ព្រឹត្តិការណ៍សំខាន់ៗ  |  ហេតុការណ៍សំខាន់

ករណី​​ប៉ោយប៉ែត​​៖​ពលរដ្ឋ​ស្រែក​យំ​រក​​“​យុត្តិធម៌​”​ ខណៈ​អាជ្ញាធរ​​ថ្លែង​​“​ការពារ​ខ្លួន​”​

30-12-2016 3:16 pm
 ចំនួនទស្សនា 2382
 Share

​ហេតុការណ៍​មួយ​កើតឡើង​នៅ​ច្រកទ្វារ​អន្តរជាតិ​ប៉ោយ​ប៉ែត ដែល​គូរ​ទំនាស់​ជា​សកម្មជន​គណបក្ស​សង្គ្រោះ​ជាតិ ជាមួយ​មន្ត្រី​នាយរង​ប៉ុស្តិ៍នគរបាល​ច្រកទ្វារព្រំដែន កំពុងតែ​មាន​ការចាប់​អារម្មណ៍​ពី​ប្រជា​ពលរដ្ឋ​ខ្មែរ​។ អាជ្ញាធរ​បាន​សម្រេច​បើក​ការ​ស៊ើបសួរ​ទៅលើ​ឈ្មោះ​ឌិន ពុទ្ធី ជា​សកម្មជន​គណបក្ស​សង្គ្រោះ​ជាតិ ពីបទ ”​ហិង្សា​ដោយ​ចេតនា​មាន​ស្ថាន​ទម្ងន់​ទោស​” ខ​ណះ​ពលរដ្ឋ​ស្រែក​តវ៉ា​ថា លោក​ឌិន ពុទ្ធី គ្មាន​កំហុស និង​បាន​ចោទ​អាជ្ញាធរ​ថា បង្កើត​បញ្ហា​ដើម្បី​ចាប់​មន្ត្រី​គណបក្ស​សង្គ្រោះ​ជាតិ​។

​ការចាប់អារម្មណ៍​របស់​ពលរដ្ឋ​ខ្មែរ​នេះ គឺ​ដោយសារតែ​ជា​រឿង​នេះ ជា​ទំនាស់​រវាង​មន្ត្រី​រដ្ឋាភិបាល ជាមួយ​សកម្មជន​បក្ស​សង្គ្រោះ​ជាតិ ជា​ពលរដ្ឋ​សាមញ្ញ ដែល​ឆ្លុះបញ្ចាំង​ពី​ការអនុវត្ត​ច្បាប់​នៅ​កម្ពុជា​។ អាជ្ញាធរ​បញ្ជាក់​ជាច្រើន​ដង​ថា ករណី​នៅ​ច្រកទ្វារ​អន្តរជាតិ​ប៉ោយ​ប៉ែត ជា​គ្រោះថ្នាក់​ចរាចរណ៍ បង្កឡើង​ដោយ​លោក​ឌិន ពុទ្ធី ហើយ​លោក​ឈាន ពិសិដ្ឋ នាយរង​ប៉ុស្តិ៍​នគរបាល ជា​ជន​រង់​គ្រោះ​។ អយ្យការ​អម​សាលាដំបូង​ខេត្ត​បន្ទាយមានជ័យ រ​បាន​សម្រេច​បើក​ការ​ស៊ើបសួរ​ទៅលើ​ឈ្មោះ​ឌិន ពុទ្ធី ជា​សកម្មជន​គណបក្ស​សង្គ្រោះ​ជាតិ ពីបទ​”​ហិង្សា​ដោយ​ចេតនា​មាន​ស្ថាន​ទម្ងន់​ទោស​”​។​

​មូលហេតុ​អាជ្ញាធរ​សម្រេច​នេះ ត្រូវ​ក្រសួងមហាផ្ទៃ​ថ្លែង​បញ្ជាក់ថា  ហេតុការណ៍​នេះ កើតឡើង​បន្ទាប់ពី​លោក​ឌិន ពុទ្ធី បាន​ប្រើ​ពាក្យ​មិន​សមរម្យ បញ្ចេញ​កាយវិការ​ច្រ​ង៉េង​ច្រ​ង៉ាង មកលើ​លោក​ឈាន ពិសិដ្ឋ ក្រោយពី​បាន​ឃាត់​ម៉ូតូ​បុរស​ម្នាក់​ជា​អ្នករត់​ម៉ូតូឌុប ឈ្មោះ​អ៊ីង ឃាន ដែល​បាន​ចត​ធ្វើឲ្យ​កកស្ទះ​ចរាច​រណ៍​។ បន្ទាប់មក​លោក​ឌិន ពុទ្ធី បាន​ទាញ​ដៃ​លោក​អ៊ីង ឃាន ចូល​រថយន្ត ប៉ុន្តែ​ត្រូវបាន​រារាំង ដោយ​លោក​ឈាន ពិសិដ្ឋ ពេលនោះ​លោក​ឌិន ពុទ្ធី ក៏​បាន​រោទិ៍​ម៉ាស៊ីន​រថយន្ត រួច​បើក​បុក​លោក ឈាន ពិសិដ្ឋ ធ្វើឲ្យ​ដួល​បោក​ក្បាល​ទៅ​នឹង​ថ្នល់​សន្លប់​បាត់ស្មារតី ហើយ​ត្រូវបាន​ដឹកយក​ទៅ​ជួយ​សង្គ្រោះ នៅ​គ្លីនិក​សុខ វិសាល ប៉ុន្តេ​ដោយ​មាន​សភាព​ធ្ងន់ធ្ងរ ទើប​បញ្ជូន​ទៅ​សង្គ្រោះ​បន្ត នៅ​មន្ទីរពេទ្យ​ខេត្ត​ស្រះកែវ ប្រទេស​ថៃ​។​

​ការគូសបញ្ជាក់​របស់​ក្រសួង​មហាផ្ទៃ​ដូច្នេះ ធ្វើឡើង​បន្ទាប់​ពី​មាន​ការលើកឡើង​ចម្រូងចម្រាស់​នៅ​លើ​បណ្ដាញ​សង្គម និង​សារព័ត៌មាន​មួយចំនួន​ថា​៖ ករណីនេះ មន្ដ្រី​ប៉ូលីស​ធ្វើ​ពុត​ជា​ដួលសន្លប់​នៅ​ពីមុខ​ឡាន Lexus ដើម្បី​ទម្លាក់​កំហុស​ដាក់​ម្ចាស់​ឡាន​ជា​ជា​សកម្មជន​គណបក្ស​សង្គ្រោះ​ជាតិ​។ គណបក្ស​សង្គ្រោះ​ជាតិ ក៏​បាន​បង្ហាញ​ពី​ក្ដី​សង្ស័យ​ស្រដៀង​គ្នា​នេះដែរ ហើយបាន​អំពាវនាវ​ដល់​ស្ថាប័ន​តុលាការ និង​ក្រសួង​មហាផ្ទៃ​ឲ្យ​ស៊ើបអង្កេត​ច្បាស់លាស់​ចំពោះ​ករណីនេះ​។​

​យ៉ាងណាក្តី បើទោះបីជា​អាជ្ញាធរ​ព្យាយាម​បំភ្លឺ​ង​ពី​ករណី​នេះ​ក្តី តែ​ពលរដ្ឋ​មួយចំនួន​នៅតែ​ចាត់ទុក​ករណី​នេះ​ថា ជា​រឿង​អយុត្តិធម៌​។  ភរិយា​របស់​លោក ឌិន ពុទ្ធី បាន​អំពាវនាវ​ឲ្យ​តុលាការ ខេត្ត​បន្ទាយមានជ័យ​ដោះលែង​ប្តី​របស់​ខ្លួន​។ ស្រប​ជាមួយ​គ្នា​នោះ ការតវ៉ា​ពី​ប្រជាពលរដ្ឋក៌​បាន​ផ្ទះឡើង​កាលពី​ថ្ងៃទី​២៩ ខែ​ធ្នូ ឆ្នាំ​២០១៦​។​

​អ្នក​តវ៉ា​បាន​នាំគ្នា​កាន់​បដា​ស្រែកថា “​អយុត្តិធម៌​ណាស់​” និង​អ្នកខ្លះ​ទៀត ស្រែកយំ​ជាដើម​។ ការតវ៉ា​នេះ​បាន​បណ្តាល​ឲ្យ​ច្រក​អន្តរជាតិ​ប៉ោយ​ប៉ែត ស្ទះចរាចរណ៍​ជាង​មួយ​ម៉ោង ក្រោយ​មក​ស្ថាន​ភាព​​ចេះ​តែ​ឡើង​កម្តៅ​ខ្លាំង ក្រុមអ្នកតវ៉ា​ប្រមូលគ្នា​មក​ច្រើនឡើងៗ អាជ្ញាធរ​បាន​បន្ថែម​កម្លាំង​នគរបាល​ជា​ច្រើន​នាក់ រួម​មាន​នគរបាល​អន្តោប្រវរសន៍ នគរបាល​ក្រុង នគរបាល​ការពារ​ព្រំដែន ដើម្បី​​រារាំង​ក្រុមបាតុករ​។

​មុន​នឹង​ការតវ៉ា​ង​ផ្ទះ​ឡើង គេ​ឃើញ​មាន​វីដេអូ​មួយ​ស្តីពី​ហេតុការណ៍ បាន​បង្ហោះ​ពេញ​បណ្តាញ​សង្គម​។ ក្នុង​វីដេអូ​នោះ គេ​ឃើញ​លោក​ឈាន ពិសិដ្ឋ ជា​នាយរង​ប៉ុស្តិ៍​អន្តោប្រវេសន៍​ប្រចាំ​ច្រក​អន្តរ​ជាតិ​​ប៉ោយ​ប៉ែត ដេក​ដួល​នៅ​មុខ​រថយន្ត​ដែល​កំពុង​បើក​ក្នុង​ល្បឿន​យឺតៗ​។ អ្នក​ប្រើ​ហ្វែ​សបុក​មួយចំនួន​ដែល​មើល​វី​ដែ​អូ​នោះ បាន​រិះគន់​ថា មន្ត្រី​រូប​នេះ គឺ​បាន​ធ្វើ​ពុត​ជា​ដួល​ប្រកាច់ ឬ​ដួលសន្លប់​នៅមុខ​ឡាន ហើយ​ពួកគេ​បាន​កាត់ត​រូបភាព និង​វីដេអូ​ជាច្រើន​ក្នុង​ន័យ​រិះគន់​លើ​ក​មន្ត្រី​រូបនេះ​។​

​ក្រោយ​មាន​ការរិះគន់​នេះ ក្រសួងមហាផ្ទៃ បាន​ប្រកាស​បើក​ការស៊ើបអង្កេត ហើយ​ក្រសួង​មហាផ្ទៃ ក៏​បាន​អះអាង​ថា នឹង​កំពុង​ពិនិត្យ​លើ​ផ្លូវ​ច្បាប់ ក្នុង​ការប្តឹង​លើ​ប្រជាពលរដ្ឋ មួយចំនួន រួម​នឹង​តំណាងរាស្ត្រ​គណបក្ស​សង្គ្រោះ​ជាតិ ដែល​បាន​រិះគន់​លើ​ករណី​នេះ​។

​បើ​តាម​ការអះអាង​ពី មន្ត្រីជាន់ខ្ពស់​អគ្គនាយ​កដ្ឋានអន្តោប្រវេសន៍ បានបញ្ជាក់​ថា ការលើកឡើង​របស់ តំណាងរាស្ត្រ​គណបក្ស​សង្គ្រោះ​ជាតិ គឺជា​ការ​ញុះញង់ ដែល​ធ្វើឲ្យ​សាធារណជន មាន​ការ​ភ័ន្ត​ច្រឡំ ខុស​ពី​ការពិត និង​ធ្វើឲ្យ​ខូច ដល់​កិត្តិយស របស់​បុគ្គល ជា​ជនរងគ្រោះ និង​ប៉ះពាល់​ដល់ កិត្កិយ​សស្ថាប័ន​ទាំងមូល​។

​យ៉ាងណាមិញ សម្រាប់​ចំណាត់ការ របស់​អគ្គនាយកដ្ឋាន​អន្តោប្រវេសន៍​នេះ ត្រូវបាន​អ្នកវិភាគ​អះអាងថា ជា​រឿង​សោកស្តាយ​បំផុត ដែល​សមត្ថកិច្ច​មិន​ស្រាវជ្រាវ ស៊ើបអង្កេត លើ​ករណី​ដែល​បាន​កើតឡើង ប៉ុន្តែ​បែរជា​មក​ចង់​ប្តឹង​ផ្តល់ ចំពោះ​ការបញ្ចេញ​មតិ​របស់​ប្រជាពលរដ្ឋ​ទៅ​វិញ​។ អ្នក​វិភាគ​ថា ទង្វើ​បែប​នេះ បង្ហាញថា សង្គម​កម្ពុជា កាន់តែ​ធ្លាក់​ចុះ ហើយ​បុគ្គល ដែល​ខិលខូច​គឺ​កាន់តែ​ក្អេង​ក្អាង​។​

​លោក​អ៊ូ វីរៈ ប្រធាន​អង្គការ​វេទិកា​អនាគត អះអាង គេ​មិន​ដែល​ស៊ើបអង្កេត លើ​អ្នក​រិះគន់ ឬ​អ្នក​ឃ្លាំមើល​នោះទេ គេ​ស៊ើបអង្កេត​ទៅលើ​ករណី ថា​តើ​វា​មាន​បទល្មើស​ព្រហ្មទណ្ឌ​ឬក៏​អត់​? តើ​ការពិត​យ៉ាង​មិច​? មាន​ភស្តុតាង​អី​ខ្លះ​? បន្ទាប់​ពី​ការស៊ើបអង្កេត ឃើញ​មាន​ភស្តុតាង​ផ្សេងៗ ត្រូវ​បង្ហាញ​នៅ​តុលាការ មិន​មាន​មក​ស៊ើបអង្កេត​លើ​អ្នក​ឃ្លាំមើល គឺជា​រឿង​ដែល​ខុស​ធ្ងន់​ណាស់​។​

​គួររម្លឹកថា កាលពី​ថ្ងៃ​ទី​២២ ធ្នូ នៅត្រង់​ចំណុច​លើ​ស្ពាន ក្នុង​ក្រុង​ប៉ោយ​ប៉ែត ខេត្ត​បន្ទាយមានជ័យ មាន​ហេតុការណ៍​ដ៏​ភ្ញាក់ផ្អើល មួយ​បាន​កើតឡើង ដោយ​មន្ត្រី​ប៉ូលីស ប្រចាំ​ច្រក​ប៉ោយប៉ែ​ត​ម្នាក់ បាន​ដួលសន្លប់ ដោយសារ​ត្រូវ​រថយន្ត​បើក​បុក ដែល​នេះ ជា​ការអះអាង​ពី​មន្ត្រី​ប៉ូលីស ខណៈ​ដែល​ប្រជាពលរដ្ឋ នៅក្បែរ​កន្លែង​កើតហេតុ បាន​និយាយថា រថយន្ត​មិន​បាន​បុក​ទេ នេះ​ជា​ល្បិច​របស់​មន្ត្រី​ច្រកព្រំដែន ផ្តួល​ខ្លួន ដួល​ដោយ​ខ្លួនឯង​។

​គួរបញ្ជាក់​ថា លោក​ឈាន ពិសិដ្ឋ  ជា​មន្ត្រី​ស័ក្តិ​៤ ប្រចាំ​នៅ​ច្រក​ប៉ោយប៉ែត​។ ចំណែក ម្ចាស់​រថយន្ត មានឈ្មោះ ឌិន ពុទ្ធី ជា​មន្ត្រី​គណបក្ស​សង្គ្រោះ​ជាតិ ខេត្ត​បន្ទាយមានជ័យ និង​ជា​ប្រធាន​សមាគម​សេដ្ឋកិច្ច​ក្រៅ​ប្រព័ន្ធ ប្រចាំ​ក្រុង​ប៉ោយ​ប៉ែត​៕


ព័ត៌មានផ្សេងទៀត

 
x