ជីវិត និងកម្សាន្ត

ប៉ូលិស​ឥណ្ឌា​​ចាប់ខ្លួន​​បុរស​ម្នាក់​​ដែល​រក្សា​​សាកសព​​ម្ដាយ​​ក្នុង​ទូរ​ទឹកកក​​បី​ឆ្នាំ​

ដោយ៖ ពេញ ផេង    07-04-2018 3:00 PM    2345
ទូរទឹកកក​ដែលជនសង្ស័យ​ប្រើប្រាស់

​ប៉ូលិស​ឥណ្ឌា​បាន​និយាយថា ពួកគេ​បាន​ចាប់ខ្លួន​បុរស​ម្នាក់ ដែល​រក្សា​សាកសព​ម្ដាយ​របស់គេ​នៅក្នុង​ទូរ​ទឹកកក​អស់​រយៈពេល​បី​ឆ្នាំ​។ ជនសង្ស័យ Subhabrata Majumdar បាន​រក្សាទុក​សាកសព​យ៉ាង​មាន​សុវត្ថិភាព​បំផុត ដោយ​ប្រើប្រាស់​សារធាតុ​គីមី​ហើយ​ក្លាហ្សេ​ក្នុង​ទូ​រ​ទឹកកក​។ ប៉ូលិស​បាន​បន្ថែមថា បាន​ចូល​ឆែកឆេរ​ក្នុងផ្ទះ​ជនសង្ស័យ ហើយក៏​បានឃើញ​សាកសព​ស្ដ្រី​ម្នាក់​នៅក្នុង​ទូរ​ទឹក​កកធំ​មួយ​។ សាកសព​នោះ​ត្រូវបាន​រក្សាទុក​ដោយ​ប្រើ​សារធាតុ​គីមី​ផងដែរ​។ ក្រៅពីនេះ​ប៉ូលិស​បាន​រកឃើញ​ពាង​ដែលមាន​ផ្ទុក​ផ្នែក​ផ្សេងៗ​ទៀត​នៃ​រាងកាយ​។

​បើតាម​របាយការណ៍​ម្ដាយ​របស់ Majumdar បាន​ស្លាប់​តាំងពី​ខែមេសា​ឆ្នាំ​២០១៥​ម្ល៉េះ ហើយ​ក្រុមគ្រួសារ​សម្រេច​មិន​បូជាសព​ឡើយ ផ្ទុយទៅវិញ​បាន​រក្សា​សាកសព​នៅក្នុង​ទូរ​ទឹកកក​។ ទាំង​ឪពុក​និង​ម្ដាយ​របស់​Majumdar​សុទ្ធតែ​បាន​ចូលនិវត្ដន៍​អស់ហើយ និង​ទទួលបាន​ប្រាក់​សោធន​និវត្ដន៍ជា​រៀងរាល់ខែ ប៉ុន្ដែ​ប្រសិនបើ​មាន​នរណាម្នាក់​ស្លាប់ ប្រាក់​នោះ​នឹង​មិនអាច​ដក​បានឡើយ​។ នេះ​បើតាម​ការបញ្ជាក់​ពី​ប៉ូលិស​។ យ៉ាងណាមិញ​ប៉ូលិស​កំពុង​ស៊ើបអង្កេត​រក​ការពិត ថា​តើ​ជនសង្ស័យ​រូបនេះ​រក្សាទុក​សាកសព​ម្ដាយ គ្រាន់​ដើម្បី​អាច​ទទួលបាន​ប្រាក់​សោធន​ឬក៏​យ៉ាងណា​៕