គ្មាន​គណបក្ស​សង្គ្រោះ​ជាតិ​​ការបោះឆ្នោត​​នឹង​ទៅជា​​យ៉ាងណា​?​

ដោយ៖ ខាត់ សុធី 16-10-2017 4:33 pm 1669

​អ្នកវិភាគ​យល់ថា ដំណើរការ​រំលាយ​គណ​បក្ស​សង្គ្រោះ​ជាតិ ហាក់​ធ្វើតាម​សេណារីយោ ដូច​បាន​គ្រោងទុក​។​ទៅមុខ​ទៀ​តុលាការ​កំពូល ក៏​មិន​ខុសគ្នា​ពី​សភា នៅ​ថ្ងៃ នេះដែរ​។ លោក​មាស នី បាន​បង្ហើប​នូវ​សេណារីយោ​៣​ទាក់ទង​នឹង​ស្ថានការណ៍​បោះឆ្នោត គឺ​អាចមាន​ការបោះឆ្នោត​តាមរបៀប​រិត​ត្បិត​ក៏​អាច​កើតមាន​,​បោះឆ្នោត​ដោយ​សេរី​ក៏​អាចមាន និង​មិនមាន​ការបោះឆ្នោត​ក៏​អាច​កើតមាន​បានដែរ​។​ខាត់ សុធី រាយការណ៍​៖

​ដំណើរការ​រំលាយ​គណ​បក្ស​សង្គ្រោះ​ជាតិ បាន​ដើរ​ទៅមុខ​មិន​ថយក្រោយ​។​ក្រសួងមហាផ្ទៃ បានដាក់​ពាក្យបណ្តឹង​ទៅ​តុលាការ​កំពូល ដើម្បី​ប្តឹង​រំលាយ​គណបក្សប្រឆាំង​ដ៏​ធំ​នៅ​កម្ពុជា គឺជា​អ្វីដែល​បាន​កើតឡើង ហាក់ដូចជា​ធ្វើឲ្យ​សេណារីយោ​ទាំងអស់ បាន​បំពេញ​ទៅតាម​មុខងារ​រៀងៗ​ខ្លួន​។​

​ការអនុម័ត​ច្បាប់​ស្តីពី​គណបក្សនយោបាយ​ម្ដង​ហើយ​ម្ដងទៀត និង​យ៉ាង​ឆាប់រហ័ស ជា​អំណោយផល នាំឲ្យ​ការរំលាយ​គណបក្ស​សង្គ្រោះ​ជាតិ​ងាយស្រួល​ជាង​បក​ចេក​។​

​នៅថ្ងៃនេះ​ក្រុមតំណាងរាស្ត្រ​របស់​គណ​បក្ស​ប្រជាជន បានអនុម័ត​យ៉ាង​ប្រញាប់ នូវ​វិសោធនកម្ម​ច្បាប់បោះឆ្នោត​ចំនួន​៤ ពាក់ព័ន្ធ​នឹង​ការរំលាយ​គណបក្សនយោបាយ  គឺ​វិសោធនកម្ម​ច្បាប់ ស្តីពី​ការបោះឆ្នោត ជ្រើសតាំង​តំណាងរាស្ត្រ​, វិសោធនកម្ម​ច្បាប់​ស្តីពី​ការបោះឆ្នោត​ជ្រើសតាំង​ព្រឹទ្ធសភា​, វិសោធនកម្ម ច្បាប់​ស្តីពី​ការបោះឆ្នោត​ជ្រើសរើស​ក្រុមប្រឹក្សាឃុំ​/​សង្កាត់ និង វិសោធនកម្ម ច្បាប់​ស្តីពី​ការ បោះឆ្នោត ជ្រើសរើស​ក្រុមប្រឹក្សា​រាជធានី ខេត្ត ក្រុង ស្រុក ខណ្ឌ​។ វិសោធនកម្ម​នេះ​គឺជា​ការបើកផ្លូវ ដើម្បី​អាច​ដកហូតយក​អាសនៈ​ចំនួន ៥៥ របស់​គណបក្ស​សង្គ្រោះ​ជាតិ​ទៅ​បែងចែក​ឲ្យ​គណបក្ស​ផ្សេង ដែល​ពុំមាន​អាសនៈ​នៅក្នុង​រដ្ឋសភា បើទោះជា​គណបក្សប្រឆាំង​ចាត់ទុក​ករណីនេះ ថា​ជាការ​ប្លន់​ឆន្ទៈ​ប្រជាពលរដ្ឋ​ក៏ដោយ​។​

​អ្នកតាមដាន​ស្ថានការណ៍​សង្គម​នៅ​កម្ពុជា លោក​បណ្ឌិត​មាស នី លើកឡើងថា ពេលនេះ អ្វីៗ​ដំណើរការ​ទៅ យ៉ាង​រលូន តាម​ការគ្រោងទុក​។​លោក​បន្ថែមថា ទៅមុខទៀត​តុលាការ​កំពូល ក៏​មិន​ខុសគ្នា​ពី​សភា នៅថ្ងៃនេះ​ដែរ​។ ដូច្នេះ​ថ្ងៃ​អន្សា​របស់​គណបក្សប្រឆាំង​គឺ​ស្ថិតក្នុង​កណ្តាប់ដៃ របស់​គណបក្សកាន់អំណាច តែមួយ​ប៉ុណ្ណោះ​។ ប៉ុន្តែ​បើ​គណបក្ស​នេះ មិន​ចែក​ចានឆ្នាំង​ទៅរក​ទ្រនំ​ចាស់ ហើយ​ចាប់យក​ទ្រនំ​ចាស់​តែមួយ ក្នុងចំណោម​ទាំងពីរ និង​ប្រកាសប្រាប់​អ្នកគាំទ្រ ឲ្យបាន​មុន​ការបោះឆ្នោត នោះ​ការប្រកួតប្រជែង ក៏​នៅតែ​លំបាក​សម្រាប់​គណបក្ស​ប្រជាជន​ដដែល​......

​សំឡេង​លោក​មាស នី​៖

​ប៉ុន្តែ​លោក​មាស នី នៅតែ​ព្រួយបារម្ភ​ខ្លាច​គណបក្ស​សង្គ្រោះ​ជាតិ បែកបាក់​ក្បាលម៉ាស៊ីន​ខាងលើ ដែល​មហាជន​កំពុងតែ​តាមដាន​មើល​។​ផ្ទុយទៅវិញ បើ​ផ្ទៃក្នុង​រឹងមាំ សន្ទុះ​គាំទ្រ​នៃ​គណបក្ស​នេះ នៅតែ​ខ្លាំង​។​

​លោក​មាស នី បាន​ប្រមើលមើល​ថា ក្នុងដំណាក់កាល​ផុយស្រួយ​នេះ ប្រសិនបើ​ផ្ទុះ​ការតវ៉ា ក្រោយពេល​រំលាយ​គណបក្ស​សង្គ្រោះ​ជាតិ នឹង​អាចមាន​សេណារីយោ​មួយទៀត​កើតឡើង គឺ​ប្រកាស​ភាពអាសន្ន ហើយ​អាច​នឹង​មិនមាន​ការបោះ​ឆ្នោត ឬ​ពន្យារ​ការបោះឆ្នោត​ដូច​នៅ​ប្រទេស​ថៃ​ដែរ ក៏​ថា​បាន​.....

​សំឡេង​លោក​មាស នី​៖

​លោក​មាស នី និយាយ​ដោយ​ខ្លី​ថា អ្វីៗ វា​ស្ថិតនៅលើ​រដ្ឋាភិបាល ពោលគឺ​លទ្ធភាព​មានដូចជា អាចមាន​ការបោះឆ្នោត​តាមរបៀប​រឹតត្បិត​ក៏​អាច​កើតមាន បោះឆ្នោត​ដោយ​សេរី​ក៏​អាចមាន និង​មិនមាន​ការបោះឆ្នោត​ក៏​អាច​កើតមាន​បានដែរ​។​

​កន្លងមក​មន្ត្រី​គណបក្ស​ប្រជាជន​កម្ពុជា ធ្លាប់បាន​គូសវាស​តាមរបៀប​បង្ហាញផ្លូវ​ឲ្យ​មន្ត្រី​គណបក្សប្រឆាំង​វិល​ទៅរក​ទ្រនំ​ចាស់​រៀងៗ​ខ្លួន​វិញ​គឺ​គណបក្ស​សម រង្ស៊ី និង សិទិ្ធមនុស្ស ដើម្បី​ចូលរួម​បោះឆ្នោត​ឆ្នាំក្រោយ​ក្នុងករណី​ដែល​គណបក្ស​សង្គ្រោះ​ជាតិ​រលាយ​។​

​ប៉ុន្តែ​ព្រឹទ្ធសមាជិក​គណបក្សប្រឆាំង លោក​គង់ គាំ ផ្តាំ​ថា​ដាច់ខាត​កុំ​ចែកចានចែកឆ្នាំង​គ្នា​ឲ្យសោះ​។​លោក​ថា​ត្រូវ​នាំគ្នា​បង្កើត​ចលនា ឬ​គណបក្ស​ថ្មី​មួយទៀត​ដោយ​ប្រមូល​សំឡេងគាំទ្រ​ឲ្យបាន​មូល​ដើម្បី​ត្រៀមខ្លួន​ប្រកួត​តទល់​នឹង​គណបក្សកាន់អំណាច​នៅក្នុង​ការបោះឆ្នោត​ឆ្នាំ ២០១៨​។​បើ​មិន​ដូច្នោះ​ទេ​សំឡេងគាំទ្រ​នឹងត្រូវ​បែក​ខ្ចាត់ខ្ចាយ​អស់ និង​វិល​ទៅរក​ភាពបរាជ័យ​ទាំងស្រុង​។​

​ខណៈពេលដែល​សមាជិក​រដ្ឋសភា​មកពី​គណបក្ស​ប្រជាជន​កម្ពុជា បានអនុម័ត​ទាំងស្រុង នូវ​វិសោធនកម្ម​ច្បាប់បោះឆ្នោត ដើម្បី​សម្រួល​ក្នុងការ​ពុះ​ជ្រៀក​អាសនៈ​របស់​គណបក្ស​សង្គ្រោះ​ជាតិ ដែល​នឹងត្រូវ​រំលាយ ទៅឲ្យ​គណបក្ស​ផ្សេង​នោះ លោក​អេង ឆៃអ៊ាង​ថា​នេះ​ជាការ​ប្លន់​ឆន្ទៈ​របស់​ប្រជាពលរដ្ឋ តែ​អ្នកនាំពាក្យ​គណបក្ស​ប្រជាជន លោក​សុខ ឥសាន​ថា ការយក​ចំនួន​អាសនៈ​របស់​គណបក្ស​ដែល​ត្រូវបាន​រំលាយ​ទៅឲ្យ​គណបក្ស​ផ្សេង គឺ​អាស្រ័យ​ដោយ​គណបក្ស​នោះ បាន​រំលោភ​ឆន្ទៈ​របស់​ប្រជាជន ប្រើ​ឧបាយកល​បោកប្រាស់​ឆន្ទៈ​ប្រជាជន បាន​អាសនៈ​ដោយ​មធ្យោបាយ​មិន​ស្របតាម​គោលការណ៍​លទ្ធិប្រជាធិបតេយ្យ​ដែល​ត្រូវ​លែងមាន​សុពលភាព និង​លែងមាន គុណសម្បត្តិ  ហើយ​អាសនៈ​ទាំងនេះ​ត្រូវ​បែងចែក  ដែល​ករណីនេះ មិនមែនជា​ការរំលោភ​ឆន្ទៈ​ប្រជាជន​នោះទេ​។​

​ដោយឡែក​ប្រជាពលរដ្ឋ អ្នកគាំទ្រ​គណបក្សប្រឆាំង រួមទាំង​សហគមន៍​អន្តរជាតិ​មួយចំនួន ចង់ឲ្យ​គណបក្ស​ទាំងពីរ ជួបពិភាក្សា​គ្នា​ឡើងវិញ ដើម្បី​សម្រួល​ស្ថានការណ៍​ឲ្យមក​ប្រក្រតី​ឡើងវិញ ហើយក៏​រិត​តែ​មិន​ចង់ឲ្យមាន​ការរំលាយ​គណបក្សស​ង្គ្រោះ​ជាតិចោល​ដែរ​។​សហគមន៍​អន្តរជាតិ​ទាំងនោះ ព្រួយបារម្ភ​ថា បើ​រំលាយ​គណបក្ស​សង្គ្រោះ​ជាតិ​មែន នោះ​គឺជា​ការ​ទាញ​ប្រជាធិបតេយ្យ​នៅ​កម្ពុជា​ឲ្យ​ដើរ​ថយក្រោយ​៕

ព័ត៌មានផ្សេងទៀត