កូរ៉េខាងជើងប្រហារជីវិតឧបនាយករដ្ឋមន្ត្រី​ពីបទប្រឆំាងគោលនយោបាយខ្លួន

13-08-2015 11:19 am 1562
ឧបនាយករដ្ឋមន្ត្រី​កូរ៉េខាងជើង​លោក Choe Yong-gonនៅខាងឆ្វេង និងលោកគីម ជុងអ៊ុន

ឧបនាយករដ្ឋមន្ត្រី​កូរ៉េខាងជើង​លោក Choe Yong-gon បាន​ប្រហារជីវិត​ហើយ កាលពី​ខែ​ឧសភា​ឆ្នាំ​២០១៥​កន្លងទៅ​។ មូលហេតុ​ប្រហារជីវិត ដោយសារ​លោក​គីម ជុង​អ៊ុន ចោទប្រកាន់​លោក​ពី​បទ​ប្រឆាំង​គោលនយោបាយ​របស់​កូរ៉េខាងជើង​។ នេះ​បើ​តាម​សារព័ត៌មាន​យុន​ហាប់​របស់​កូរ៉េ​ខាងត្បូង​ចេញផ្សាយ​កាលពី​ថ្ងៃ​ទី​១២​សីហា​។ សារព័ត៌មានយ៉ុប​ហាប់​របស់​កូរ៉េ​ខាងត្បូង​បាន​បញ្ជាក់ទៀតថា រដ្ឋមន្ត្រី​ក្រសួង​ការពារជាតិ​កូរ៉េខាងជើង ក៏​ត្រូវ​បាន​ប្រហារជីវិត​ដែរ​តាំងពី​ខែ​មេសា ឆ្នាំ​២០១៥​ពី​បទ​ប្រមូលផ្ដុំ ប្រឆាំងនឹង​គោលនយោបាយ​របស់​លោក គីម ជុង​អ៊ុន ។

 

ទីភ្នាក់ងារ​ចារកម្ម​របស់​កូរ៉េខាងត្បូង​បាន​អះអាងថា កាលពី​ខែ​មេសា​កន្លង​ទៅ លោក​គីម ជុង​អ៊ុន បាន​បញ្ជា​ឱ្យ​ប្រហារជីវិត​មន្ដ្រី​ជាច្រើន​រូប រួម​ទាំង​ពូ​បង្កើត​ផងដែរ ក្រោយពី​លោក​គីម​ឡើងកាន់តំណែង​ជា​ប្រធានាធិបតី បន្ទាប់ពី​លោក​គីម ជុងអ៊ីល​ស្លាប់​កាលពី​ខែ​ធ្នូ​ឆ្នាំ​២០១១​។ លោក​គីម​បាន​បញ្ជា​ឱ្យ​ប្រហារជីវិត​ពូ​បង្កើត​របស់​ខ្លួន កាល​ឆ្នាំ​២០១៣ ពី​បទ​ក្បត់ជាតិ​និង​ប្រព្រឹត្ត​អំពើពុករលួយ​។ ចាប់តាំងពី​លោក​គីម ជុង​អ៊ុន ឡើងកាន់​តំណែង​ក្នុង​វ័យ​ជាង​៣០​ឆ្នាំ លោក​បាន​រុះរើ​មន្ត្រី​កងទ័ព​ជាច្រើនលើក​ជា​ច្រើន​សា​រហើយ ក្នុង​គោលបំណង​បង្ខំ​ឱ្យ​មន្ត្រី​កងទ័ព​ទាំងនោះ​ស្មោះស្ម័គ្រ​មកលើ​ខ្លួន​។

 

លោក​គីម ជុង​អ៊ុន បានចែង​ច្បាប់​ហើយ​ថា អ្នក​ណា​ហ៊ាន​ប្រឆាំង​គោលនយោបាយ​ខ្លួន អ្នក​នោះ​នឹង​ត្រូវ​ប្រហារជីវិត​មិន​ខាន​។ រាជ្យ​វង្ស​គីម បាន​គ្រងរាជ្យ​នៅ​ភាគ​ខាងជើង​នៃ​ឧបទ្វីប​កូរ៉េ​ជា​៦​ទស្សវត្ស​មកហើយ ដោយ​ប្រើ​កណ្ដាប់ដៃ​ដែក​។ នេះ​បើ​តាម​សារព័ត៌មាន​យ៉ុប​ហាប់​របស់​កូរ៉េ​ខាងត្បូ​ង​បញ្ជាក់បន្ថែម​។ សារព័ត៌មាន​យ៉ុប​ហាប់​ថា កាលពី​ទស្សវត្ស​ឆ្នាំ​២០០០ លោក​Choe Yong-gon បាន​ធ្វើ​ទស្សនកិច្ច​ទៅ​ទីក្រុង​សេ​អ៊ូ​ល ដើម្បី​ពិភាក្សា​ខាង​វិស័យ​ពាណិជ្ជកម្ម ដើម្បី​ផ្ដល់​ផលប្រយោជន៍​រវាង​ប្រទេស​កូរ៉េ​ខាងត្បូង​និង​កូរ៉េខាងជើង​។


​គួរបញ្ជាក់​ថា លោក Choe Yong-gon បាន​តស៊ូ​គ្រប់​ឧបសគ្គ ដើម្បី​បម្រើ​ផលប្រយោជន៍​ក្នុង​ប្រទេស​កូរ៉េខាងជើង​។ នៅ​ឆ្នាំ​១៩៤៨-១៩៥០​លោក Choe Yong-gon ជា​មេបញ្ជាការ​កងទ័ព​នៅ​កូរ៉េខាងជើង ហើយ​នៅ​ឆ្នាំ​១៩៤៨-១៩៥៧ លោក​ឡើងកាន់តំណែង​ជា​រដ្ឋមន្ត្រី​ក្រសួង​ការពារជាតិ និង​នៅ​ឆ្នាំ​១៩៥៧-១៩៧២ លោក​ឡើង​តំណែង​ជា​ប្រធាន​គណៈកម្មាធិការ​អចិន្ត្រៃយ៍​នៃ​សភា​ប្រជាជន​កំពូល​កូរ៉េ​ខាង​ជើង​៕(​ដោយ​៖​លាង ធីតា​)

ព័ត៌មានផ្សេងទៀត