ពិធី​​ចេញ​ពី​​ម្លប់​

ដោយ៖ Vayofm Teams 21-06-2015 2:03 pm 3071

​ពិធី​ចេញ​ម្លប់​នេះ​មាន​លក្ខណៈ​ពិធី​ច្រើនយ៉ាង​ណាស់​ខុសពី​ពិធី ចូល​ម្លប់ ។ ប៉ុន្តែ​វត្ថុបំណង​គឺ​បំពេញ​លក្ខណ៍​គម្រប់​ឲ្យ​កូនស្រី ។ ឆ្លង​តាម​រយៈកាល​បញ្ចូល​ម្លប់​គ្រប់​តាម​កាល​កំណត់​ហើយ មាតា បិតា នៃ​កូនស្រី បាន​រើស​រក​ពេលវេលា​សម្រាប់​បញ្ចេញ​ម្លប់​កូនស្រី ។ ពេល​ដឹង​ថ្ងៃ​ជោគ​សិរី​មង្គល​ហើយ គ្រួសារ​ទាំងអស់​រវល់​ដើររក​ភស្តុភារ និង​អញ្ជើញ​ញាតិមិត្ត​ដូច​រៀប​មង្គលកា​រដែរ ។ កម្មវិធី​នៃ​ដំណើរការ​នេះ​មាន​រយៈពេល​ពីរ​ថ្ងៃ​មួយ​យប់។​ ជាបន្តសូមស្តាប់គួន សំបូរ ដូចតទៅ៖

 

​ពិធី​ចេញ​ម្លប់​នេះ​ធ្វើឡើង​ក្នុង​កម្មវត្ថុ​បំណង​ដូចគ្នា​ទៅ​និង​ពិធី​ចូល​ម្លប់ គឺ​បំពេញ​លក្ខណ៍​គម្រប់​ឲ្យ​កូនស្រី ។ ប៉ុន្តែ​គ្រាន់តែ​ពិធី​ចេញពី​ម្លប់​នេះ​មាន​លក្ខណៈ​ពិធី​ច្រើនយ៉ាង​ណាស់​ខុសពី​ពិធី ចូល​ម្លប់​។ ពិធី​ចេញ​ម្លប់ នៅ​ថ្ងៃ​ដំណើរការ​ដំបូង​ចាប់ពី​ពេល​ព្រឹក​រហូតដល់​ថ្ងៃត្រង់ មានតែ​ការទទួល​ញាតិ​មិត្ត​ជិតខាង​និង​ការលៀង​ភោជនាហារ​ប៉ុណ្ណោះ ។ ប៉ុន្តែ​ចាប់ពី​ពេល​រសៀល​ទៅ​មាន​ពិធី​ជា​ហូរហែ​បន្តបន្ទាប់​ដូចជា ៖

 

​ពិធី​កាត់សក់ ៖ ជា​លើកដំបូង​បំផុត គឺ​ត្រូវ​បញ្ចេញ​កូនស្រី​មក​កាត់សក់ គឺ​ចេញពី​បន្ទប់​នៅ​ក្នុងផ្ទះ​ដែល​ចូល​ម្លប់ ។ បន្ទាប់​ពី​ការ​កាត់សក់​លាប​ប្រេង​ម្សៅ​ហើយ នាង​ត្រូវ​វិល​ចូល​ទៅក្នុង​បន្ទប់​វិញ ។ ពេល​កាត់សក់​ភ្លេង​កំដរ នូវ​បទ​សារិកាកែវ ។

 

​ពិធី​សូត្រមន្ត ៖ សាច់ញាតិ​ជា​ស្ត្រីភេទ​ម្នាក់ ដែល​ត្រូវបាន​ទទួលស្គាល់ថា ខ្ពង់ខ្ពស់​មាន​ចរិយា​សម្បត្តិ​ល្អ ត្រូវ​ទៅ​បន្ទាប​ដឹក​ដៃ​នាង​ឲ្យចេញ​មក​ទទួល​ទឹកមន្ត និង​ធម៌​លើករាសី​ពី​ព្រះសង្ឃ ។

 

​ពិធី​សែនព្រេន ៖ នៅពេល​ព្រលប់​រៀបចំ​ពិធី​សែនដូនតា​ម្ចាស់​ទឹក​ម្ចាស់​ដី ។

 

​ពិធី​បុកល័ក្ត ៖ ពិធី​នេះ​គេ​ធ្វើ​នៅពេល​យប់ បន្ទាប់​ពី​ការ​ពិសារ​អារ​ហា​រហើយ ដែល​ប្រកបដោយ​ពិធី​ជា​
​ហូរហែ​បន្តបន្ទាប់​ទៀត ។​

 

​ពិធី​ទៅរក​ល័ក្ត ៖ ពិធី​នេះ​ដំណើរការ​ដោយ​អ្នកភ្លេង​ជា​របៀប​កំប្លែង​ធ្វើជា​ទៅរក​ល័ក្ត ក្នុងព្រៃ​ជួប​សត្វ​តាឱ​ដេញ​ទិច​ស្ទុះ​រត់​ច្រឡោត​ជាន់​គ្នា​រញ៉េរញ៉ៃ ។

ពិធី​កាត់​ត្បាល់ ៖ ពិធី​នេះ​ដំណើរការ​ដោយ​អ្នកភ្លេង​ដែរ គេ​ធ្វើ​ជា​ទៅ​ក្នុង​ព្រៃ​រក​ឈើ​ល្អ​មក​ធ្វើ​ត្បាល់​ថ្មី ស្រប​តាម​កូនស្រី​ដែល​ចេញពី​ម្លប់​ដែរ ។

 

​ពិធី​បុកល័ក្ត ៖ ពិធី​នេះ​ធ្វើឡើង​ដើម្បី​យក​ល័ក្ត​មក​ធ្វើ​ធ្មេញ​បំពេញ​លក្ខណ៍​ឲ្យ​កូនស្រី ។ គេ​ឲ្យ​កុមារី​ព្រហ្មចារី ៤ នាក់ មក​បក​ក្រមរ​ល័ក្ត​ចេញពី​មែកឈើ រួច​ប្រគល់​ជូន​តា​អាចារ្យ​ទៅ​ដាក់​ក្នុង​ត្បាល់ ហើយ​អ្នកភ្លេង​ជា​អ្នកដើរតួ​បុកល័ក្ត​រហូត​ដល់​ល្អិត ទើប​កាយ​ដាក់​ផ្តិល​ប្រគល់​ជូន​តា​អាចារ្យ​វិញ ។

 

​ពិធី​ធ្វើ​ធ្មេញ ៖ តាអាចារ្យ​យក​ល័ក្ត​ទៅ​ដាំ​ស្ងោរ​នៅ​កណ្តាល​ផ្ទះ​ជាមួយ​សម្បក​ស្បែ​ង និង​ផ្លែ​សំបួរមាស ។ ស្ងោរ ដោយ​ឆ្នាំង​ថ្មី ចង្ក្រាន​ថ្មី ដោយ​រម្ងាស់​ចេញ​ជាតិ​ពណ៌​ក្រហម​ស្រស់ បាន​យក​ទៅឲ្យ​សាមី​ខ្លួន​ស្រី​បៀម ។ នៅពេល​មាន​ចំហាយ​ទឹក​អាចារ្យ​យក​សំឡី​ផ្តិត​ចំហាយ​ទឹក​ស្ងោរ​ល័ក្ត​មក​លាប ធ្មេញ​ឲ្យ​កូនស្រី​ដែល​ចេញពី​ម្លប់ ដោយ​ប្រសិទ្ធពរ​ឲ្យ​ទឹក​ល័ក្ត​នេះ ធ្វើឲ្យ​នាង​ក្លាយ​ជា​ស្រី​គ្រប់​លក្ខណ៍​​ពេញ​​បរិបូណ៌​…​។ អ្នក​ទីទ័លក្រ មិន​មាន​លទ្ធភាព​រៀប​ពិធី​ចេញ​ម្លប់ ឲ្យ​កូនស្រី​អាច​យក​កូនស្រី​ខ្លួន​មក​ចូលរួម​ធ្វើ​ធ្មេញ​បំពេញ​លក្ខណ៍ ជាមួយ​កូនស្រី​អ្នកមាន​ដែល​ចេញពី​ម្លប់​តាម​ការយល់ព្រម ។

 

​ពិធី​ដេក​អង្ករ​រាប ៖ ពិធី​នេះ​មាន​លក្ខណៈ​ដូច​ពិធី​កោរ​ជុក​ដែរ ប្រសិនបើ​មាន​រៀបចំ​ពិធី​កោរ​ជុក​ហើយ​នោះ​មិនបាច់​ក៏​បាន​ដែរ តែ​ត្រូវ​ភ្ញាក់​ពេល​ទៀប​ភ្លឺ​រង់ចាំ​ទទួល​ពេលា ដើម្បី​សំពះ​ព្រះអាទិត្យ ។ នៅ​មុនពេល​នាង​ចេញពី​បន្ទប់​នោះ​មក​កាន់​កន្លែង​ពិធី ត្រូវ​ស្លៀកពាក់​ដូច​កូនក្រមុំ​ពេល​រៀប​មង្គលការ ដៃ​កាន់​បាយព្រលឹង​មក​អង្គុយ​លើ​កម្រាលព្រំ ដែល​មាន​ញាតិ​មិត្ត​រង់ចាំ​ឲ្យ​ពរជ័យ ។ អាចារ្យ​សូត្រ​ប្រកាស​បួងសួង​ហើយ​ចាប់ផ្តើម​បង្វិលពពិល​ចំនួន ១៩ ជុំ ញាតិសណ្តាន​នាំគ្នា​ចងដៃ​ដោយ​អំបោះ ព្រមទាំង​ប្រាក់​កាស មាស​… ដើម្បី​ជូនពរ និង​ភ្ជាប់​ព្រលឹង​ឲ្យ​នាង ។ លុះ​ចប់ ហើយ​ញាតិមិត្ត​ដឹក​ដៃ​កូនស្រី​ទៅ​ក្នុង​បន្ទប់​វិញ ។

 

​ពិធី​សាកន្ទេល​និង​លក់​កន្ទេល ៖ អ្នកភ្លេង​ច្រៀង​រាំ​បណ្តើរ​ឆ្កឹះរ​មូរកន្ទេល​ដែល​កូនស្រី​អង្គុយ​សំពះ បង្វិលពពិល​នោះ​បណ្តើរ ហើយ​យក​ដាក់​លើ​ស្មា ។ គេ​ច្រៀង​លក់​កន្ទេល​រៀបរាប់ថា​លក់​ឲ្យចំ​ពោះ​តែ​អ្នក​មាន​និស្ស័យ និង​អានុភាព ។ អ្នក​មាន​វាសនា ពេល​យក​ទៅ​ក្រាល​ដេក​កើត​មាស​កើត​ប្រាក់ ទ្រព្យសម្បត្តិ​…​។ ពេល​នោះ​សាមីខ្លួន​ត្រូវ​ចេញ​មក​សុំ​ទិញ​ហើយ​សន្មត​ថា ចប់​ពិធីលក់កន្ទេល ។ គេ​យក​ល័ក្ត​ដែល​បារ​ទុក​ខ្លះ​ពី​ការធ្វើ​ធ្មេញ​នោះ ឲ្យ​កូនស្រី​យក​ទៅ​កប់​នឹង​ចបជីក​ថ្មី​នៅ​លើ​ដី​ភូមិ​ណា​ដែល​ឪពុកម្តាយ បម្រុង​ចែក​ឲ្យ​ជា​កេរ្តិ៍ និង​ដាំ​ដើម​ចេក ដើម​អំពៅ​មួយ​ដើមៗ​ពីលើ ដើម្បី​ជា​និមិត្តរូប​ថា ជីវិត និង​ការរស់នៅ​ក្នុង​សុភមង្គល​ផ្អែម​ដូច​ផ្លែ​ចេក​និង​ដើម​អំពៅ​ដែរ ។ ចាប់ពី​ពេលនេះ​ទៅ​នាង​អាច​ដើរ​ចេញ​ក្រៅ​បន្ទប់​ទៅ ណា​មក​ណា​បាន​ដោយ​សេរី​ហើយ ៕

(ដោយ៖គួន សំបូរ)

ព័ត៌មានផ្សេងទៀត