក​ដែលជា​គូប្រជែង​ធំ​របស់​ចិន​ក្នុង​ពិភពលោក ក៏​មិនអាច​មើលស្រាល​ចិន​បានដែរ ដ្បិតថា​តំណែង​មហាអំណាច​សេដ្ឋកិច្ច​លេខ​មួយ​ក្នុង​លោក​នឹង​ធ្លាក់​ក្នុង​កណ្ដាប់ដៃ​ចិន​ឆាប់ៗ បើ​អាមេរិក​ហ៊ាន​តែ​ប្រហែស​មួយ​ពព្រិច​ភ្នែក​៕​

ព័ត៌មានផ្សេងទៀត