ជំហាន​បន្ទាប់ ​ក្រោយ​ច្បាប់​ស្តីពី​​ការចែក​​អាសនៈ​​បក្ស​ដែល​​រំលាយ​​ចូល​​ជា​​ធរមាន​​

ដោយ៖ អឿន ភារ៉ា 26-10-2017 4:18 pm 843
រូបភាព៖ Gettyimages/Jerry Redfern

​ការ​ឡាយព្រះហស្តលេខា​ទៅលើ​ច្បាប់​ទាំង​៤ ដែល​មិនមាន​ការចូលរួម​អនុម័ត​ពី​តំណាងរាស្ត្រ​គណបក្សប្រឆាំង​នាពេលនេះ បាន​ធ្វើឡើង​បន្ទាប់ពី​សេចក្តីស្នើ​វិសោធនកម្ម​ច្បាប់​ទាំងនេះ ទទួលបាន​ការគាំទ្រ​ជា​បន្តបន្ទាប់​ពី​រដ្ឋសភា ព្រឹទ្ធសភា និង​ក្រុម​ប្រឹក្សា​ធម្ម​នុញ្ញ​​។ ស្ថាប័ន​កំពូលៗ​ទាំងនេះ អះអាងថា សេចក្តីស្នើច្បាប់​ទាំង​៤ គឺ​ត្រឹមត្រូវ​ស្របតាម​រដ្ឋធម្មនុញ្ញ​។

​ក្រោយពេល​ច្បាប់​នេះ​បាន​ចូល​ជា​ធរមាន​រួចហើយនោះ ហាក់​ផ្ទុយ​ពី​បំណង​របស់គណបក្ស​សង្គ្រោះ​ជាតិ និង​សហគមន៍​អន្តរជាតិ រួមទាំង​ពលរដ្ឋ​មួយចំនួន​ជា​អ្នកគាំទ្រ ព្រោះ​អ្នក​ទាំងនោះ មាន​ការ​បារម្ភ និង​មិន​ចង់ឲ្យ​យក​ច្បាប់ដែល​កែប្រែ​នេះមក​អនុវត្ត​ឡើយ ដោយ​ពួកគេ​យល់ថា ច្បាប់​ទាំង​៤ ដែលមាន​ចេតនា​យក​អាសនៈ​សភា និង​ក្រុមប្រឹក្សាឃុំ​-​សង្កាត់​របស់​បក្សប្រឆាំង ទៅ​ច្រៀក​ចែក​ឲ្យ​គណបក្សនយោបាយ​ផ្សេងទៀត ជាការ​ផ្តួល​គូរ​ប្រកួត​មុន​ការបោះឆ្នោត និង​អយុត្តិធម៌​ធ្ងន់ធ្ងរ​ចំពោះ​សំឡេង​ម្ចាស់ឆ្នោត​។​

​បែបនេះ​ក្តី អ្នកនាំពាក្យ​រដ្ឋាភិបាល លោក​ផៃ ស៊ី​ផាន លើកឡើងថា ការបារម្ភ​របស់​មជ្ឈដ្ឋាន​នានា​ជុំវិញ​ច្បាប់​នេះ គឺជា​សិទ្ធិ​​ដាច់​ដោយឡែក​របស់​អ្នក​ទាំងនោះ​។ លោក​បញ្ជាក់​ជាថ្មី​ថា ច្បាប់​នេះ​ត្រូវតែ​អនុវត្តឲ្យ​បានដិតដ​ល់ និង​មិន​ប្រឆាំង​រដ្ឋធម្មនុញ្ញ​ជាដាច់ខាត​។ លោក​ផៃ ស៊ី​ផាន បន្ថែម​...
​សំឡេង​លោក​ផៃ ស៊ី​ផាន​៖

​គួរ​បញ្ជាក់ថា ច្បាប់​ទាំង​៤ ដែល​ព្រះមហាក្សត្រ​ឡាយព្រះហស្តលេខា និង​ត្រូវ​បានដាក់ឲ្យ​អនុវត្តជា​ផ្លូវ​ការហើយ រួមមាន​៖ ច្បាប់​ស្តីពី​វិសោធនកម្ម​ច្បាប់ ស្តីពី​ការបោះឆ្នោត​ជ្រើសតាំង​តំណាងរាស្ត្រ​, ច្បាប់​ស្តីពី​វិសោធនកម្ម​ច្បាប់​ស្តីពី​ការបោះឆ្នោត​ជ្រើសតាំង​សមាជិក​ព្រឹទ្ធសភា​, ច្បាប់​ស្តីពី​វិសោធនកម្ម​ច្បាប់ ស្តីពី​ការបោះឆ្នោត​ក្រុមប្រឹក្សាឃុំ​-​សង្កាត់ និង​ច្បាប់​ស្តីពី​វិសោធនកម្ម​ច្បាប់ ស្តីពី​ការ​បោះ​ឆ្នោត​ជ្រើស​រើស​ក្រុមប្រឹក្សា​រាជធានី ក្រុមប្រឹក្សា​ខេត្ត​ ក្រុង​ ​ស្រុក​ ខណ្ឌ​។​

​មែនទែនទៅ ច្បាប់​ដែល​កើតចេញពី​ការផ្តួចផ្តើម​របស់​ក្រុមតំណាងរាស្ត្រ​គណបក្ស​ប្រជាជន​កម្ពុជា ត្រូវបាន​គេ​ដឹងថា នឹងត្រូវ​​យក​ទៅអនុវត្ត​ដំបូង​ទៅលើ​គណបក្ស​សង្គ្រោះ​ជាតិ​នៅពេល​គណបក្ស​នេះ​ ត្រូវ​រំលាយចោល​មែន​នោះ ព្រោះថា គណបក្សប្រឆាំង​ដ៏​ធំ​មួយ​នេះ កំពុង​រង​បណ្តឹង​ស្នើសុំ​រំលាយចោល​នៅ​តុលាការ​កំពូល ដែល​ចៀស​មិន​ផុតពី​ការរំលាយ​។

​បានជា​គេ​និយាយថា ច្បាប់​នេះ​នឹង​បើកផ្លូវ​ឲ្យមាន​ការបែងចែក​អាសនៈគ​ណ​បក្ស​ដែល​ត្រូវ​រំលាយ​ឲ្យទៅ​គណបក្ស​ដទៃ ព្រោះ​នៅក្នុង​មាត្រា​១៣៨ស្ទួន នៃ​ច្បាប់​ស្តីពី ការបោះឆ្នោត​ជ្រើសតាំង​តំណាង​រាស្ត្រ បាន​កំណត់ថា​៖ «​ក្នុង​នីតិកាល​នៃ​រដ្ឋសភា ប្រសិនបើ​មាន​គណបក្សនយោបាយ ណាមួយ​ប្រកាស​បោះបង់ចោល​អាសនៈ ឬ​ត្រូវ​លុបឈ្មោះ​ចេញពី​បញ្ជី​គណបក្សនយោបាយ ឬ​ត្រូវ​រំលាយ ស្រប​តាម​ច្បាប់​ស្តីពី​គណបក្សនយោបាយ បញ្ជី​បេក្ខជន និង​តំណាងរាស្ត្រ​ទាំងអស់ នៃ​គណបក្សនយោបាយ​នោះ លែងមាន​សុពលភាព និង​លែងមាន​គុណសម្បត្តិ​តទៅ​ទៀតហើយ​»​។​

​មាត្រា​ដដែល​បញ្ជាក់ថា គណៈកម្មាធិការ​ជាតិ​រៀបចំ​ការបោះឆ្នោត (​គ​.​ជ​.​ប​) ត្រូវធ្វើ​ការបែងចែក​អាសនៈ​ដែល​នៅ​ទំនេរ​នោះ ក្នុង​រយៈពេល​យ៉ាងយូរ ៧​ថ្ងៃ ទៅឲ្យ​គណបក្ស​នានា ដែល​បាន​ចូលរួម​ក្នុង​​ការបោះឆ្នោត ក្នុង​រាជធានី​-​ខេត្ត​...​។ ចំណែក​ខ្លឹមសារ​នៃ​ច្បាប់ ៣​ផ្សេងទៀត ក៏មាន​អត្ថន័យ​ប្រហាក់ប្រហែលគ្នា​ដែរ គឺ​ទាក់ទង​ទៅនឹង​ការ​អស់​សុពលភាព​បញ្ជី​ឈ្មោះ​គណបក្ស​ដែល​ត្រូវ​រំលាយ និង​ការបែងចែក​អាសនៈ​ថ្នាក់មូលដ្ឋាន​ទៅឲ្យ​គណបក្ស​ដទៃ​។ ពោលគឺ​គណបក្ស​សង្គ្រោះ​ជាតិ ​នឹងត្រូវ​បាត់បង់​តំណែង​ទាំងអស់ ប្រសិន​បើ​​គណបក្ស​នេះ​ត្រូវគេ​រំលាយ​មែន​នោះ​។​

​មកទល់ពេលនេះ មន្ត្រី​មួយចំនួន​របស់​គណបក្ស​សង្គ្រោះ​ជាតិ នៅ​រក្សា​ជំហរ​ស្ងប់ស្ងាត់​នៅឡើយ ពោលគឺ​មិនទាន់មាន​ការធ្វើ​អត្ថាធិប្បាយ​បន្ថែម ជុំវិញ​ច្បាប់​ដែល​ចូល​ជា​ធរមាន​នេះ​នោះទេ​។ គណ​បក្សប្រឆាំង​ធ្លាប់បាន​ហៅ​ការសម្រេច​លើ​ច្បាប់​នេះ​ជាការ «​ប្លន់​ឆន្ទៈ​ប្រជាពលរដ្ឋ​» យ៉ាង​កម្រោល ហើយ​ថា អ្នកទទួលយក​អាសនៈ​នេះ​ជា​អ្នក «​ទទួលផល​ចោរកម្ម​»​។ ក៏ប៉ុន្តែ សមាជិកសភា និង​រដ្ឋាភិបាល​ដែល​ដឹកនាំ​ដោយ​គណបក្ស​ប្រជាជន​កម្ពុជា បាន​អះអាងថា ការធ្វើ​វិសោធនកម្ម​ច្បាប់​ទាំង​៤​នេះ គឺជា​ភាពចាំបាច់ ដើម្បី​ស្ថិរភាព​នយោបាយ និង​គ្មាន​បំណត​បំផ្លាស​គណបក្ស​ណាមួយ​ឡើយ​​។​

​រីឯ លោក​នាយករដ្ឋមន្ត្រី ហ៊ុន សែន ក៏បាន​ចេញមុខ​ការពា​រ ដោយ​លោក​អះអាងថា ច្បាប់​នេះ​គឺ​សម្រាប់​អនុវត្ត​គ្រប់​​គណ​បក្ស​នយោបាយ​​ទាំងអស់​។ បក្សនយោបាយ​ណា​ខុស ត្រូវតែ​រំលាយ ទោះបី​ជា​​គណបក្សកាន់អំណាច​ខុស ក៏ត្រូវ​រំលាយ​ដែរ​។ សូម​ស្តាប់​ប្រសាសន៍​របស់លោក​ហ៊ុន សែន បន្ថែម​...
​សំឡេង​លោក​ហ៊ុន សែន​៖

​ជាមួយគ្នានេះ​ លោក​ហ៊ុន សែន ថ្នាក់ដឹកនាំ​គណបក្ស​ប្រជាជន​កម្ពុជា បាន​ទាំង​ប្រកាស​ស្វាគមន៍​មេឃុំ ចៅសង្កាត់ ឬ​សមាជិក​ក្រុមប្រឹក្សា នៅពេល​គណបក្ស​សង្គ្រោះ​ជាតិ ត្រូវ​រំលាយ​នាពេល​ខាង​មុខ​ ឲ្យមក​ចូលរួម​ជីវភាពនយោបាយ​ជាមួយ​គណបក្ស​ប្រជាជន​កម្ពុជា ដោយ​អាច​រក្សា​តួនាទី​នៅ​ដដែល​។ ក៏មាន​អ្នកតំណាងរាស្ត្រ និង​មន្ត្រី​ថ្នាក់មូលដ្ឋាន​របស់​គណ​បក្សប្រឆាំង​មួយ​ចំនួន​​ហើយ បាន​​សម្រេចចិត្ត​ចុះ​ចូលក្នុង​ដំបូង​តែមួយ ជាមួយ​គណបក្សកាន់អំណាច​។​

យ៉ាងណា​ក៏ដោយចុះ សម្រាប់​ជំហាន​បន្ទាប់​ក្នុង​គ្រា​ដែល​ច្បាប់​នេះ បាន​ចូល​ជា​ធរមាន​រួចហើយ គេ​កំពុង​រង​ចាំង​មើល​ថា តើ​អាសនៈ​តំណាងរាស្ត្រ​៥៥ និង​អាសនៈ​ក្រុមប្រឹក្សាឃុំ​-​សង្កាត់​ជាង​៥០០០ របស់​គណបក្ស​សង្គ្រោះ​ជាតិ ដែល​អាសនៈ​ទាំងនេះ បោះឆ្នោត​គាំទ្រ​ដោយ​ប្រជាពលរដ្ឋ នឹងត្រូវ​យកទៅ​បែងចែកឲ្យ​គណបក្សនយោបាយ​ផ្សេងទៀត ដែល​ពលរដ្ឋ​មិនបាន​​បោះ​ឆ្នោត​ឲ្យ ​ឬក៏​យ៉ាង​ណា​​?

ព័ត៌មានផ្សេងទៀត